¹ Yawe aebele Mose ati, ² “Landa na Aroni, umwebe auti, nga wateka ifisaniko cine lubali, ulefiteka apakuti ulubuuto lulesanikila kuntanshi ya cakutekapo ifisaniko.” ³ Aroni nao efyo acitile. Atekele ifisaniko apakuti filesanikila pantanshi ya cakutekapo ifisaniko ngefyo Yawe akonkomeshe Mose. ⁴ Ifi efyo icakutekapo ifisaniko capangilwe. Capangilwe na golide iyo bafulila ku nondo, ukufumafye pamulu apafulilwe amaluba no kufika na panshi. Icakutekapo ifisaniko capangilwe ukulingana nefyo Yawe alangile Mose. ⁵ Yawe aebele Mose ati, ⁶ “Buula abena Levi no kubapatula ku bena Israeli bonse, ubasangulule no kubasangulula. ⁷ Ucite ifi pakubasangulula. Ubasanse amenshi yakubasangulwila, bali nokubeya umubili onse elyo bacape ne fyakufwala fyabo, lyena ninshi baisangulula. ⁸ Babuule iciponti cimo, pamo no mutuulo wa cabunga bwa ŋanu ubwapeleka bwino ubwasanshiwamo amafuta. Elyo babuule ne ciponti cabubili icakutuula umutuulo wakufuta pa bubifi. ⁹ Ukeminike abena Levi pa ntanshi ye Tenti Lyakukumaninamo no kulonganika ulukuta lonse ulwa bena Israeli bonse. ¹⁰ Ukalete abena Levi pa cinso cakwa Yawe, kabili na bena Israeli bakatambalikepo amaboko yabo pa mitwe yabo. ¹¹ Aroni akalubwile abena Levi kuli ine ne Yawe ngo mutuulo wakutambika untu abena Israeli bantuula. Epakuti balebomba imilimo yakwa Yawe. ¹² Abena Levi nga batambalika amaboko pa mitwe ya bacilume wa ŋombe babili, umo ali nokutuulwa kuli Yawe ngo mutuulo wakwelelwa pa bubifi, elyo umbi nao nge lambo lyakoca ilyakufuta pa fyabubifi fya bena Levi. ¹³ “Leka abena Levi beminine pantanshi yakwa Aroni na bana bakwe abaume no kubatuula ngo mutuulo wakutambika kuli Yawe. ¹⁴ Ifi efyo ukapatula abena Levi ukufuma ku bena Israeli bambi, na bena Levi bakaba bandi. ¹⁵ Nga wapwisha ukusangulula abena Levi no kubatuula ngo mutuulo wakutambika, elyo bakaleisa mukubomba umulimo wabo mwi Tenti Lyakukumaninamo ¹⁶ Bena mu bena Israeli ebafwile ukupeelwa onse kuli ine. Nalibacita abandi pa malo ya mabeli ya bana abaume aba mwanakashi onse umwina Israeli. ¹⁷ Ibeli lyonse ilyaume mu Israeli, umuntu nangu inama, lyandi. Ilyo naipeye amabeli yonse mu Egupto, nalibapatwila kuli ne mwine. ¹⁸ Lelo nalibuula abena Levi pa malo ya bana abaume bonse amabeli ya bena Israeli. ¹⁹ Pali bonse abena Israeli napeela abena Levi kuli Aroni na bana bakwe abaume ngo bupe, pakuti balebombela abena Israeli umulimo wa mwi Tenti Lyakukumaninamo. Kabili ebo balebafutilako pa filubo, pakutila icinkunka tacibaponene nga bapalama mupepi ne cifulo camushilo.” ²⁰ Mose, Aroni no lukuta lonse ulwa bena Israeli bonse nabo bacitile abena Levi ngefyo Mose bamukonkomeshe kuli Yawe. Abena Levi nabo baisangulula, bacapa ne fyakufwala fyabo. ²¹ Elyo Aroni abatuula ngo mutuulo wakutambika ku cinso cakwa Yawe. Kabili abafutilako na pa filubo pakuti basangululwe. ²² Panuma ya ifi, abena Levi baingila mwi Tenti Lyakukumaninamo mukubomba imilimo yabo. Abalebangalila ni Aroni na bana bakwe abaume. Ngefyo Yawe akonkomeshe Mose, efyo bacitile abena Levi. ²³ Yawe aebele Mose ati, ²⁴ “Ifi efyo cili nokuba ku bena Levi. Abaume abali ne myaka amakumi yabili na isano no kucilapo ebali nokulabombela mwi Tenti Lyakukumaninamo. ²⁵ Lelo bakalaleka ukubomba imilimo ya mwi Tenti Lyakukumaninamo nga bafisha imyaka amakumi yasano. ²⁶ Nga baleka, kuti baleafwako abena Levi banabo ukulabomba imilimo ya mwi Tenti Lyakukumaninamo, lelo tabafwile ukubomba iyi milimo, bena kwafwakofye. Kanshi ifi efyo wakulaakanya abena Levi imilimo.”