¹ Umulandu wa kubala nalembele, we Teofilo, walilandile fyonse ifyo Yesu atendeke ukucita no kusambilisha, ² mpaka ubushiku bulya asendelwe ku mulu, panuma ya kupela ifipope ukupitila mu Mupashi wa Mushilo ku batumwa abo asalile. ³ Panuma ya kucula kwakwe, aliipele umwine uwa mweo kuli bena ne fishinka ifyakubashinina ifngi. Pa nshiku amakumi yane alimonekele kuli bena, kabili alilandile pa bufumu bwakwa Lesa. ⁴ Ulo alikukumanna pamo na bena alibakonkomeshe ukukanafuma mu Yerusalemu, lelo ukulolela ubulayo bwakwa Tata, pafyo alandile ati, "Mwalyufwile ukufuma kuli nebo ⁵ ukwebati Yohane mucine abatishe na menshi, lelo mukabatishiwa mu Mupashi wa Mushilo munshiku ishinono." ⁶ Ulo bali abakukumana pamo balimwipushe abati, "Shikulu, bushe ni ino nshita mukabwesesha ubufumu kuli Israeli?" ⁷ Alilandile kuli bena, "Teca kuli mwebo ukwishiba inshita nangula imicele isho Tata apampamika ku maka yakwe umwine. ⁸ Lelo mukapokelela amaka ulo Mupashi wa Mushilo waisa pali mwebo kabili mukaba bakambone bandi monse mu Yerusalemu na mu Yudea monse na mu Samaria, na kumpela ye sonde." ⁹ Ulo Shikulu Yesu akwete ukulanda ifi fintu, lintu balikulolesha mu mulu, alimishiwe, kabili ne kumbi lyali mufishile ukufuma ku menso yabo. ¹⁰ Lintu balikulelosha mu kutonta menso ku mulu ilintu aile, mukupumikishafye, abaume babili baliminine ku mbali yabo mufyakufwala ifya kubuta. ¹¹ Balilandile abati, "Mwebo mwe baume baku Galili, nindo mwininine pamo no kulalolesha mu mulu? Uyu Yesu usendelwe ku mulu ukufuma kuli mwebo ukuya mu mulu, akabwela mu nshila imo ine ngefyo mwa cimumona akoya ku mulu." ¹² Nolu balibwekelemo ku Yerusalemu ukufuma ku lupili ulwitwa ulwa Miolife, ulwaba mupepi na Yerusalemu, ulwendo lwa pe Sabata. ¹³ Lintu bafikile, baile kuninika pa muputule wa pa mulu, apo balikwikala. Bali Petero, Yohane, Yakobo, Andrea, Filipi, Toma, Batolomeo, Meteo, Yokobo mwana mwaume wakwa Alfeo, Simone umwina Selote, na Yuda mwana mwaume wakwa Yakobo. ¹⁴ Bonse bali abaipelesha no buyo bumo kukupepa, pamo na banakashi, na Maria nyina wakwa Yesu, ne ndume shakwe. ¹⁵ Mu nshiku shilya Petero aliminineko pakati ka ba bwananyina, pamo nalimo amashina ukufikafye ku mwanda umo na makumi yabili, no kulanda ati, ¹⁶ "Bamunyinane, cali icalinga ukwebati amalembo yenga fikilishiwa ayo Mupashi wa Mushilo alandilepo libela ku kanwa kakwa Dabidi palwa ba Yuda, uwalangilile bamo abaikete Yesu. ¹⁷ Pantu ali umo pali fwebo kabili alipokelele icakaniko ca bupyungishi ubu." ¹⁸ (Nomba uyu muntu alishitile impanga mufikwatwa apokelele pa bunkalwe bwakwe, na palya aliponene umutwe pakubala, no mubili wakwe walilepwike ukwisuka, na mala yakwe yonse yalifumine kunse. ¹⁹ Bonse abekala mu Yerusalemu balyufwile palwa ici, eco balikutile iipanga mu citundu cabo "Akeldama," icilepilibula ati, "Impanga lya mulopa.") ²⁰ "Pantu calilembwa mwi buku lya malumbo, Leka impanga yakwe icitwe amapopa, kabili mwileka umuntu nangu umo ekale mulya'; 'Leka umuntu umbi asende icifulo ca butungulushi bwakwe.' ²¹ Cililingele, eco, ukwebati umo uwa mu baume uwatukonkele inshita yonse Shikulu Yesu aleya no kufuma muli fwebo, ²² ukutampilafye pa lubatisho lyakwa Yohane ukufika no bushiku asendelwe ukufuma kuli fwebo, abe kambone na fwebo palwa kushukuka kwakwe." ²³ Balibikile abaume babili ku ntashi, Yosefe uwali kwitwa Barisaba, uyo kabili bainikile Yusti, na Matia. ²⁴ Balipepele no kulanda ati, "Mwebo, mwe Shikulu, mulishibe imitima ya bantu bonse, eco sokololeni ni wisa pali aba babili umo uo mwasala ²⁵ ukusenda icende muli ubu bupyungishi no butumishi uko Yuda afumine ukuya ku ncende yakwe." ²⁶ Baliposele utupendwilo palwa bena, kabili na kapendwilo kaponene kuli Matia, kabili alipendelwe pamo na batumwa ikumi na umo.