¹ Aya e mafunde aya kukonka pakutula umutulo wakufuta pa fya bubifi. ici ca mushilo nganshi. ² Bali nokwipaya umutulo wakufuta ifya bubifi pa ncende iyo bepailapo, kabili bali nokukana umulopa mu mbali shonse isha bulambo. ³ Yonse amafuta yali nokutuulwa. amafuta yakumucila, namafuta ayatabilila ku fya munda. ⁴ Imfyo shibili namafuta yonse, ayabako mupepi no musana kabili ifya lambatila ku libu, pamo ne mfyo shonse -fyonse fili nokufumishiwa. ⁵ Shimapepo ali nokocela fyonse pa mulambo ngo mutulo wacakoca kuli Yawe. ulyu e mutulo wakoca pafya bubifi. ⁶ Umwaume onse uwa muli ba shimapepo euli nokulyako uyu umutulo. Fili nokulilwa mu ncende imo iya mushilo pamulandu camushilo nganshi. ⁷ Umutulo wakufuta pafya bubifi waba kwati mutulo wakwelelwa pa bubifi. Ifunde limo line elyakukonka mu mitulo yonse ibili. fyakwa shimapepo uwabomba umulimo wapo kubafutilako. ⁸ Shimapepo uwaocela uuli onse umutulo wacakoca umukupo uwashala wakwe. ⁹ Umutulo onse uwa cabunga uo baica mwi buku nangu basalula pali pani nangu baocela pelata lyakocelapo fyonse fyakwa shimapepo uulebombela ku bulambo. ¹⁰ Onse umutulo wacabunga, nangu wauna nangu uwasakanishiwamo na mafuta, fyonse fya bana baume bakwa Aaroni ukulingana no unankwe. ¹¹ Aya e mafunde yakukonka pakutula umutulo wakwampana uo umuntu onse ali nokutula kuli Yawe. ¹² Umuntu uuli onse nga atula umutulo wakulanga ukutotela alingile atuulila capamo ne mutulo yakutotela iya mu kate umwabula intutumushi lelo utwashingwako na mafuta kabili ne nkate iya papatala umwakandawilwa na mafuta kabili ne mikate iyapangwa no bunga bwa ganu ubwapeleka bwino umwasashiwa fye na mafuta. ¹³ Ifyo fine napa mutulo wakwampana uwakutotela, ali nokulundapo umuntulo wa mikate iya tutumuka. ¹⁴ Ali nokutuulapo cila umo ngo musangulo kuli Yawe. Uyu musangulo wakwa shimapepo uukana umulopa wa mitulo ¹⁵ Inama ya mutuulo wakwampana kabili iyakutotela, ifwile ukuliwa mu bushiku bwine ubo ipeelelwepo ngo mutuulo we lambo. Tafwile kushako nelyo kamo mpaka ukufika ulucelo. ¹⁶ “Nga cakuti umutuulo we lambo lya muntu wa cilayo nangu wakuitemenwafye, ninshi uyo mutuulo we lambo ufwile ukuliwafye ubo bwine bushiku wapeelelwapo. Lelo nga cakuti pashala fimo, kuti fyaliwa ubushiku bwakonkapo. ¹⁷ Umunofu wa nama nga washalako ku mutuulo mu bushiku bwalenga shitatu, wakocafye. ¹⁸ Nga cakuti uyu mutuulo wakwampana waliwa mu bushiku bwalenga shitatu, umutuulo wa muntu uyu teti Yawe aupokelele. Elyo tawakapendelwe ukuba ku mulingo wakwe, lelo untu wakowela, no muntu uukalyako akakandwa. ¹⁹ “Umunofu wa nama onse uwakumya ku cintu icakowela, tewakwesha ukulya, wena wakocafye. Lelo inama imbi umuntu onse uwasangululwa wena kuti alyako iyo inama. ²⁰ Nga cakuti umuntu uushasangululwa alyako ku nama ya mutuulo wakwampana uwakwa Yawe, uyo muntu wakutamfyafye mu mushobo wa bantu bakwe. ²¹ Kabili umuntu onse uwakumya ku cintu icili conse icakowela ica muntu nangu inama iyakowela nangufye icintu icili conse icakowela, nomba aisa lyako inama ya mutuulo wakwampana uwakwa Yawe, ninshi uyu muntu wakutamfyafye mu mushobo wa bantu bakwe.” ²² Kabili Yawe asosele kuli Mose ati, ²³ “Eba abena Israeli utile, ‘Imwe mwilalya conse ica mafuta ya nama ya ŋombe, impaanga nangufye ya mbushi. ²⁴ Kabili tecakwesha ukulya mafuta ya nama yonsefye iyaifwila, nangufye iyaikatwa ku finama fya mpanga, lelo kuti yabomfeshiwa ku milimo imbi. ²⁵ Umuntu onse uwalya amafuta ya nama iyo batuulile kuli Yawe iya cakoca, wakutamfyafye mu mushobo wa bantu bakwe. ²⁶ Konsefye uko mukekala, tecakwesha ukulalya umulopa wa cuni icili conse nangufye uwa nama iyili yonse. ²⁷ Umuntu onse uwalya umulopa, uyu wena wakutamfyafye mu mushobo wa bantu bakwe.’” ²⁸ Kabili Yawe asosele kuli Mose ati, ³⁰ “Eba abena Israeli utile, ‘Uyo onse uuletuula umutuulo wakwampana kuli Yawe, alingile ukuleta iciputulwa ca nama ye lambo kuli Yawe. ²⁹ Alingile ukuiletelafye umwine uyu mutuulo wa cakoca kuli Yawe. Ali nokuleta ifyamafuta pamo ne cisao elyo atambike icisao kuli Yawe ngo mutuulo wa cakutambika. ³¹ Shimapepo ali nokoca amafuta pa bulambo, lelo icisao cena cakwa Aroni na bana bakwe abaume. ³² Ku mutuulo we lambo lyakwampana, umwendo wa ku kulyo uli nokupeelwa kuli shimapepo ngo musangulo. ³³ Mwana Aroni umwaume uwatuula umulopa na mafuta nge fya mutuulo wakwampana, afwile apeelwa umwendo wa ku kulyo nge cipande cakwe. ³⁴ Ukufuma ku mutuulo wakwampana wa bena Israeli, nabuulako inama ya cisao icitambikwe, no mwendo uupeelwe no kufipeela kuli Aroni shimapepo na bana baume bakwe nge fipande fyabo ifya nshiku shonse ukufuma ku mutuulo wa bena Israeli.’ ³⁵ “Ici cili cipande ca mutuulo wa cakoca icipeelwa kuli Yawe ico Aroni na bana bakwe abaume bapeelwe mu bushiku bapalamikwemo mukutumika Yawe nga bashimapepo. ³⁶ Pa bushiku basubilwe, Yawe akonkomeshe ukuti abena Israeli babapeele ifi nge fipande fyabo ukulingana nomo inkulo sha bantu ba mu Israeli shili nokukonkanina.” ³⁷ Kanshi aya, e mafunde yakukonka ilyo ilambo lyakoca liletuulwa, na pa mutuulo wa cabunga, na pa mutuulo wakwelelwa pa bubifi, na pa mutuulo wakufuta pa fyabubifi, na pa mutuulo wa pakusubwa bushimapepo elyo na pa mutuulo wakwampana. ³⁸ Yawe ewapeele Mose aya mafunde pa lupili lwa Sinai, pa bushiku akonkomeshe abena Israeli ukulatuula umutuulo kuli Yawe mu matololo ya Sinai.