¹ Ishina iliksuma lyalilingba ukusala ukucila ifyuma ifingi kabili umucinshi waliwama ukucila silfere na golide. ² Umukankala no muntu umupina bakwatafye icintu cimo cine icapalana----- Yahweh ewabumba aba bonse. ³ Uwamano ena alamona ubwafya no kufisama umwine eka, nomba uwabulwa amano aitwalafye mukwangaika pamulandu waici. ⁴ Icilambu cakuicefya no kutina Yahweh fyuma, ubucindami, no bumi. ⁵ Imyanga ne nkose fili munshila umupita umubifi; Uyo onse ulonda ubumi bwakwe alabusungila ukutali ukufuma kuli bena. ⁶ Sambilisha umwaice inshila intu afwile ukwendelamo, kabili nangula akota takafumemo. ⁷ Umuntu umukankala euteka umuntu umupina kabili no ukongola alaba umusha kuli uyo akongolako. ⁸ uutanda ulufyengo ali no kusepa ubwafya kabilik inkonto ya cipyu cakwe ili nokonaulwa. ⁹ Uyo uli na menso yaluse ena ali no kupalwa, pantu alakana icakulya cakwe nabalanda. ¹⁰ Tamfisha ukutali uwakapuni, kabilik epakuti peeba ulubuli; ifikansa ne nsele fili nokutalala. ¹¹ Uyo uwatemwa umutima uwakaele kabili uyo uulanda ne shiwi lya citeete, euli nokuba ni cibusa wa mfumu. ¹² Amenso yakwa Yahweh eya sunga amano, nomba alapasa amashiwi yaushili wacishinka. ¹³ Umuntuj umunang'anda alanda ati, ''Mu musebo muli inkalamu! Nga nafumina panse kuti ya njipaya.'' ¹⁴ Akanwa ka mu cende cikulo icashika; icipyu cakwa Yahweh cifulilwa uyo uwaponenamo. ¹⁵ Ukutumpa nga kwa kakatila kumutima wa mwaice, nomba ubwembya bwakumutumpulula bwena kuti bwa kutalushako. ¹⁶ Uyo uufyenga umuntu umupina pakuti afushe ifyuma fyakwe, nangula uupeela umuntu umukankala, ali no kulola kubupiina. ¹⁷ Teyaamikako ukutwi kobe no kumfwa amashiwi aya ba mano kubikako umutima obe ku kwishiba kwandi, ¹⁸ Pantu cili no kuwama nga cakuti ukasungila mu mutima obe, nga cakweba ati fyonse fileba pamulomo yobe. ¹⁹ Elyo ukucetekela kobe kuleba muli Yahweh, nebo ndesambilisha bena kuli webo ilelo nangulafye ni webo wine. ²⁰ Bushe nebo nshakulembelapo insoselo amakumi yatatu isha kukulangilila amano, ²¹ aya kukusambilisha ifya cishinka na mashiwi aya cine, elyo uli no kupela ubwasuko bwa cshinka kuli abo abalekutuma? ²² Wilapoka umupina pantu ena mupina, angu ukucusha abalekabila pa mwinshi, ²³ Pantu Yahweh ali no kubalubulwilako umulandu wabo, kabili ali no kupoka ubumi bwa abo abapokolola bena. ²⁴ Wilapanga bucibusa nabantu aba kwata icifukushi, kabili wilaba pamo no muntu uufulwa bwangu, ²⁵ nangula limbi kuti wasambililako imibele yabo, no kuibika we mwine mulukose. ²⁶ Wilasansha pa bantu abaposhanya mu minwe pakupanga ubulayo, nangula ukuibika injiminikshi yaulekongola ukuba icikatilo ca misha. ²⁷ Pantu nga cakuti taukwete inshila ya kuti ulipilemo, bushe tekuti besebapoke no bulili bobe bantu ulalapo? ²⁸ Wilasesha umumpaka wakale uwebwe ulya untu ifikolwe fyobe fyapakwile. ²⁹ Bushe naumona umuntu uwacenjela mu mulimo wakwe? Euli no kwiminina ku menso ya mfumu; ena takeminine ku menso bantu yawe yawe awe.