¹ Yawe aebele Mose na Aroni ati, ² “Ici ecilefwaikwa mwifunde ilyo Yawe akonkomesha. Ebeni abena Israeli ukuleta umusepela wa ŋombe iyikota uwakashika uwabula akalema nangu akabi kabili uushatala ausendapo ikoli. ³ Mupeele kuli Eleasa shimapepo. Ufumishiwe kunse ya nkambi no kuipaya pa menso yakwe. ⁴ Elyo Eleasa shimapepo atumpike umunwe mu mulopa wauko, aukane imiku cine lubali ya kuntanshi ye Tenti Lyakukumaninamo. ⁵ Ilyo Eleasa shimapepo alemonako, boce uyo musepela wa ŋombe kumo kwine ne mpapa no munofu no mulopa ne fya mu mala. ⁶ Shimapepo abuule ulusansu lwa cimuti icalepesha ica keda no tumisambo twa hisopo ne nsalu iyakashika cee, elyo afipose apalepya umusepela wa ŋombe. ⁷ Panuma ya ifyo, shimapepo acape ifyakufwala fyakwe, elyo nokowa na pa mubili wakwe na menshi. Lyena elyo ali nokubwelela ku nkambi. Lelo ali nokuba uwakowela ukufikafye ne cungulo. ⁸ Uyo muntu uuleoca umusepela wa ŋombe nao ali nokucapa ifyakufwala fyakwe, elyo no kowa pa mubili na menshi, kabili nao wine ali nokuba uwakowela ukufikafye ne cungulo ⁹ .Kabili umuntu uwasangululwa akuse imito ya musepela wa ŋombe, no kuya ibika mu ncende iyasanguluka kunse ya nkambi. Eko yakulasungilwa, pakuti ulukuta lwa bena Israeli luleibika mu menshi yakubomfya pakusangulula ifintu. Ici e cakusangulwilako ububifi. ¹⁰ No muntu uwakusa imito ya musepela wa ŋombe, ali nokucapa ifyakufwala fyakwe, kabili nao wine ali uwakowela ukufikafye ne cungulo. Ili likaba lifunde lyamuyayaya kuli bonse abena Israeli na benafyalo abo bakalaikala nabo.” ¹¹ “Uyo onse uwakumya ku citumbi ca muntu uuli onse, akaba uwakowela pa nshiku cine lubali. ¹² Afwile ukuisangulula na menshi pa bushiku bwalenga shitatu no bwalenga cine lubali. Elyo akaba uwasangululwa. Lelo nga taisangulwile pa bushiku bwalenga shitatu no bwalenga cine lubali, akabafye uwakowela. ¹³ Uyo onse uwakumya ku citumbi ca muntu uuli onse, nomba afilwa ukuisangulula, ninshi uyo muntu wakutamfyafye mu bena Israeli pantu akowesha Itenti lyakwa Yawe. Ashala uwakowela pantu tabamusansa amenshi yalya ayakumusangulula. Kanshi ukukowela kwakwe kucili pa mubili wakwe. ¹⁴ “Ili e funde lili nokukonkwa umuntu nga afwila mwi tenti. Uyo onse uwaingila mwi tenti na onse uuli mwi tenti, ali nokuba uwakowela pa nshiku cine lubali. ¹⁵ Kabili icipe conse icili apabula icakukupikapo, ninshi naco cine cili nokuba icakowela. ¹⁶ Onse uuli kunse uwakumya ku muntu baipaila ku lupanga, nangu uwafwafye ku mfwa Lesa, nangu kuli onse uwakumya kwifupa lya muntu, nangu uluputa lwa muntu, akaba uwakowela pa nshiku cine lubali. ¹⁷ Ku muntu uwakowela, babuulepo imito ya ulya musepela wa ŋombe uwakashika bacoca pakufuta pa fyabubifi babike mu nongo elyo betilepo amenshi ayasuma. ¹⁸ Elyo umuntu uwasangululwa abuule utumisambo twa hisopo, atumpike mu menshi no kusansa kwi tenti na ku fipe fyonse, na bantu bonse abalimo. Kabili afwile ukusansa no wakumishe kwifupa lya muntu, nangu ku muntu baipeyefye, nangu ku wafwile imfwa Lesa nangu ku luputa lwa muntu. ¹⁹ Umuntu wasanguluka euli nokusansa uwakowela amenshi pa bushiku bwalenga shitatu na pa bushiku bwalenga cine lubali. Kanshi pa bushiku bwalenga cine lubali bwine amusangulula. Elyo umuntu uulesangululwa afwile ukucapa ifyakufwala fyakwe no kowa mu menshi. Na mu cungulo cine ico ninshi asangululwa. ²⁰ “Lelo umuntu wakowela nga akaana ukuisangulula, uyo muntu wakutamfyafye mwibumba, pantu akowesha icifulo camushilo cakwa Yawe. Apo menshi yakumusangulula tayasanshilwe pa mubili wakwe, ninshi ashala uwakowela. ²¹ Ili e funde lyabo ilyamuyayaya. Umuntu uulesansa amenshi yakusangululwa, nao wine afwile ukucapa ifyakufwala fyakwe. Elyo na onse uwaikata muli ayo menshi yakusangulula, ali nokuba uwakowela ukufikafye ne cungulo. ²² Icintu conse ico uwakowela aikatako, ninshi naco cakowela. Kabili na onse uwakumyako akowela ukufikafye ne cungulo.”