¹ Webo eco, we mwana wandi, koseleshiwa mu kusesaminwa ukwaba muli Kristu Yesu. ² Ifintu wa umfwile kuli nebo munte ishingi, ufipele ku bantu ba cishinka abenga sambilisha bambi nabo. ³ Culila pamo nanebo ngo mushilika wa kwa Kristu Yesu. ⁴ Takuli mushilika apyunga ilyo na tanganana mu bwikalo buno, pakwebati asekeshe umukalamba wa milimo. ⁵ Kabili, umfwa umo akocimfyanya mulubilo, tafwikwa cilongwe kano fye acimfyanisha mu mafunde . ⁶ Caliba icikankala ku mulimi uubombesha umulimo ukupoka icakaniko ca fisabo ukubalilapo. ⁷ Tontonkanyapo pafyo nkolanda, pantu Shikulu ali no kukupa ubwishibilo mu fintu fyonse. ⁸ Ibukisha Yesu Kristu, uwa mu bufyashi bwa kwa Dabidi, uwa bushiwe ukufuma ku bafwa. Ici cakulingana ne mbila nsuma yandi, ⁹ iyo nculilamo na kukufika ku kukakwa ne munyololo kubati ni kepaya. Lelo icebo cakwa Lesa ta cakakwa. ¹⁰ Eco nshipikisha ifintu fyonse pa mulandu wa basalwa, pakwebati nabo bakwate ipusukilo ilyaba muli Kristu Yesu, pamo no bukata bwa muyayaya. ¹¹ Ici cebo ca cishinka: "umfwa twalifwile pamo nankwe, tuli no kuba no mweo pamo nankwe. ¹² Umfwa twashipikisha, tukateka bufumu pamo nankwe. Umfwa twamukana, na ena akatukana. ¹³ Umfwa tatuli abacishinka, ena abelelela uwa cishinka, pantu tekuti aikane umwine. ¹⁴ Konkanyenipo ukubebukisha pali ifi fintu. Basokeni ku menso ya kwa Lesa ukukanakansanina pa fyebo; icishafwa kantu kabili ciwisha fye abako umfwa. ¹⁵ Cincila ku kuipela we mwine kuli Lesa nga umo uwasuminishiwa, ngo mubomfi uutakwata mulandu wakumfwilapo insoni, uusambilisha icebo ca cishinka mukulungika. ¹⁶ Taluka ukubwabwata no kulanda kwa fye, ukutungulula fye sana mukukana pepa. ¹⁷ Ukulanda kwabo kukasabankana kubati cipwalonda. Bamo muli abo ni Humenai na Filete, ¹⁸ abaya mu kuluba ukufuma kucine. Balanda ati ukubuka ku bafwa kwali citika kale, kabili balonaula ne citetekelo ca bamo. ¹⁹ Ukuba kwena, umufula wakukosa uwakwa Lesa walikalilila. Uli ne ca kakatikwapo: "Shikulu alishiba abo abakwe " na " onse uulumbula ishina lya kwa Shikulu afumeko ku bubi." ²⁰ Mu ng' anda iikankala tamwaba fye ifipe fya golide ne fya silfere. Lelo mwaliba ne fipe ifya fimuti ne fye bumba. Fimo fya mulimo mu cinshi, na fimo tefya mulimo wa mucinshi. ²¹ Umfwa umo aisangulula umwine ukufuma muli ifi ifyabula umucinshi, akaba icipe ca mucinshi. Alishishiwe, uwa mulimo kuli Shikulu, kabili icapekanishiwa ku mulilo wabune. ²² Fulumukako ku lunkumbwa lwa bulumendo. Konkelela ubulungami, icitetekelo, ukutemwa, no umutende nabo abeta kuli Shikulu ku mitima iyakusanguluka. ²³ Lelo kana amepusho ya buwelewele no bututu. Walishiba ukwebati ya fyala fye ifikansa. ²⁴ Umubomfi wa kwa Shikulu talwa. Lelo afwile ukuba uwa mutembo kuli bonse, uwaishiba ukusambilisha, no kutekanya, ²⁵ ukulungika abakomucusha no mutembo. Limbi Lesa kuti abapela ukulapila ku kwishiba icine. ²⁶ Kabili bengaikakula ukufuma mu citeyo kabili no kusha iciteyo ca kwa kasebanya, panuma ya kwikatwa kuli ena ku kufwaya kwa kwe.