¹ Paulo, umutumwa wa kwa Kristu Yesu ukupitila mu bufwayo bwa kwa Lesa, Umwabela icilayo ca mweo icaba muli Kristu Yesu, ² kuli Timote, umwana uwatemwikwa: Ukusenaminwa, uluse, no mutende ukufuma kuli Lesa Shifwe na Kristu Yesu Shikulwifwe. ³ Nkototela Lesa, uo nebo mpyungila ukufuma ku fikolwe fyandi, na kampingu wakusanguluka, ifyo nebo natwalilila ukukwibukisha webo mu mapepo yandi ubushiku na kasuba. ⁴ Ifyo nkoibukisha filamba fyobe, nebo nkofuluka ukukumona webo, ukwebati nebo njisulemo ne nsansa. ⁵ Nebo ndibukishiwe palwa citetekelo cobe ica cishinka, ico icaikele pa kwamba muli nokokulu Loisi na muli noko Yunike, kabili nebo ndishininkishe ukwebati cilikele na muli webo. ⁶ Neci eco nebo nkokwibukishisha webo kwebati usanike ica bupe ca kwa Lesa ico cili mu webo ukupitila mukubikwapo kwa ndupi shandi. ⁷ Ico Lesa tatupele mupashi wa bu camwenso, lelo uwa maka no kutemwa kabili uwa kuipindulula. ⁸ Eco wilakuba na nsoni pa bunte bwa kwa Shikulwifwe, nangu kuli nebo, Paulo, umufungwa wakwe. Lelo, ulekukumako mukuculila imbila nsuma umwabela maka yakwa Lesa, ⁹ uwa tupusushe fwebo kabili alitwitile fwebo no bwite bwa mushilo. Ena alicitile fi, temwabela milimo yesu, lelo umwabela ipange lyakwe no kusenaminwa, ifyo apele kuli fwebo muli Kristu Yesu libe inshita tashilaswa kutendeka. ¹⁰ Lelo nomba ipusukilo lya kwa Lesa lilisokolwelwe pa kumoneka kwa mupusushi wesu Kristu Yesu, uyo uwabika impela ku mfwa kabili aliletele umweo uushipela ku lubuto ukupitila mu mbila nsuma. ¹¹ Pa mulandu wa ici, nebo nalisontelwe ukuba kashimika, umutumwa, kabili kasambilisha. ¹² Eco nipali uyu mulandu nandi wine nkocula nefi fintu. Lelo ntali na nsoni, ico nebo ndimwishibe ena uyo nebo nasuminamo. Nebo ndishininkishe ukwebati ena alina maka yakusunga ico nebo nasekesha kuli ena ukufikafye napali bulya bushiku. ¹³ Ulame icilangililo ca fyebo fyacine ifyo webo waumfwile ukufuma kuli nebo, ne citetekelo no kutemwa ifyo fyaba muli Kristu Yesu. ¹⁴ Icintu ca bune ico Lesa asekeshe kuli webo, ucilinde ukupitila mu Mupashi wa Mushilo, uyo waikala muli fwebo. ¹⁵ Webo ulishibile ci, ukwebati bonse balya abakoikela mu Asia balyalukile ukufuma kuli nebo. Bamo muli ili bumba ni Fugele na Hermogene. ¹⁶ Shikulu engalanga uluse ku ba ng' anda ya kwa Onesifore, ico ena ilingifye alimpuputwile nebo kabili tali na nsoni ku munyololo wandi. ¹⁷ Lelo, ulo ena ali mu Roma, alimfwailishe nebo, kabili alinsangile. ¹⁸ Shikulu enga pela kuli ena ukusanga uluse ukufuma kuli ena pali bulya bushiku. Imisango yonse iyo angafwililemo mu Ephesus, webo ulishibile bwino sana.