¹ Pali ilya inshita, Herodi kateeka aumfwile ululumbi palwa kwa Yesu. ² Aebele aba bomfi bakwe ati, "Uyu ni Yohane kabatisha; eubukile ku bafwa. Eco aya amaka yalebombela muli ena." ³ Pantu Herodi aikete Yohane, amukaka, amuposa na mu cifungo, pamulandu wakwa Herodia, muka Filipo munyina. ⁴ Pantu Yohane alimwebele ati, "Tefunde ukubula ena ukuba umukashi obe." ⁵ Herodi alefwaya noku mwipaya lelo aletina abantu, ico bena baleti ni kasesema. ⁶ Lelo ilyo ubushiku bwa kufyalwa kwakwa Herodi bwafikile, umukashana mwana Herodia aishile mu lwalala alacinda kabili alisansamwishe Herodi nganshi. ⁷ Mubwasuko, amulaile ne cilayo ukumupela conse eco alalomba. ⁸ Panuma ya kwebwa na nyina, atile, "Mpeleni pano, pa mbale, umutwe wakwa Yohane kabatisha." ⁹ Imfumu yalangulwike apakalamba pakulomba kwakwe, lelo pamulandu wa mulapo na beni abo yali nabo, yakonkomeshe ukuti bacite ico. ¹⁰ Alibatumine kabili baileputula umutwe wakwa Yohane mu cifungo. ¹¹ Elyo bauletele pa mbale bapeela no mukashana nao autwala nakuli nyina. ¹² Elyo abasambi bakwe baishile senda icitumbi baya cishika. Panuma ya ifi, baile shimikilako Yesu. ¹³ Nomba ilyo Yesu aumfwile ifi, alifumineko kulya ukuya no bwato ku ncende ya mutalalila. Ilyo amabumba yaumfwile pali ifi, yalimukonkele pamakasa ukufuma mu misumba. ¹⁴ Elyo Yesu aishile kuli bena no kumona ibumba ilikalamba. Abakwatile inkumbu no kuposha abalwele babo. ¹⁵ Cilya caba icungulo, abasambi baishile kuli ena no kumweba ati, "Kuno tuli ni ku ncende ya mutalalila, kabili ne nshita naipita. Salanganya amabumba, pakuti baye mu mishi no kuya ishitila ifya kulya abene." ¹⁶ Lelo Yesu abebele ati, "Taba lingile ukuya. Imwe bene bapeleni icakulya." ¹⁷ Batile kuli ena, "Ifwe kuno tukwetefye imikate isano ne sabi libili." ¹⁸ Yesu atile, " Fileteni kuli ine." ¹⁹ Elyo Yesu akonkomeshe ibumba ukwikala panshi pa fyani. Abulile imikate isano ne sabi libili. Aloleshe ku mulu, atashishe kabili amokawile imikate kabili apeele na basambi bakwe, kabili na basambi bapeele ibumba. ²⁰ Bonse baliliile no kwikuta. Elyo balongenye utumokaulwa twa fyakulya utwasheleko- baiswishe imiseke ikumi na ibili. ²¹ Abo abaliile bali abaume amakana yasano, ukwabula ukupendelako abanakashi na baice. ²² Apopene acincishe abasambi ukuti bengile mu bwato kabili bamutangilile kwi shilya, elyo umwine ena ashala alesalanganya amabumba. ²³ Panuma yakusalanganya amabuma, aninine ulupili aya eka ku kupepa. Cilya caba icungulo, aali kulya eka. ²⁴ Lelo ubwato bwena ninshi bwafika napakati ka bemba, buletumpaukafye ku mulandu wa matamba, ico bapindilwe no mwela. ²⁵ Lwa ku macaca Yesu aishile uko baali, aleenda pali bemba. ²⁶ Ilyo abasambi bamumwene aleenda pali bemba balicushiwe kabili batile, "Cipuku," kabili balipundile pa mulandu wa mwenso. ²⁷ Lelo Yesu apopene abebele ati, "Beni aba kosa! Nine! Mwitina." ²⁸ Petelo amwaswike no kutila, ''Shikulu, nga nimwe, njebeni njise uko muli nde enda pa menshi." ²⁹ Yesu atile, "Isa." Eico Petelo afumine mubwato nokwenda pa menshi ukuya kuli Yesu. ³⁰ Lelo ilyo Petelo amwene icimwela cakosa, alitiinine. Ilyo atendeke ukwibila, elyo akutile ati, "Wemfumu, mpusushako!" ³¹ Apopene Yesu atambike ukuboko kwakwe, aikete Petelo, kabili amwebele ati "We wa cisumino cinono, cinshi wa citwishikila?" ³² Elyo Yesu na Petelo baingile mu bwato, ne cimwela caleka ukupuupa. ³³ Elyo abasambi abali mu bwato balashinshimuna Yesu abati, "Cine cine uli Mwana wakwa Lesa." ³⁴ Ilyo bayabukile kwi shilya, bafikile mu calo ca Genesaleti. ³⁵ Ilyo abantu bali muli iyi ncende baishibe Yesu, batumine inkombe konse konse ukushinguluka ilya incende, kabili baletele kuli ena bonse abalwele. ³⁶ Bamupapatile ukuti bengekata ku mpela ya mwingila wakwe, kabili na bonse abale ikatako balipolele.