¹ Pano umukashi wa baana baba kasema umo alishile kaalukulila kuli Elisha, ne kulabilati, "Umusha wenu umulume wangi afwa, kabili mulishibile umusha wenu alukuchina ba Yawe. Pano uwankongole aisa mukupinta abana bangi babili ukuba basha bakwe. " ² Penka Elisha alilabile kuli ye ati, "Nikindo ikyo ninga kukichila webo? Mbule ifyo ulinafyo munanda? " Alilabile ati, " Umusha wenu takwetepo ifintu munanda, kanafye umwipika wa mafuta. " ³ Penka Elisha alilabile ati, " Fuma posonde uye ukakongole amakapu aakulu kuli abo wikala nabo apepi, amakapu umwakubula ifintu. Ukongole aengi sana. ⁴ Penka ulilingile ukwingila mukachi kabili ne kushinka kumulyango kunuma yobe ne baana bobe abalalume, kabili ne kwitulwila amafuta mumakaapo onse; ubike kumbali amakaapu aaisula. " ⁵ Kabili alimushile Elisha ne kushinka kumulyango kunuma yakwe na kubana bakwe abalalume. Baliletele amakapu aakulu kuli ye, kabili ali eswile ne mafuta. ⁶ Ulo umwakubika mwaiswile, alilabile ku baana bakwe abalalume ati, "Ndeteleni kaapu umbi . " Pano alilabile ku ye ati, " Tamulipo amakaapu ambi . " Penka ama futa alilekele ukusuuma. ⁷ Kabili alishile ne kumweba umuntu waba Lesa ati. Alilabile ati, " Kabiye, ushichishe amafuta; upane kubankongole, kabili wikale ne bana bobe mukutusha. " ⁸ Akasuba kamo Elisha alile ku Shunemi uko inefwe umubile alukwikala; Alimwebele ukulya ifyalya nakwe. Kanshi pakuti epo Elisha alukupichila, ulu kwimakana palya ne kulya. ⁹ Umwanakashi alyebele umulume wakwe ati, "Moneni, pano naanuka ati uno muntu ushilile waba Lesa uupita lyonse pano. ¹⁰ Lekeni tumusompele akananda pamutenge akakwa Elisha, kabili tubikeni umupunda, apakwikala ne lampi. Penka kani aisa kuli fwebo, kaalukwikalamo." ¹¹ Kanshi ulo akasuba kafikile apo Elisha aimakene palya, alikeeele munanda ne kutusha mulya. ¹² Elisha alimwebele Gehaz umusha wakwe ati, " Mwite uyu umwina DShunami. " Ulo amwichile, alimakene pantanshi yakwe. ¹³ Elisha alimwebele ati, " Mwebe ati, ' Wapita muli luno lukatasho lonse mukutulama fwebo. Nikindo kyenga kukichila webo? Bushe tukulabilileko ku mfumu nangu ku mukulu wabashilikale?"" Alyasukile ati, " Ndekala mukachi ka bantu bangi. " ¹⁴ Penka Elisha alilabile ati, " Nifindo ifyo twinga mukachila, kanshi ? Gehazi alya sukile ati, " Ikiine, takwetepo umwana umwalalume, kabili ne mulume wakwe wakota. " ¹⁵ Penka Elisha alyasukile ati , " Mwiteni. " Ulo bamwichile, alimakene mu mulyango. ¹⁶ Elisha alilabile ati, " Pali ino nshita ya mwaka mu mpindi ya mwaka, ukaba no mwana umwalalume. "Alilabile ati, "Yowo., kapa wangi kabili we muntu waba Lesa, mwibepa ku musha wenu. " ¹⁷ Pano inesu alimichile ne kufyaala umwana umwalalume panshinta imo mumwaka wakonkelepo, fyenka alabile kuli ye. ¹⁸ Ulo umwana akulile, alifuminepo akasuba ba kamo ukuya kuli ba wishi, abo bali ne bakufumya akalyo. ¹⁹ Alilabile kuli bawishi ati, "Umutwi wangi, umutwi wangi. "Bawishi balilabile ku musha wabo ati , "Mupinteni kubainakwe." ²⁰ Ulo umusha amwimishe peulu nekumuleta kuli bainakwe, umwana alikele kumakufi abainakwe ukufika akasuba pamitwi kabili alifwile. ²¹ Penka inesu alibukile kabili ne kumulalika umwana pamupunda wa munytu waba Lesa, ne kushinkako umlyango, kabili ne kufumamo. ²² Alichile umulume wakwe, ne kulabilati, " Napapata umo uwamubasha benu ne mbongolo imo pakweba nengendesha ku muntu waba Lesa kabili ne kubwela bwangu. " ²³ Umulume wakwe alilabile ati, "Nindo wafwaila ukuya kuli ena leelo? Talipo mwenshi wabukumo nangu lisabata. "Umwanakashi alyasukile ati, "Kile bafye bwino. " ²⁴ Kabili alinishile pambongolo kabili ne kumweba umusha wakwe ati, "Ensha bwangu; welukwensha panini kuli nemo kana nakubula ukukitefyo. " ²⁵ Penka alile kabili ne kwisa kumuntu wa ba Lesa kulupili lwa Kameli. Kanshi ulo umuntu waba Lesa amumwene apatali, alilabile kuli Gehazi umusha wakwe ati, "Mona, umwanakashi umwina Shunami uyo uleisa. ²⁶ Kanshi butuka umukumanye ne kumweba aati, " Bushe fyonse filibwino kuli webo nakumulume obe na mwana obe? Alyasukile ati, " Fili bwino. " ²⁷ Ulo aishile ku muntu waba Lesa kulupili, ali mukwachile kumolu akwe. Gehazialishile kubwipi mukumufumyako pano umuntu waba Lesa alilabile ati, " Muleke umwine bushimwa bwakwe, pakuti ena afulanána, kabili ba Yawe bafisa ulukatasho kuli nemo, kabili tapalipo ikyo ba ngeba. " ²⁸ Kabili umwanakashi alilabile ati, " Bushe nalimilombelepo umwana, mwe kaapa wangi? Bushe nshalabile ati 'Mwe mbepaika'? " ²⁹ Penka Elisha alimwebele Gehazi ati, "Ufwale ifya palwendo kabili upinte ne mukombo wangi mukuboko kobe. Uye kunanda yakwe. Kani wakumanya umuntu, tekumuposha, kabili kani ena ukuposha, webo tekumwasuka. Ubike umukombo wangi pakilungi kya mwana. ³⁰ Pano inakwe wa mwana alilabile ati, "Mwenka umwikalile ba Yawe ne bumi, kabili na mwebo, nshamishe mwebo. " Kanshi Elisha alimine ne kumukonkela inefwe. ³¹ Gehazi alyendeshe pantanshi yabo ne kubika umukombo pa kilungi kya mwana, pano umwana taalabilepo nangu kumfwa. Kanshi kabili Gehazi alibwelele libili mukukumanya Elisha ne kumwebati, "Umwana taabukile yowo. " ³² Ulo Elisha afikile kunanda, umwana alifwile kabili akilifye pamupunda. ³³ Penka Elisha alingile munanda ne kushinkako ikibi pa mwana kabili ne mwine ne kulomba kuli ba Yawe. ³⁴ Alininshile peulu ne kulalila pa mwana ; alibikile akanwa kakwe pakanwa kakwe, amenso akwe pa menso akwe, amaboko akwe pamaboko akwe. Alilita anikile umwine ukufuma pa mwana, kabili umubili wamwana walitampile ukukaba. ³⁵ Penka Elisha alimine ne kwendauka mu nanda kabili nalibili aninsa peulu ne kuli tanika pa mwana. Umwana alichamwine imisunsa isanu naibili kabili alishinkwile pa menso! ³⁶ Kanshi Elisha alichile Gehazi ne kulabilati, "Mwite umwina Shunami! " Kanshi alimwichile, kabili ulo aishile munanda, Elisha alilabile , " Mutole umwana obe. " ³⁷ Penka alikunikile ikilungi kyakwe panshi kumolu akwe kabili ne kufukama panshi, kabili ne kutyola umwana wakwe ne kuya posonde. ³⁸ Kabili Elisha alishile libili ku Giligali. Kwali ikipowe kyansala mukyalo, kabili ne baana abalalume babakasesema balikele pantanshi yakwe. Alilabile kumusha wakwe ati, "Bika umwipika uukulu pamulilo ne kuteka supu wabaana balalume baba kasesema. ³⁹ Umo uwamuli bo alifuminepo ne kuya mu bulimi mukuleta ubukisa. Alisangile amufaina wamumpanga mukwisusa amwakupinchila mwakwe. Balifitawile kabili nekufibika muli supu, pano tabaishibile umutundu fya belelemo. ⁴⁰ Penka baliwichile supu wabantu ati balye. Penka ulo balukulya, balilile ne kulabilati, " We muntu waba Lesa, muli mfwa mu mwipika ! " Kanshi tabalilepo libili. ⁴¹ Pano Elisha alilabile ati, "Leteni ubunga bwa fulawa. "Alibuposele mu mwipika ne kulabilati, "Fichilenimo fya bantu, pakwebati benga lya. "Penka tamwalipo nangu kimo ikyakusomeshanána mu mwipika. ⁴² Umuntu alishile ukufuma Baali Shalisha ukwisa ku muntu waba Lesa ne kuleta imikate amukumi abili mwi saka lyakwe iyo afumishe mubusomboshi bwabukumo, kabili ne kalyo kanenda kamunatwi akanseke. Alilabile ati, "Paneni fimo kuli abantu pakwebati balye." ⁴³ Umusha wakwe alilabile ati, "Nindo, ne ngabikila fino kubantu umwanda umo ? " Pano Elisha alilabile ati ," Fipane fino ku bantu, pakwebati balye, pantu ba Yawe balabilati, "Bakufilya kabili bateshapo na fimbi. " ⁴⁴ Kanshi umusha wakwe alifibikile ku menso abo; balilile, kaboili ne kushapo fimo, fyenka ishiwi lya Yawe lyabebele.