¹ Yawe asosele kuli Mose ati, ² “Leta Aroni na bana bakwe abaume, ifyakufwala fya bashimapepo, amafuta yakusuba, iciponti ica mutuulo wakwelelwa pa bubifi, basukusuku babili elyo no museke umo uwa mikate iyishatutumuka. ³ Kabili ulonganike ulukuta lonse pa mwinshi wa mpongolo kwi Tenti Lyakukumaninamo.” ⁴ Awe Mose acitilafye umo Yawe amukonkomeshe, ne bumba lya bantu balongene pa mwinshi we Tenti Lyakukumaninamo, ⁵ Mose alaeba ulukuta ati, “Ifi efyo Yawe ankonkomeshe ukucita.” ⁶ Elyo Mose apalamika Aroni na bana bakwe abaume kuntanshi no kubasamba na menshi. ⁷ Mose afwika Aroni ilaya, amukaka ilamba mu musana. Amufwika umwingila, elyo amufwika ne cakufwala ca pa mulu wa mwingila ica efodi, acikakila mu musana no mushipi uwapikulwa busaka busaka. ⁸ Amufwika na tumba pa cifuba, abikamo no tumabwe, Urimu na Tumimu. ⁹ Akaka ne nsalu ku mutwe wakwa Aroni, akakilapo na kalilata ka golide wine wine akamushilo pamo ngefyo Yawe amukonkomeshe. ¹⁰ Elyo Mose abuula amafuta yakusuba no kusuba Itenti lyakwa Lesa ne fipe fyonse ifyalimo pakuti fibe ifyamushilo. ¹¹ Kabili akana amafuta yamo ku bulambo imiku cine lubali, asuba amafuta ku bulambo pamo pene na ku fibombelo fyonse na ku musambilo neco bakatekapo, epakulenga fibe fyamushilo. ¹² Epakubuula amafuta yakusuba no kwitulwila pa mutwe wakwa Aroni no kumusuba pakuti abe uwamushilo. ¹³ Elyo Mose apalamike bamwana Aroni abaume, abafwika imingila, abakaka na malamba mu misana, abapomba insalu ku mitwe, pamo ngefyo Yawe amukonkomeshe. ¹⁴ Kabili Mose aleta iciponti ngo mutuulo wakwelelwa pa fyabubifi. Elyo Aroni na bana bakwe abaume batambalika amaboko yabo pa mutwe wa ciponti ca ŋombe. ¹⁵ Elyo Mose nao aipaya iciponti ca ŋombe, abuulapo no mulopa elyo atumpa umunwe wakwe mu mulopa, aushinga na ku nsengo sha pa bulambo pa kusangulula ubulambo. Umulopa washala aupongolwela mwisamba lya bulambo. Ifi efyo Mose asangulwile ubulambo pakufutilako pa bubifi. ¹⁶ Mose kabili abuula amafuta yonse ayatabilila ifya munda na fyonse ifyalambatila ku libu lya ciponti, ne mfyo shonse shibili na mafuta yabako, no kufyocela pamo pa bulambo. ¹⁷ Abuula fyonse ifyashala, impapa, iminofu ne fya mu mala fine, aya fyocela kunse ya nkambi, pamo ngefyo Yawe amukonkomeshe. ¹⁸ Kabili apalamika sukusuku uwe lambo lya cakoca, nao Aroni na bana abaume batambalikilapo amaboko pa mutwe wakwa sukusuku. ¹⁹ Nao Mose epakwipaya uyu sukusuku no kukana umulopa mu mbali shonse isha bulambo. ²⁰ Aputaula inama fipimfya fipimfya, no koca umutwe, ifipimfya fyonse pamo na mafuta. ²¹ Asamfya ifya munda ne myendo na menshi no kocela sukusuku onse pa bulambo nge lambo lyakoca, ilya cena cisuma icakusekesha ngo mutuulo wa cakoca kuli Yawe, pamo ngefyo Yawe akonkomeshe Mose. ²² Elyo kabili Mose abuula sukusuku wacibili, uyu wena ali mutuulo wa pakusubwa, na Aroni na bana bakwe abaume batambalikilapo amaboko yabo pa mutwe. ²³ Mose nao aipaya uyu sukusuku no kubuula umulopa umo, aushinga ku kalebelebe ka kutwi kwa ku kulyo kwakwa Aroni na ku cikumo ca ku kulyo, elyo na ku cikondo icikalamba ica lukasa lwa ku kulyo. ²⁴ Mose elyo apalamika abana baume bakwa Aroni, nabo bene abashinga umulopa ku tulebelebe twa matwi yabo aya ku kulyo, ku fikumo fyabo ifya ku kulyo na ku fikondo fikalamba ifya ku kulyo kwa makasa yabo. Kabili akana no mulopa uwashelepo mu mbali shonse isha bulambo. ²⁵ Abuula amafuta no mucila uwanona, elyo na mafuta yonsefye aya fya munda, fyonse ifyatabilila ku libu, imfyo shonse shibili na mafuta yabako elyo no mwendo wa ku kulyo. ²⁶ Ukufuma mu museke uwa mikate iyishatutumuka, uwali ku cinso cakwa Yawe, abuulamo umukate umo na kamukate kamo akasakanishiwamo amafuta elyo na kamukate akapapatala, afibika pa mafuta kabili pa mwendo wa ku kulyo uwakwa sukusuku. ²⁷ Mose abuula fyonse ifi, abika mu minwe yakwa Aroni na bana bakwe abaume nabo bakafimishe mumulu ngo mutuulo wa cakutambika kuli Yawe. ²⁸ Elyo Mose afipoka ukufuma ku maboko yabo no kufyocela fyonse pa bulambo pa mulu we lambo lyakoca ngo mutuulo wa cakoca kuli Yawe, umutuulo uwakusubwa uwa cena cisuma icimusekesha. ²⁹ Elyo kabili Mose abuula inama ya cisao, icipande cakwe kuli sukusuku, kabili aimisha mumulu ngo mutuulo wakutambika pa cinso cakwa Yawe pamo ngefyo Yawe akonkomeshe Mose. ³⁰ Elyo kabili Mose abuula amafuta yakusuba no mulopa umo ukufuma pa bulambo, afikana pali Aroni ne fyakufwala fyakwe elyo na pa bana bakwe abaume na ku fyakufwala fyabo. Kanshi efyo Aroni ashishiwe pamo ne fyakufwala fyakwe na bana bakwe abaume ne fyakufwala fyabo. ³¹ Mose kabili epakweba Aroni na bana bakwe abaume ukuti, “Ipikileni inama pa mwinshi we Tenti Lyakukumaninamo no kuiliilafye palya pene ne mikate ukufuma mu museke wa mituulo iyipeelwa pakusubwa bushimapepo, pamo ngefyo nakonkomesha ukuti, ‘Aroni na bana bakwe abaume, efyo bafwile ukulya.’ ³² Elyo inama no mukate ifyashalapo moce. ³³ Mwilafuma, pa mwinshi we Tenti Lyakukumaninamo pa nshiku cine lubali mpakafye inshiku sha kusubwa shenu shikapwe pantu ukusubwa kwenu kukapwa inshiku cine lubali. ³⁴ Icacitwa lelo, ni Yawe akonkomeshe pakumufutilako pa bubifi. ³⁵ Mufwilefye ukwikala pa mwinshi we Tenti Lyakukumaninamo, akasuba no bushiku pa nshiku cine lubali, no kukonka ifyo Yawe afwaya lyena tamwakafwe, pantu ifi efyo bankonkomeshe.” ³⁶ Awe Aroni na bana bakwe abaume bacitile fintu fyonse ngefyo Yawe akonkomeshe Mose.