¹ Ulukuta lonse lwa bena Israeli lwafikile mu matololo ya Sini mu mweshi wantanshi, bakuula ne nkambi pa Kadeshi epo baikala. Kulya kwine ekwafwila na Miriamu no kushiikwa eko ashiikwa. ² Nomba kulya kuntu takwali menshi yakunwa. Elyo ulukuta lwalongana mukuilishanya pali Mose na Aroni. ³ Awe balaumanya Mose abati, “Kanshi nga caliwemepo ukufwila pamo na bamunyinefwe abafwile pa cinso cakwa Yawe! ⁴ Bushe cinshi mwaletele ibumba lya bantu bakwa Yawe muno mu matololo, ukuti emo ifwe pamo ne fitekwa fyesu twise tufwile? ⁵ Bushe cinshi mwatufumisha mu calo ca Egupto no kutuleta muli ino ncende iyabipisha ifi? Muno tamwaba ŋanu na makunyu ne fitwalo fya myangashi na mateke. Kabili na menshi yakunwa nayo tamuli!” ⁶ Elyo Mose na Aroni epakufuma pebumba baya pa mwinshi we Tenti Lyakukumaninamo, bawa panshi ubukupeme, elyo ubucindami bwakwa Yawe bwamonekela kuli bena. ⁷ Yawe aebele Mose ati, ⁸ “Buula inkonto, iwe na munonko Aroni mulonganike no lukuta lonse pamo. Pa menso yabo ulande ku cilibwe cilya, naco calafumfumuna amenshi. Walafumya amenshi mu cilibwe pakuti ulukuta lunwe pamo ne fitekwa fyabo.” ⁹ Kanshi Mose epakubuula inkonto iyali pa cinso cakwa Yawe ngefyo amukonkomeshe. ¹⁰ Mose na Aroni balonganike ibumba pantanshi ya cilibwe, elyo Mose abeba ati, “Umfweni imwe mwe bacisanguka! Bushe tumufumishe amenshi mu cilibwe ici?” ¹¹ Elyo Mose aimya inkonto mu mulu no kuma pa cilibwe imiku ibili. Amenshi yafumfumuka, no lukuta lwalanwa pamo ne fitekwa fyabo. ¹² Nomba Yawe aebele Mose na Aroni ati, “Pantu tamwacincetekela ukufikapo no kuncindika ngo wamushilo pa cinso ca bena Israeli, imwe tamwakengishe ibumba ili mu calo ico nabalaya ukubapeela.” ¹³ Aya e menshi ya ku Meriba, ku ncende kulya abena Israeli bailishenye pa cinso cakwa Yawe, kulya nao ailangile ukuti wamushilo pakati kabo. ¹⁴ Mose atumine inkombe ku mfumu ya bena Edomu, ukufuma ku Kadeshi, ukuya sosa ati, “Ifi efyo munonko Israeli asosa. Aleti mwalishibafye bwino amacushi yonse ayo twapitamo. ¹⁵ Ifikolwe fyesu fyaile ku Egupto uko twaikele imyaka iyingi. Abena Egupto balecusha ifikolwe fyesu, nefwe bene baletucusha. ¹⁶ Ilyo na ifwe twakuutile kuli Yawe, nao alyumfwile inkuuta shesu, no kututumina malaika uwakutufumya mu Egupto. Nomba tuli pano pa Kadeshi, umusumba waba mu mupaka wa calo cobe. ¹⁷ Twapapata tusuminisheni tupitekofye mu calo cenu. Ifwe tatwakapite mu filime, nangu mu mabala ya ŋanu, nangu ukunwa amenshi mu cishima icili conse. Tukakonkafye umusebo wa mfumu, ukwabula ukupasukila lwa ku kulyo nangufye lwa ku kuso mpaka tukafume mu calo cenu. ¹⁸ Elyo Edomu abasuka ati, “Tamuli nakupita muno iyoo! Nga mwaesha ukupitamo, ifwe tukema ne fita no kwisa mulwisha ku lupanga.” ¹⁹ Kabili abena Israeli bayaswike abati, “Ala mukwai ifwe tukakonkafye umusebo ukalamba, elyo ifwe nangu ifitekwa fyesu nga fyanwa amenshi yenu mu fishima, ifwe bene ala ninshi tukalipila. Ico tulelombakofye kupita mu calo cenu pa makasa, te cimbi iyoo.” ²⁰ Kabili bayasuka abati, “Tamuli nakupita muno iyoo!” Kanshi Edomu epakubemina ne bumba lya fita ilikalamba kabili ifyamaka nganshi. ²¹ Ico Edomu akaanya ukusuminisha Israeli ukupita mu calo cakwe, Israeli ayalulukako ukufuma kuli bena. ²² Ulukuta lwa bena Israeli lonsefye lwalifumine mu musumba wa Kadeshi no kuya ku lupili lwa Hori. ²³ Elyo Yawe aebele Mose na Aroni pa lupili lwa Hori, mupepi no mupaka wa Edomu, ati, ²⁴ “Aroni ali nokuya lala ukwalala ifikolwe fyakwe. Takengile mu calo napeela abena Israeli, apo bonse imwe babili mwasangukile icebo candi ku menshi ya Meriba. ²⁵ Kanshi senda Aroni no mwana wakwe Eleasa, muye nabo pa mulu wa lupili lwa Hori. ²⁶ Uye fuula Aroni ifyakufwala fya bushimapepo no kufifwika ku mwana wakwe umwaume Eleasa, pantu Aroni ali nokuya lala ukwalala ifikolwe fyakwe. Kabili akafwila kulya kwine.” ²⁷ .”Mose nao acita ifyo Yawe amukonkomeshe. Baya na pa mulu wa lupili lwa Hori, ninshi no lukuta lonse lulemonako. ²⁸ Awe Mose afuula Aroni ifyakufwala fya bushimapepo, afwika no mwana wakwe umwaume Eleasa. Palya pene pa mulu wa lupili epo Aroni afwila no kufwila. ²⁹ Elyo Mose na Eleasa batentemuka ulupili bafumako. Ilyo ulukuta lonse lwateseshe ukuti Aroni nafwa, iŋanda yonse iya bena Israeli yamulooseshe pa nshiku amakumi yatatu.