¹ Kanshi kyalifikile, ulo ba Yawe balukufwaya ukumutwala Elaija ne kashululu mwiulu, apo Elaja ashele na Elisha ku Giligali. ² Elaija alilabile kuli Elisha ati, "Ikala pano, nakupapachilapo, pantu ba Yawe bantuma nemo ku Beteli. " Elisha alyasukile ati , "Mwenka umwikalile ba Yawe no bumi kabili nefyo mwikele no bumi, nshamileke mwebo." Penka balikunkulukile bonse ku Beteli . ³ Abana abalalume ababakushimika abaliku Beteli balishile kuli Elisha kabili ne kumwebati, " Mwaisa ati ba Yawe bale mufumya kaapa yenu kuli mwebo lelo? " Elisha alyasukile ati, "Ee, nakiishiba, pano mwelukukilabilapo. " ⁴ Elaija alimwebele ati, "Elisha, pembelela pano, napapata, pakuti ba Yawe bantuma nemo ku Jeliko. " Penka Elisha alyasukile ati, " Mwenka umwikalile ba Yawe ne bumi, nshamileke mwebo. " Kanshi baile kuJeliko. ⁵ Kabili abana abalalume baba kushimika abaali ku Jeliko balishile kuli Elisha ne kulabila kuli ye ati , "Mwaishi bati ba Yawe balemufumya kaapa yenu kuli mwebo lelo? " Elisha alyasukile ati, "Ee, naishiba, pano mwelukukilabilapo. " ⁶ Penka Elaija alilabile kuli ye ati, " Ikala pano, napapata, pakuti ba Yawe bantuma ku Jodani. "Elisha alyasukile ati, "Mwenka umwikalile ba Yawe no bumi, kabili na mwebo no bumi, nshamileke mwebo. " Kanshi bonse babili balitwalilile pano. ⁷ Pantanshi, abana abalalume amakumi asanu abakushimika balimakene ulubali lumbi na bo apataliko apo bano babili baimakene ku Jodani. ⁸ Elaija alitolele ikyakufwala, ne kukipombakanya kabili ne kukipuma pameshi . Inika yalyabanishiwe kubili pakwebati bonse babili balyendele pamushili uumune. ⁹ Kyalifikile, panuma yakwabuka bushilya epo Elaija amwebele Elisha ati, " Ngipushe ikyo njingile ukukukichila apo tabangamfumya kuli webo. " Elisha alyasukile ati, " Napapata lekeni ifiputulwa fibili ifya ku mupashi wenu fise pali nemo. " ¹⁰ Elaija alyasukile ati, "Wandomba ikintu ikikosele sana. Nangu kubefyo, kani umone nemo ulu bakulu kumfumya kuli webo, kino kilekukichikilwa, pano nga yowo, takyakukichikilwe. " ¹¹ Ulo batwalilile ukuya ne kulabila, moneni ingolofwana ya mulilo na bakafwalo bamulilo bali bwenekele, isho sha abenye abangtu babili umo kumu kwabo, kabili Elaija alile mwiulu na kashululu. ¹² Elisha alikimwene ne kulila, " Taata wangi, taata wangi amangofwana amu Ishileli kabili ne benda pa bafwalo. " Kabili taamumwenepo Elaija libili kabili alibulile ifyakufwala fyakwe umwine ne kufitabaulamo fibili fibili. ¹³ Alitotele ikyakufwala kyakwa Elaijaikyo kyaponene kuli ena, kabili ne kubwelelamo mukwimakana kubwipi naku Jodani. ¹⁴ Alipumine pamenshi ne kyakufwala kya kwa Elaija ikyaponene ne kulabila ati , " Ba Yawe balipi, ba Lesa wakwa Elaija? " Ulo apumine pamenshi, amenshi alyabanishiwe pabili kabili alyabukile bushilya. ¹⁵ Ulo abana abalalume babakushimika abafumine mu Jeliko bamumwene bushilya ukufuma kuli bo, balilabile ati, " umupashi wakwa Elaija aletushishapali Elisha! " Penka balishile mukumukumanya, ne kufukama bonse pamushili kuli Elisha. ¹⁶ Balilabile kuli ye ati, "Moneni pano mukachi kabasha benu muli abalalume amakumi asanu abakosele. Balekeni ba ye, twalomba, kabili ne kufwaya kapa yenu, apo limbi umupashi waba Yawe amutwala mwiulu ne kumuposa pampili nangu ni mu malungu. "Elisha alyasukile ati," Yowo, mwebatuma. " ¹⁷ Pano ulo bamupachikishe Elisha ukufika nelo aumfwine insoni, ali bebele ati, " Batumeni. " Penka balitimine abalalume amakumi asanu, kabili balimufwaile panshiku shitatu, pano tabamu mwenepo. ¹⁸ Balibwelele kuli Elisha, ulo aikele ku Jeliko, kabili alilabile kuli bo ati, " Bushe nshalabile kuli mwebo ati, "Mwe yako? " ¹⁹ Abalalume bamu mushi balilabile kuli Elisha ati , " Monemi, twamipapachileni, umusango wa uno mushi uwamishe, ne fyo kaapa yangi enga mona, pano amenshi abipile ne mushili tafumyapo ifisepo ifingi. " ²⁰ Elisha alyasukile ati, " Ndeteleni insani yabukumo kabili mubikemo umukele munsani, " Penka baliletele kuli ye. ²¹ Elisha alifumine ne kuya ku nsulo ya kanika ka munshi ne kuposa umukele mu menshi; penka alilabile ati, "Ba Yawe balilabile fi, ' Naabuka ano amenshi. Kufuma kuli ino mpindi, tamwakabepo imfwa nangu ukubulakupanga ifisepo mu kyalo. "' ²² Kanshi amenshi alibukilwe kufika na lelo, kwishiwi ilyo Elisha alabile. ²³ Penka Elisha alitunyukile ukufuma kulya ukuya ku Beteli. Ulo alukuya ukutuntuka mu musebo, abanike abalalume balifumine mu mushi ne kumuweleleka; balilabile kuli ye ati , "Kabiye, we ulinepala! Kabiye, we uline pala ! " ²⁴ Elisha alikebele kunuma yakwe ne ku bamona bo; alichile pali ba Yawe mu kubafinga. Penka bambeyala babili abanakashi balifumine mumpanga kabili ne kubasomesha abana balalume amakumi ane nababili. ²⁵ Penka Elisha alifumineko ne kuya ku lipili lwa Kameli, kabili pakufumako alibwelele ku Samaliya.