¹ Uyo uwatemwa ucenjeshiwa alitemwa ukwishiba, nomba umo usula ukulololwa alitumpa. ² Yahweh apela ukusensmina ku muntu musuma, nomba alapingula umuntu upanga amatontonkanyo ayabi. ³ Umuntu takabelele mu bubi, nomba abantu abalungama umushila tawakanukulwe. ⁴ Umukashi uwasalapuka alenga umulume ubukata, nomba uleto musebanya aba ngo bulwele bwa cilonda mu mafupa. ⁵ Amatontonkanyo ya mulungami yalilungama, nomba ukulangilila kwa babipa kwabufi. ⁶ Amashiwi yabantu babipa ni nkose shipembelela ukusumya mulopa, nomba amashiwi yatambalala ya labapokolola. ⁷ Abantu ababipa nga baloba balalobelela, nomba ing'anda ya walungama umuntu ikeminina. ⁸ Umuntu ukatashiwi ubusuma bwa ku milomo nomba wa mutima wabipa alasulwa. ⁹ Musuma umuntu uwaba panshi uwaikwatila umubomfi ukucila umo uwa icindamika umwine nomba abulwa ifya kulya. ¹⁰ Umuntu uwalungama alasakamana pakukabila kwa fitekwa, nomba ubulanda bwa babipa buluku. ¹¹ Naumo ulebombesha mu calo takabulwe ica kulya nomba uyo onse ukonkelesha mufyafye fyabulo kubomba tatontonkanya. ¹² Umuntu wabipa alakabila ifya kwatwa kubabipa, nomba umushila wa walungama ulasekesha. ¹³ No muntu wabipa alekatwa mu fifuma mu milomo, nomba umuntu walungama alafuma mu bwafya. ¹⁴ Ififuma mu fisabo fya mashiwi ya muntu mwisula ifintu ifisuma, imilomo ibombwa ku minwe ibwelela kuli wena. ¹⁵ Inshila ya munangwa ilamu wamina ku menso yakwe, nomba umuntu wasalapuka amfwa ku kucenjeshiwa. ¹⁶ Umunangwa alangisha ubukali pa bushiku bwine bulya, nomba usulako nokusaluka kubokusuma. ¹⁷ Umo alanda icishinka alande caololoka, nomba kambone wabufi, alabepa. ¹⁸ Amashiwi ya umo ulanda bwangu bwangu yaba kwati lupanga, nomba ululimi lwa wasalapuka lupelo bundapishi. ¹⁹ Fya kumilomo ya cishinka filatwalilila, nomba ululimi ulubepa lwabafye lwa kupelela. ²⁰ Ifyelenganishiwa mu mutima iya batontonkanya mu kupango bubi, nomba ukusamwa kufuma kubapandilila pamutende. ²¹ Icibi tacakese pa walungama, nomba ababipa bakesulamo ubucushi. ²² Imilomo yabufi yamuselu kuli Yahweh, nomba abo abekalila mu cishinka batetekela balamusansamusha. ²³ Umuntu wasalapuka tafisulula ukwishiba kwakwe, nomba umutima wa munangwa ufumya ubunangwa. ²⁴ Ukuboko kwa bacincila ku kateka, nomba abantu abanang'ani bapaticishiwa mu kubomba. ²⁵ Ukusakamikwa kwa mutima wa muntu ula mufininina panshi, nomba ubusuma bwa mashiwi bulenga ukusamwa. ²⁶ Umuntu uwalungama alalangwa kubanankwe, nomba inshila yababifi ibatwala mu kulubanta. ²⁷ Abantu abanang'ani tabasowelesha ubwangalo nomba ku muntu wakalabomba akabowanonka pe sonde. ²⁸ Uyo wendela mu nshila yawama asanga umweo no wenda munshila ilya takafwe.