¹ Yesu aingile mu bwato, ayabukile kwishilya, kabili aishile ku musumba wakwe. ² Moneni, baletele kuli ena umuntu uwa bulebe nalala pa butanda. Pakumona icicetekelo cabo, Yesu alanda kuwa bulebe, "We mwana, koseleshiwa. Imembu shobe nashelelwa." ³ Moneni, bamo pali bakalemba bayamba ukulanda abene, "Uyu muntu wa miponto." ⁴ Yesu pakwishiba ama tontonkanyo yabo atile, "Cinshi muletontonkanya ububi mu mitima yenu? ⁵ Bushe cinshi icayangukapo, ukutila, "Imembu shobe shaelelwa,' nangu ukutila, 'Ima no kwenda'? ⁶ Lelo pakuti mwishibe ukuti Umwana wa Muntu alikwata insambu pa calo isha kwelela imembu,..." atile kuwa bulebe, "Ima, bula ubutanda bobe, kabili kabiye ku nganda." ⁷ Elyo uyu muntu alimine nokuya ku mwakwe. ⁸ Ilyo amabumba yamwene ici, yalisungwike noku lumbanya Lesa, uwapele insambu shamusango uyu ku bantu. ⁹ Ilyo Yesu alepita filya, amwene umuntu uwe shina lya Mateo naikala pe hema lyakwa kasonkesha wa misonko. Alandile kuli ena, "Nkonka." Alimine noku mukonka. ¹⁰ Ilyo Yesu aikele panshi mukulya mu nganda, moneni, ba kasonkesha ba misonko abengi naba bembu balishele kabili nokulya na Yesu naba sambi bakwe. ¹¹ Ilyo aba Falise bamweni ici, balandile kubasambi bakwe, "Bushe ninshi kasambilisha wenu aliila naba kasonkesha ba misonko naba bembu?" ¹² Ilyo Yesu aumfwile ifi, atile, "Abantu abakosa mu mubili tabakabila shinganga, kanofye abalwele. ¹³ Mufwile mwaya nokuya sambilila umo ici cilolele: 'Nkabila uluse te lambo iyo.' Pantu nshaishile mu kwita abalungami kuku lapila, lelo ababembu." ¹⁴ Elyo abasambi bakwa Yohane baishile kuli ena nokutila, "Cinshi ifwe naba Falise lyonse tufungila, lelo abasambi bobe tabafunga?" ¹⁵ Yesu abebele ati," Bushe abana abaume abele mu kufya kuti bala loosha nashibwinga ali nabo? Lelo inshita ikafika elyo shibwinga baka musenda, kabili lyena bakafunga. ¹⁶ Takwaba umuntu uubika akasalu akapfya pa mwingila uwakale, pantu icikamba cikalepula umwingila, no mwingila ukalepuka nokucilapo. ¹⁷ Kabili takwaba abantu ababula umwangashi uupya noku ubika mu nsupa yamwangashi iya kale. Nga bacita ifi, insupa kutobeka, no mwangashi uketika, ne nsupa ikonaika. Lelo, babika umwangashi uupya mu nsupa iyisuma, na fyonse fibili fika sungwa bwino." ¹⁸ Ilyo Yesu alelanda ifi fintu kuli bena, moneni, intungulushi yaishile nokukontama kuli ena. Yatile, "Umwana wandi umukashana afwafye nomba line, lelo iseni, kabili muyebikapo ukuboko pali ena, nao alaba umutuntulu." ¹⁹ Elyo Yesu alimine kabili amukonka, nabasambi nabo bakonka. ²⁰ Moneni, umwanakashi uwaculile mukufuma umulopa pamyaka ikumi limo naibili aishile kunuma yakwa Yesu kabili aikete na kumpela ya mwingila wakwe . ²¹ Pantu atile mu mutima wakwe ati, "Nga cakuti naikatafye ku nsalu shakwe, ndeba bwino." ²² Lelo Yesu alipilibwilke nokumumona, kabili atile, "We mwana mwanakashi, shipa, icicetekelo cobe cakuposha." Kabil uyu umwanakashi alipolele pali ilya ine inshita. ²³ Ilyo Yesu aishile mu nganda ya ntungulushi, amwene abalelisha imitolilo ne bumba lilepanga icongo icikalamba. ²⁴ Atile, "Kabiyeni, pantu umwana uyu umukashana tafwile, lelo alelefye." Lelo balimusekele mu kumupumya. ²⁵ Ilyo ibumba lyafumishiwe panse, aingile ku muputule no kumwikata ku kuboko, no mukashana aima. ²⁶ Ne mbila ya salangene mu ncende yonse ilya. ²⁷ Ilyo Yesu alepita ukufuma kulya, impofu shibili ishaume shali mukonkele. Bakonkenyepo ukubilikisha baletila, "Tubeleleko uluse, Mwana Dabidi!" ²⁸ Ilyo Yesu aishile mu nganda, abaume impofu ba ishile kuli ena. Yesu atile kuli bena, "Bushe namu cetekela ukuti kuti nacita ici?" Batile kuli ena, "Ee, Shikulu." ²⁹ Elyo Yesu aikete amenso yabo kabili atile, "Lekeni cicitike kuli imwe ukukonka ne cicetekelo cenu," ³⁰ kabili na menso yabo yaliswike. Elyo Yesu abakonkomeshe nokutila, ''Mumone ukutila kwiba nangu umo ukwishiba pali ici." ³¹ Lelo abaume babili baile balesabankanya ilyashi muli ilya ncende yonse. ³² Lilyafye balya bantu babili balefumapofye, moneni, umuntu cibulu uwali ne ngulu ba muletele kuli Yesu. ³³ Ilyo ingulu shatamfishiwamo uyu muntu cibulu alanda. Namabumba yali sunguka nokutila, "Ici tacatala acimonekapo mu Israeli!" ³⁴ Lelo aba Falise balelanda abati, "Nimuli bukateka bwa ngulu, emo afumisha ngulu." ³⁵ Yesu aile mu misumba yonse namu mishi. Akonkenyepo ukusambilisha muma sinagogi yabo, ukushimikila imbila nsuma yabufumu kabili ukuposha amalwele yonse namalwele ayapusana pusana. ³⁶ Ilyo amwene amabumba, abomfwilile inkumbu, pantu bali aba cushiwa kabili aba tompokwa. Bali kwati ni mpanga iyabula kacema. ³⁷ Atile ku basambi bakwe, "Ubulobololo bukalamba, lelo aba bomfi naba cepa. ³⁸ Eico mu kwangufyanya pepeni kuli Shikulu wabu lobololo, pakuti atume ababomfi mu bulobololo bwakwe."