¹ Mu matololo ya Sinai mu mweshi wakubalilapo, mu mwaka walenga bubili apo abena Israeli bafumine mu calo ca Egupto, Yawe aebele Mose ati, ² “Uleke abena Israeli basefye Ipasaka, inshikunkulu ya Cakucilila, pa nshita yapimwa, ³ Mukasefye pa nshita iyalinga pa bushiku bwalenga ikumi limo na shine mu mweshi wine uyu, ukutendekafye lilya akasuba kawa. Mukakonke amafunde ne fipope fya pa nshikunkulu ye Pasaka.” ⁴ Kanshi Mose epakweba abantu ukuti basefye inshikunkulu ye Pasaka. ⁵ Abena Israeli epakusefya inshikunkulu ye Pasaka mu matololo ya Sinai lilya akasuba kawa, pa bushiku bwalenga ikumi limo na shine mu mweshi wakubalilapo. Abena Israeli bacitilefye fyonse ngefyo Yawe akonkomeshe Mose. ⁶ Lelo abaume bamo tabasefesheko Ipasaka pali ubo bushiku pantu bali abakowela ico bakumishe ku citumbi ca muntu. ⁷ Kanshi abo bantu epakuya kuli Mose na Aroni pa bushiku bwine bulya no kumweba abati, “Ifwe tuli abakowela pantu natukumya ku citumbi ca muntu, nomba bushe cinshi batulesesha ukutuula umutuulo kuli Yawe pamo na bena Israeli banensu pa nshita yapimwa?” ⁸ Mose abasuka ati, “Pembeleni muleke ŋumfwe ifyo Yawe alalanda pali imwe.” ⁹ Elyo Yawe aebele Mose ati, ¹⁰ “Eba abena Israeli ati, umo pali imwe nangu pa bana benu nga aikowesha ico akumishe ku citumbi ca muntu, nangu ico ali kumbi pa bulendo, kuti nalyo line basefya inshikunkulu yakwa Yawe iye Pasaka. ¹¹ Mu mweshi wabubili emo bafwile ukusefya pa bushiku bwalenga ikumi limo na shine cilya akasuba kawa. Bali nokulya umwana wa mpaanga, kumo ne mikate ishatutumuka ne misalu iyalula. ¹² Beshapo nelyo kamo akakuti kafika ku ulucelo, nangu ukutoba amafupa ya nama tabafwile kutoba iyoo. Ilyo balesefya inshikunkulu ye Pasaka bakonke amafunde yonsefye. ¹³ Nomba umuntu nga ali uwasanguluka, kabili tali pa bulendo, lelo akaanafye ukusefya inshikunkulu ye Pasaka, uyo muntu wakutamfyafye mu bantu bandi, pantu akaana ukutuula umutuulo kuli Yawe pa nshita yapimwa. Uyo muntu ailetelelafye umwine ku bubifi bwakwe. ¹⁴ Ngo mwinafyalo uo mwikala nankwe nao alefwaya ukusefyako inshikunkulu yakwa Yawe iye Pasaka, nasefyeko, lelo akonke amafunde ne fipope fya nshikunkulu yonsefye. Amafunde yakukonka mukakwate yamo yene ku muntu onse, nangu abe umwinafyalo nangu umukaya.” ¹⁵ Ubushiku Itenti lyakwa Lesa ilya Cipangano lyapwile ukwimikwa, ikumbi lyaishile likupa. Ukufuma icungulo ukufika ulucelo, ikumbi lyakupile Itenti lyalemoneka ngo mulilo. ¹⁶ Efyo kanshi catwalilile ukuba, akasuba ikumbi lyalelikupa elyo bushiku lyalemoneka ngo mulilo. ¹⁷ Lyonsefye ilyo ikumbi lyaima pe Tenti lyakwa Lesa, abena Israeli nabo balefuma pali ilya nkambi, kabili apo ikumbi lyaiminina, nabo epo bacita inkambi. ¹⁸ Abena Israeli balekuuka pa nkambi ilyo Yawe abeba ukukuuka, kabili ilyo abeba ukucita inkambi balecita. Tabalefuma pa nkambi ikumbi nga nalikupa Itenti lyakwa Lesa. ¹⁹ Ikumbi nga lyaikala pe Tenti lyakwa Lesa pa nshita itali, abena Israeli nabo baleikalafye pali iyo nkambi mukunakila ifyo Yawe abakonkomeshe. ²⁰ Limo limo ikumbi lyaleikala pamulu we Tenti lyakwa Lesa inshiku ishinonofye. Yawe nga abakonkomesha ukuti bacite inkambi ninshi kucita, elyo kabili nga atila bafume pa nkambi ninshi kufumapo. ²¹ Inshita shimo ikumbi lyaleikalafye ukufuma icungulo ukufika ulucelo, kabili ilyo lyaima mu lucelo nabo baleima ukufuma pali iyo nkambi. Cibe bushiku nangu akasuba, inshita yonse ikumbi lyaima nabo ninshi kwima. ²² Ikumbi nga lyaikala pamulu we Tenti lyakwa Lesa inshiku shibili, nangu umweshi umo, nangu umwaka umo na bena Israeli nabo ninshi baleikala apo pene pa nkambi ukwabula ukuselapo. ²³ Nomba nge kumbi lyaima, nabo ninshi kufumapo. Balenakila ifyo Yawe abeba ukupitila muli Mose. Yawe nga abakonkomesha ukuti bacite inkambi ninshi kucita, elyo kabili nga Yawe abakonkomesha ukufuma pa nkambi ninshi kufumapo.