¹ Elyo Balamu asosele ati, “Nkuulileni ifibumbili fya malambo pano cine lubali no kupekanya iŋombe ishilume cine lubali, na basukusuku nabo cine lubali.” ² Balaki acita ifyo Balamu amwebele, elyo bonse babili baleka ilambo lya ŋombe imo imo na sukusuku umo umo pali cila bulambo. ³ Elyo Balamu aeba Balaki ati, “Iminina pano pene mupepi no mutuulo obe uwe lambo lyakoca, ine nalabala mfumepo. Limbi Yawe alefwaya ukunkumanya. Fyonse ifyo aleya njeba ndeisa kwebako.” Kanshi Balamu epakuya pa lupili apashali nelyo kamo. ⁴ Lesa akumana na Balamu, elyo Balamu amweba ati, “Nimpekanya ifibumbili fya malambo cine lubali, na pali cila bulambo nintuulapo ilambo lya ŋombe imo na sukusuku umo.” ⁵ Yawe afunda Balamu amashiwi yakuti aye alande, elyo amweba nokuti, “Bwelelamo kuli Balaki pakuti uye mweba aya mashiwi.” ⁶ Balamu abwelela kuli Balaki, amusanga naiminina mupepi no mutuulo wakwe uwe lambo lyakoca ne ntungulushi sha bena Moabu shonse. ⁷ Balamu epakutampa ukusesema ati, “Balaki imfumu ya bena Moabu eyandeta ukufuma ku Aramu, icalo caba ku mpili sha ku kabanga. Atile ‘Isa undapishisheko Yakobo, isa unduulileko abena Israeli.’ ⁸ Nga ine kuti nalapisha shani abo Lesa ashalapisha? Nga ine kuti naluula shani abo Yawe ashaluula? ⁹ Pa mulu wa mpili apatali ndebamona, ukufuma apasansama ndebalolesha. Namona abantu abekala beka, abashiimona ukuba nga bantu bambi. ¹⁰ Nani engapenda ulukungu lwakwa Yakobo? Nangu nani engapenda iciputulwa calenga fine ica bena Israeli? Lekafye mfwe imfwa ya wakaele, pakuti impela yandi ibe nga bena.” ¹¹ Elyo Balaki aeba Balamu ati, “Cinshi iwe wancitila ine? Ico nkwitile kwisa lapisha abalwani bandi, lelo iwe taucitile nangu cimo. Ico wacitafye kubapaala epela!” ¹² Balamu ayasuka ati, “Ine ndi nokulandafye ifyo Yawe anjeba ukulanda.” ¹³ Kanshi Balaki atile kuli Balamu, “Twende bonse ku ncende imbi uko walaya bamwena. Kanshi walamonafye abanono te bonse iyoo. Kulya kwine eko uleya bandapishishako.” ¹⁴ Amusenda kwibala lya Sofimu, pa mulu wa lupili lwa Pisiga. Akuulapo ne fibumbili fya malambo cine lubali, elyo pali cila bulambo atuulapo cilume wa ŋombe umo na sukusuku umo. ¹⁵ Kabili Balamu aeba Balaki ati, “Imininina pano pene mupepi no mutuulo obe uwe lambo lyakoca, ilyo naya mukumonana na Yawe palya.” ¹⁶ Yawe bakumene na Balamu, amufunda amashiwi ayakuti aye alande, elyo amweba nokuti, “Bwelelamo kuli Balaki pakuti uye mweba aya mashiwi.” ¹⁷ Balamu abwelelemo, asanga Balaki ninshi eminine mupepi no mutuulo wakwe uwe lambo lyakoca ne ntungulushi sha bena Moabu. Balaki aipusha Balamu ati, “Finshi Yawe acilanda?” ¹⁸ Elyo Balamu alanda ubusesemo bwakwe, “Balaki, ima kabili umfwa kuno, umfwa ifyo ndelanda, iwe mwana Sipo. ¹⁹ Lesa te muntu uwakuti abepe, nangu ena taba ngo mwana wa muntu, uwakuti apilibule ifyo apangile. Bushe alalanda kabili afilwa ukubomba? Bushe alalaya kabili afilwa ukufikilisha? ²⁰ Ine nimpokelela icebo cakupaala. Lesa napaala, kanshi ine teti njalule. ²¹ Tamwenemo ishamo muli Yakobo, kabili tasangilemo ububi mu bena Israeli. Yawe Lesa wabo alaba nabo. Eo balumbanya ukuti e Mfumu yabo. ²² Lesa ewabafumya mu calo ca Egupto. Baba na maka nge mboo. ²³ Takuli bwanga bwakulowa Yakobo, nangu ukupendula pa mulandu wa bena Israeli. Nomba bakalasosa pali Yakobo na Israeli abati, ‘Moneni ifyo Lesa acita!’ ²⁴ Aba bantu bema nge nkalamo ikota, Bafukukila nge nkalamo ilume, iyishifwaya kutuusha kanofye yalepaula inama ikete, no kunwa umulopa wayo ipeye.” ²⁵ Elyo Balaki aebele Balamu ati, “Cisuma wibalapisha, nangu ukubapaala iyoo!” ²⁶ Balamu nao ayasuka ati, “Bushe nshakwebele ukuti ine ndi nokucitafye ifyo Yawe asosa?” ²⁷ Elyo Balaki aebele Balamu ati, “Isa, leka nkutwale ku ncende imbi. Nalimo kwena calasansamusha Lesa pakuti akusuminishe ukundapishishako abena Israeli ukufuma kuli ilya ncende.” ²⁸ Elyo Balaki asenda Balamu amutwala pa mulu wa lupili lwa Peori, ukulungatanafye ne ciswebebe. ²⁹ Balamu aeba Balaki ati, “Nkuulilako ifibumbili fya malambo cine lubali pano pene, mpekanishishako ne ŋombe ishilume cine lubali na basukusuku nabo cine lubali.” ³⁰ Balaki nao acitila umo mwine Balamu asosele. Atuula ilambo lya ŋombe ilume imo na sukusuku umo pali cila bulambo.