¹ Pali bulya bushiku Yesu afumine mu nganda kabili aya ikala mu lulamba lwa bemba. ² Ibumba ilikalamba nganshi lyaishile longana no ukumushinguluka, eico aninine mubwato kabili aikelemo ilyo ibumba lyonse lyaiminine mu lulamba. ³ Elyo Yesu alandile ifintu ifingi kuli bene mu milumbe. Atile, ''Moneni, umulimi aile mukutanda imbuto. ⁴ Cilya aletanda, shimo imbuto shaponene mu mbali ya nshila, kabili ne fyuni fyaisa kabili no kushilya. ⁵ Na shimbi imbuto shaponene mu mushili wa nsakalabwe, apali umushili uunono. Palyapene shamena pamulandu tapali umushili uwingi. ⁶ Lelo ilyo akasuba, katulile, shali bonsele pantu tashakwete umushila kabili shalyumine nokuma. ⁷ Na shimbi imbuto shaponene mu myunga. Imyunga shalikulile noku shitabilila. ⁸ Shimbi imbuto shaponene mu mushili uusuma kabili shatwele ifisabo, shimo shatwala inseke umwanda umo, shimo amakumi mutanda, kabili shimo amakumi ya tatu. ⁹ Uuli na matwi, lekeni omfwe.'' ¹⁰ Abasambi bakwe baishile kabili batile kuli Yesu, ''Bushe cinshi mulandila kwi bumba mu milumbe?'' ¹¹ Yesu abaswike kabili atile kuli bena, ''Imwe mwalipelwa ukwishiba inkama ya bufumu bwa mu mulu, lelo bena tabapelwa. ¹² Pantu uwakwata akapelelwapo na fimbi, kabili akakwata mu bwingi. Lelo uyo ushakwata baka mupokolola nefyo akwata. ¹³ Uyu e mulandu inandila kuli bena mu milumbe: Nangu balolesha, lelo tabamona; kabili nangu baleumfwa, lelo tabomfwa, nangu ukwiluka. ¹⁴ Kuli bena ubusesemo bwakwa Esaya bwafikilishiwa, ubo butila ati, 'Ukumfwa, imwe mwakulaumfwa, lelo imwe tamwakatale iluka; ukumona, mukamona, lelo tamwakatale amwishiba. ¹⁵ Pantu imitima ya aba bantu yalikutwa, kabili balikosa mukumfwa, kabili bali shibatika amenso. Pantu kuti ba mona na menso yabo kabili baumfwa na matwi yabo, kabili bailuka ne mitima yabo kabili bapilibuka nakabili, kabili ine ninga bondapa.''' ¹⁶ Lelo amenso yenu yalipalwa, pantu yalamona; kabili namatwi yenu pantu yalomfwa. ¹⁷ Icine nalanda kuli imwe ukuti abengi bakasesema na baume abalungami bakabile umumona ifintu ifyo mulemona lelo tabafimwene. Bakabile ukumfwa ifintu ifyo muleumfwa lelo tabafyumfwile. ¹⁸ Kutikeni umwalola umulumbe wamulimi uwa tandile imbuto. ¹⁹ Uyo onse uumfwa kucebo ca bufumu lelo tacilwike, umubifi alesa kabili asompola icatandilwe mu mutima wakwe. Isho embuto ishaponene mu mbali ya nshila. ²⁰ Isho isha tandilwe mu mushili wansakalabwe muntu uufwa ku mbila nsuma kabili palya pene fye acisekelela ne nsansa, ²¹ lelo takwete imishila palwakwe kabili ashipikisha pakashita akanono. Ilyo ukupakaswa nangu amacushi fyaima pamulandu wa mbila nsuma, mukwangu fyanya alawa. ²² Isho isha byelwe mu myunga, ni uyo muntu uumfwa imbila nsuma, lelo isakamika lyamuno calo kabili noku nkonkelela kwa fyuma fyaonaula imbila nsuma, kabili fyafilwa no kutwala ifisabo. ²³ Imbuto isha byelwe mumushili uusuma, ni uyo muntu uufwa imbila nsuma no kuiluka. Alatwala ifisabo, inseke umwanda umo, nashimbi amakumi mutanda, kabili nashimbi mubwingi amakumi ya tatu mu fya byelwe.'' ²⁴ Yesu abomine umulumbe naumbi. Atile, ''Ubufumu bwa mumulu bwaba ngo muntu uwa tandile imbuto ishisuma mwibala lyakwe. ²⁵ Nomba cilya abantu bali mutulo, umulwani wakwe alishile elyo nao atandamo ifyani mukati ka nganu nokuya aya. ²⁶ Ilyo imisungu yamena yasapuka ne filimwa fyauko fyatwala, elyo ifyani nafyo fyamonekela. ²⁷ Ababomfi bamwine we bala baishile kuli ena nokumweba ukuti, 'Shikulu, bushe imwe tembuto ishisuma mwatandile mwibala lyenu? Ninshi nomba lyakwatila ifyani?'' ²⁸ ''Atile kuli bena, 'Mulwani ewacitile ifi.' ''Ababomfi batile kuli ena, 'Bushe mulefyaya tuye nukulamo?' ²⁹ ''Umwine webala atile, Iyo. Pantu ilyo mulenukulamo ifyani, imwe kuti mwanukwilamo ne nganu. ³⁰ Lekeni filekulila pamo pene mpaka inshita yakusombola. Panshita yakusombola nkalanda ku basomboshi,'' Taleni nukuleni ifyani kabili mufikake mumipo noku fyoca, lelo longanyeni inganu mushibike mu butala bwandi.''" ³¹ Elyo Yesu nakabili abomine umulumbe. Atile, '' Ubufumu bwa mu mulu bwaba ngo lubuto lwa lubanga ulo umuntu abulile kabili no kutanda mwibala yakwe. ³² Ishi mbuto eshacepesha pa mbuto shonse. Lelo ilyo wakuula, lulaba ulukalamba pa filimwa fya mwibala. Lulaba icimuti, icakuti ne fyuni fya mulwelele fyaisa kabili no kupangako ifinsa ku misambo ya ciko.'' ³³ Yesu asosele nakabili umulumbe. ''Ubufumu bwa mumulu bwaba nga icitutumushi ico namayo abulile kabili no kusankanya ifipimo fitatu ifyabunga mpaka onse umufuba watutumuka.'' ³⁴ Fyonse ifintu Yesu alandile mu milumbe kuma bumba; kabili talandilepo nangu kamo kuli bena ukwabula umulumbe. ³⁵ Ifi fyali mukuti ifyo fyasoselwe ukupitila mulikasesema fingaba ifya kufikilishiwa, ilyo atile, ''Nkesula akanwa kandi mu milumbe. Nkasosa ifintu ifya fishilwe ukufuma ku mufula we sonde,'' ³⁶ Elyo Yesu afumine pa mabumba kabili aingile mu nganda. Abasambi bakwe baishile kuli ena nokutila,''Tulondolweleko umwalola umulumbe wa fyani fya mwibala.'' ³⁷ Yesu aaswike nokutila, ''Uyo uutanda imbuto shisuma Mwana wa Muntu. ³⁸ Ibala calo; kabili imbuto shisuma, ebana baume ababufumu. Ifyani ebana baume ba mubifi, ³⁹ kabili no mulwani uwabatandile ni kasebanya. Inshita ya kusombola ninshita ya mpela, kabili abasomboshi ni ba malaika. ⁴⁰ Eico, ngefyo ifyani filonganikwa no kocewa mu mulilo, efyo cikaba pa nshita ya mpela. ⁴¹ Umwana wamuntu akatuma ba malaika bakwe, kabili bakakolonganika ukufuma mubufumu bakwe fyonse ifintu ifilenga ukuipununa na bonse abalecita ifya bupulumushi. ⁴² Bakabaposa mwilungu lya mulilo, emukaba ukuloosha kabili nokusumanya ameno. ⁴³ Elyo abantu abalungami bakalabengeshima nga kasuba mu bufumu bwakwa Shibo. Uuli namatwi, na omfwe. ⁴⁴ ''Ubufumu bwa mumulu bwaba nge cuma icaafiswa mwibala. Umuntu ali cisangile noku cifisa. Musansa shakwe aile, ashitishe fyonse ifyo akwete, kabili ashitile lilya ibala. ⁴⁵ Nakabili, ubufumu bwamumulu bwaba ngo muntu uwamakwebo uwalefwaya ubulungu bwa mutengo. ⁴⁶ Ilyo asangile ubulungu bwa mutengo apakalamba, aya kabili ashitishe fyonse ifintu akwete kabili abushita. ⁴⁷ ''Nakabili, ubufumu bwa mu mulu bwaba kwati li sumbu baposele muli bemba, kabili lyaikete isabi lya misango yonse. ⁴⁸ Ilyo lyaiswile, abalondo be sabi bali likuliile ku lulamba. Elyo baikele panshi no kukolonganika ilisuma mu miseke, lelo ilibi baliliposele kunse. ⁴⁹ Ifi efyo cikaba panshita ya mpela. Ba malaika bakesa kakili bakapatula ababifi ukufuma kuba lungami. ⁵⁰ Bakabaposa mwilungu lya mulilo, emukaba ukulosha kabili ukusumanya ameno. ⁵¹ ''Bushe na mwiluka ifi fintu fyonse?'' Abasambi batile kuli ena, ''Ee.'' ⁵² Elyo Yesu atile kuli bena, ''Eico onse kalemba uwa sanguka musambi ku bufumu bwa mu mulu aba kwati muntu uuli mwine wa nganda, uufumyamo ifya kale kabili nefipya mucipao cakwe.'' ⁵³ Elyo caishileba ukuti ilyo Yesu apwishishe ukubomina imilumbe, alifuminepo pancende ilya. ⁵⁴ Elyo Yesu aingile mu citungu caku mwabo kabili afundile abantu mu sinagogi yabo. Ifyatumbwikemo fyakuti balipeshiwa amano kabili batile, ''Bushe nikwisa uyu umuntu afumya amano yakwe kabili na aya maka yakucita ifipesha amano? ⁵⁵ Bushe uyu muntu te mwana wakwa kabasa wa mbao? Bushe nyina te uyu batila Maria? Bushe Yakobo, Yosefu, na Simoni, kabili na Yuda tebamunyina bakwe? ⁵⁶ Bushe ba nkashi yakwe bonse tabali naifwe kuno? Bushe nikwisa afumya fyonse ifi fintu?'' ⁵⁷ Bali punushiwe kuli ena. Lelo Yesu atile kuli bena, ''Kasesema tacindama mu calo cabo kabili na mulupwa lwakwe.'' ⁵⁸ Tacitile ifisungusho ifingi kulya pa mulandu wakukana sumina kwabo.