¹ Kabili abantu bailishenye kuli Yawe mu matwi yakwe pa mulandu wa kucula kwabo. Nao Yawe pakumfwa, afulwa nganshi. Elyo umulilo ukufuma kuli Yawe wapile pali bena no koca imbali shimo isha ku mpela ya nkambi. ² Elyo abantu balila mutuule kuli Mose. Nao Mose apepa kuli Yawe, awe no mulilo washima. ³ Eco ilya ncende baitile Tabera, pantu umulilo wafumine kuli Yawe no kuboca. ⁴ Nomba abenafyalo abali mu bena Israeli balafwaisha ifyakulya fimbi. Abena Israeli nabo nakabili balalila abati, “Yangu ukwakumona inama shakulya! ⁵ Twaibukisha isabi twalelya ilishili lyakushita, kabili ne fibimbi, amameloni, amaliki, kanyense na galiki ifyo twalelya. ⁶ Nomba ifwe kwalifita na ku mukoshi, tatumona nangu cimo kanofye maana inshiku shonse!” ⁷ Maana ali nge nseke sha kolianda, kabili alemoneka nge cinyamuti. Abantu baleya mukukusa, elyo bapela nangu ukutwa mwibende. ⁸ Balemwipika mu nongo no kupangako imikate. Mukulya, aleumfwika ngo mukate bapangile ku mafuta ya miolifa. ⁹ Ilyo umume wawila pa nkambi ubushiku, elyo maana nao alepona. ¹⁰ Mose aumfwile uko abantu balelila, cila lupwa pa mwinshi we tenti lyabo. Yawe abafulilwa nganshi, na Mose asakamana apakalamba. ¹¹ . Aipusha Yawe ati, “Bushe cinshi waletela ubu bwafya pa mubomfi obe? Bushe cinshi ncitile icishikusekeshe, pakuti untwike icisendo icakula ifi ica bantu bonse aba? ¹² Bushe nine naimite aba bantu bonse? Bushe nine nabafyele? Nga kanshi cinshi ico ulenjebela ukuti ndebasenda mu maboko yandi, nga filya umuleshi asenda akanya, ku calo ico walaile ifikolwe fyabo no mulapo? ¹³ Bushe ni kwi ningafumya inama shakulisha abantu bonse aba? Balelilila kuli ine abati, ‘Tupeele inama tulye!’ ¹⁴ Ine nekafye teti mbasende abantu bonse aba, icisendo cafinisha kuli ine! Ifi nga efyo ukalancita, ninshi unjipayefye nombaline. ¹⁵ Nga waŋumfwilako uluse, uleke mfwefye, pakuti nipita mu bubi ubwakuti bungonaule.” ¹⁶ Yawe aebele Mose ati, “Nonganikila abakalamba ba bena Israeli amakumi cine lubali, abo waishiba ukuti e ntungulushi sha bantu kabili babomfi babo. Ubalete kwi Tenti Lyakukumaninamo eko bese beminine pamo nobe. ¹⁷ Ine ndeika kukulanda na iwe kulya, kabili ndeisa buulapo amaka yamo aya Mupashi uo nabika pali iwe no kuyabika na pali bena. Ebakulakwafwako ukusenda icisendo ca bantu abo uli nabo, epakuti wilasenda ici cisendo weka. ¹⁸ Kebe abantu auti, muisangulule mwe bene pakuipekanya ku bushiku bwa mailo ilyo mukalya inama. Yawe alyumfwile ilyo mwalilile amuti, ‘Yangu nani aletupeela inama yakulya! Twali bwino mu Egupto!’ Nomba Yawe alamupeela inama iyakuti mulye. ¹⁹ Tamwakalyefye pa bushiku bumo, nangu pa nshiku shibili nangu shisano, nangu pa nshiku ikumi, nangu pa nshiku amakumi yabili, ²⁰ lelo umweshi umo uutuntulu, mpakafye inama shikalefumina na mu myona yenu, kabili shikamutendushe. Pantu imwe namusuula Yawe uwikala na imwe, kabili mwailishenye pa cinso cakwe amuti, ‘Bushe cinshi twafumine ku Egupto?’” ²¹ Mose nao aebele Yawe ati, “Pano ndi pakati ka bantu 600,000 abaleenda pa makasa, elyo na iwe watila uli nokubapeela inama shakulyafye umweshi umo uutuntulu! ²² Bushe kuti baipaya iŋombe, imbushi ne mpaanga ishingabakumana bonse aba? Bushe nga babepaila isabi lyonse lya muli bemba kuti lyabakumana bonse aba?” ²³ Yawe ayaswike Mose ati, “Bushe ukuboko kwakwa Yawe kwalipipisha? Nomba uli nokumona ico nalanda nga cili nokuba icishinka kuli iwe!” ²⁴ Elyo Mose afumine no kuya eba abantu ifyo Yawe amwebele. Akolonganya ne ntungulushi amakumi cine lubali, no kubemika ukushinguluka Itenti. ²⁵ Kanshi Yawe nao aikila mwikumbi no kulanda na Mose, abuula no Mupashi uwali pali Mose, aubika na pa ntungulushi amakumi cine lubali. Ilyo Umupashi waikala pali shena, shalasesema, lelo tashatalile ashisesema nakabili. ²⁶ Lelo kwashele abaume babili mu nkambi, amashina yabo ni Elidadi na Medadi. Nabo bene bali pa mpendwa ya ntungulushi, nomba bena tabaile kwi Tenti. Nomba mulya mwine mu nkambi nabo Umupashi waishile pali bena, no kulasesema balasesema. ²⁷ Umulumendo umo aile ulubilo kukweba Mose ati, “Elidadi na Medadi balesesema mu nkambi.” ²⁸ Elyo Yoshua mwana Nuni, kafwilisha wakwa Mose mu milimo ukufumafye mu bulumendo bwakwe, alanda no kusosa ati, “Mose, we mfumu yandi, baleshefye!” ²⁹ Nao Mose amwasuka ati, “Bushe iwe uli no bufuba palwa ine? Ala kuti natemwa bonse abantu bakwa Yawe baba bakasesema nga Yawe kuti abika Umupashi wakwe pali bena!” ³⁰ Kanshi Mose ne ntungulushi sha bena Israeli epakubwelelamo ku nkambi. ³¹ Elyo Yawe atumine umwela ukufuma pali bemba, wasenda inkwale ukushileta ku nkambi. Shashinguluka inkambi konse konse ukufika napo umuntu engenda ubushiku bumo uku noku, kabili ukuya mu mulu ukufuma pa mushili mita umo. ³² Kanshi akasuba konse no bushiku bonse kabili no bushiku bwakonkelepo abantu baile baleikatafye inkwale. Takwali uwafililwe ukulonganika inkwale ukufika pa cipimo ca bahomeri ikumi limo. Elyo bashikanika na mu mbali ya nkambi ³³ . Ilyo inama shali tashilapwa isho balelya, Yawe alibafulilwe abatumina icikuko icibi nganshi. ³⁴ Nabo epakwinika ilya ncende ishina ukuti ni pa Kibroti Hatafa, pantu palya pene epo bashiikile abantu abalefwa ku cikasha. ³⁵ Ukufuma ku Kibroti Hatafa abena Israeli baile cita inkambi ku Haseloti eko baikala.