¹ Miriamu na Aroni baleisosha pali Mose pa mulandu wakuupa umwanakashi umwina Kushi, pantu ca cine aupile umwina Kushi. ² Balalanda abati, “Bushe Yawe alandila muli Mose ekafye? Bushe talandila na muli ifwe bene?” Kabili Yawe nao aumfwa ifyo balelanda. ³ Nomba Mose ali umuntu uwafuuka nganshi ukucila abantu bonse mpanga yonse pano isonde lyonse. ⁴ Apopene Yawe aebele Mose, Aroni na Miriamu ati, “Imwe bonse batatu iseni kunse kwi Tenti Lyakukumaninamo.” Elyo bonse batatu baya. ⁵ Elyo Yawe epakwikila mu ntumba ye kumbi pa mwinshi we Tenti Lyakukumaninamo, epo aiminina no kwita Aroni na Miriamu. Ilyo bonse babili baile lwa pantanshi, ⁶ Yawe alabeba ati, “Nomba, umfweni amashiwi yandi! Nga kasesema wakwa Yawe ali pakati kenu, ndaisokolola kuli ena mu fimonwa, ndalanda nankwe mu filoto. ⁷ Nomba caibela ku mubomfi wandi Mose, wena wacishinka mu ŋanda yandi yonse. ⁸ Eico wena pakulanda nankwe tulamonana, tulanda apabuuta tuutu kabili te mu mapinda. Ena alimona ne cata candi ine ne Yawe! Nomba imwe cinshi mushatiinine ukuisosha pa mubomfi wandi Mose?” ⁹ Yawe epakubafulilwa nganshi, kabili afumapo. ¹⁰ Ilyo ikumbi lyafuma pa mulu we Tenti Lyakukumaninamo, Miriamu apo aiminine alwala ifibashi, abuutapo na tuutu ngo bunga bwa mfula. Aroni ati aloleshe Miriamu, amumona ne fibashi. ¹¹ Aroni aeba Mose ati, “We mfumu yandi, napapata, witukanda pantu natubifya mu bupuba bwesu. ¹² Wileka abe nga kapopo kafyalwa mwifumo lyakwa nyina no mubili uwaliwa lubali.” ¹³ Elyo Mose epakulilila kuli Yawe ati, “We Lesa, napapata muposhe!” ¹⁴ Yawe ayaswike ati, “Nga cakuti wishi amufwishile amate pa menso, bushe Miriamu nga tasebene inshiku cine lubali? Kanshi mwisalileni kunse ya nkambi pa nshiku cine lubali, na panuma elyo bakamubweshe.” ¹⁵ Elyo Miriamu baya mwisalila kunse ya nkambi pa nshiku cine lubali, na bena Israeli tabafumine pa nkambi mpaka Miriamu bamubwesha. ¹⁶ Panuma ya ifyo, elyo bafuma ku Haseloti, bayacita inkambi mu matololo ya Parani.