¹ Elyo abena Israeli bakonkenyepo ulwendo lwabo baya ku mawanga ya ku Moabu, bacitako inkambi ukukonka ululamba lwa mumana wa Yordani, ukulolenkana na Yeriko. ² Nomba Balaki mwana Sipori amona ifyo abena Israeli bacitile abena Amoli. ³ Abena Moabu baikatwa no mwenso ukalamba pantu abena Israeli balifulishe. Kanshi abena Moabu balatiina abena Israeli nganshi. ⁴ Abena Moabu baeba intungulushi sha bena Midiani abati, “Uyu cinkupiti wa bantu, alaonaula ifintu fyonse ifyo twakwata, nga filya iŋombe ilume ifulaula icani mu mpanga.” Kanshi Balaki mwana Sipori uwali mfumu ya bena Moabu pa nshita ilya, ⁵ atuma inkombe shakuya ita Balamu mwana Beori uwaleikala mu Peto, mupepi no mumana wa Yufurate, uko Balamu afyalilwe. Balaki ati, “Umutundu wa bantu nawisa ukufuma ku Egupto, ukumene mpanga yonse pano calo lino kabili bekele mupepi na ine. ⁶ Nomba isa undapishisheko aba bantu pantu nabancila amaka. Lyena nalimo ine kuti nabacimfya no kubafulumuna mu calo. ⁷ Intungulushi sha bena Moabu na bena Midiani shaima, shaya nashisenda ne fyakulipila pakubuka. Ilyo shafika kuli Balamu, shamweba ifyo Balaki asosele. ⁸ Nao Balamu asheba ati, “Sendameni kuno, elyo mailo nkamweba ifyo Yawe alenjeba.” Kanshi intungulushi sha bena Moabu epakwikala na Balamu ⁹ Lesa aishile kuli Balamu no kumwipusha ati, “Bushe aba bantu uli nabo ni bani?” Nao ayasuka Lesa ati, ¹⁰ “Balaki mwana Sipori, imfumu ya ku Moabu euntumine amashiwi yakuti, ‘Umutundu wa bantu nawisa ukufuma ku Egupto, bakumene mpanga yonse pano calo. ¹¹ Nomba isa ubandapishisheko. Lyena nalimo ine kuti nabacimfya, nabafulumuna na mu calo cesu.’” ¹² Lelo Lesa aeba Balamu ati, “Iwe wiesha kuya nabo. Kabili tecakwesha ukutipwila abo bantu pantu balipaalwa.” ¹³ Ulucelo lwakonkapo Balamu ashibuka, aya eba intungulushi shakwa Balaki ati, “Bwekelenimo ku calo cenu, pantu Yawe nandesha ukuti tuleya bonse.” ¹⁴ Kanshi intungulushi sha bena Moabu epakubwelelamo, shaya eba Balaki ashiti, “Balamu nakaana ukwisa na ifwe.” ¹⁵ Elyo Balaki atuma na shimbi intungulushi ishingi nganshi, kabili ishicindami ukucila ishantanshi. ¹⁶ Shaya kuli Balamu, shamweba ashiti, “Ifi efyo Balaki mwana Sipori asosa aleti, wileka nangu cimo cikuleshe ukwisa kuli ine. ¹⁷ Pantu nkakulambula ifikankala, kabili nkacita ne fintu fyonse ukanjeba. Napapata isa undapishisheko aba bantu.” ¹⁸ Lelo Balamu abasuka ati, “Nangufye Balaki engampeela isano lyakwe ilyaisulamo silifa na golide, teti ncite icintu nelyo cimo, icikulu nangu icinono, ukucila pafyo Yawe Lesa wandi ankonkomesha. ¹⁹ Nomba na imwe bene sendameni ngefyo abanenu bacitile, pakuti ŋumfwilepo fimbi ifyo Yawe alenjeba.” ²⁰ Bulya bushiku bwine, Yawe aishile kuli Balamu amweba ati, “Apo aba bantu beshile mukukwita, ima kabiye nabo, lelo ulecitafye ifyo nakweba.” ²¹ Ulucelo Balamu anina punda wakwe, akonka ne ntungulushi sha bena Moabu. Lelo Lesa alifulilwe nganshi ico akonkele. ²² Na malaika wakwa Yawe aisa iminina mu musebo pakuti amuleshe ukupita. Balamu aninine pali punda wakwe, na babomfi bakwe babili nabamushindika. ²³ Cilyafye punda amona malaika wakwa Yawe eminine mu musebo, ninshi naikata ulupanga mu minwe, afuma mu musebo no kuya mu mpanga. Balamu ena alauma punda pakuti abwelele pa musebo. ²⁴ Elyo malaika wakwa Yawe aya iminina apo inshila yacepele, pakati ka mabala ya myangashi ayali na malinga ya mabwe konse konse. ²⁵ Ilyo punda amona malaika wakwa Yawe, aikusa kwilinga, afyenenkesha no lukasa lwakwa Balamu kwilinga. Balamu nao abwekeshapo ukuma punda. ²⁶ Elyo malaika wakwa Yawe aselela pantanshi apacepeshe, apashali ne ncende ya kwalukilapo ku kulyo nangu ku kuso. ²⁷ Ilyo punda amona malaika wakwa Yawe, alala panshi mwisamba lyakwa Balamu. Nao Balamu afulwa nganshi, alafupaula punda ne nkonto yakwe. ²⁸ Kanshi Yawe epakwisula akanwa kakwa punda, nao asosa kuli Balamu ati, “Bushe cinshi ico ine nkucitile pakuti ungume ifi imiku itatu?” Balamu epakwasuka punda ati, ²⁹ “Pantu iwe ulentumfya! Nkwata ulupanga mu minwe yandi nga nakwipaya nombalinefye.” ³⁰ Punda aeba Balamu ati, “Ine bushe nshili punda obe, uo iwe uninapo ukushinta na lelo? Bushe naliba mu musango wakucitapo ifi nacita kuli iwe?” Nao atile, “Iyoo.” ³¹ Elyo Yawe ashibula Balamu amenso no kuleka amone. Elyo amona malaika wakwa Yawe naiminina mu musebo no lupanga mu minwe. Balamu akontama, awa na panshi ubukupeme. ³² Malaika wakwa Yawe aipusha Balamu ati, “Bushe cinshi ico waumina ifi punda obe imiku itatu? Ine nine naisa kuno kukukulesha ukuya, pantu inshila yobe tailungeme pa cinso candi. ³³ Punda ena acimona, ayaluluka mukutiina ine imiku yonse iyi itatu. Akaana kwaluluka, ine cine cine nga ninkwipaya, punda wena nga nashala.” ³⁴ Balamu aeba malaika wakwa Yawe ati, “Ine nimbifya. Nshacishiba ukuti nimwe mwiminine mu musebo pakundesha ukuya. Nomba imwe nga tamulefwaya ukuti njeko, nalabwelelamofye.” ³⁵ Malaika wakwa Yawe aeba Balamu ati, “Akuya na bantu, nomba wikasosa kantu nelyo kamo, kanofye ico nakweba ukusosa.” Awe Balamu epakuya ne ntungulushi shakwa Balaki isho amutumine ³⁶ Ilyo Balaki aumfwile ukuti Balamu ali mu nshila, aima amukonkela ku musumba wa bena Moabu, uwabela mu lulamba lwa mumana wa Alinoni, pa mpela ya mupaka wa calo cakwe. ³⁷ Balaki aeba Balamu ati, “Bushe nshatumine amashiwi ayakukwita pakuti wise bwangu? Cinshi tawaishile uko ndi? Bushe cine cine teti nkulambule?” ³⁸ Balamu amwasuka ati, “Ala kwena nomba ninjisa. Bushe kuti nalandafye icili conse? Ine nakulalandafye ifyo Lesa anjeba ukulanda.” ³⁹ Elyo Balamu na Balaki baima baya ku musumba wa Kiriati Husoti. ⁴⁰ Kanshi eko Balaki alekela amalambo ya ŋombe ne mpaanga, apeelako na Balamu ne ntungulushi isho ali nasho. ⁴¹ Bwaisaca ulucelo Balaki alisendele Balamu ku Bamoti Baali, uko amwene bamo abena Israeli.