1 Poluka Sailasika Debe bata Listara tauni'i aniabaro, mini bo kai'a bainti bano baura bira autu Timotira. Biba Juda nahenti ma'u bano tabae mara'ura ututoba, bira oora Kiriki baintibe. 2 Bi baintirara Listara bata Ikoniamu atabakauka ko'e uba tibariababe. 3 Poluba Timotirara nai batakero buaire tiro, mintibo biba bira bitabarero buru bira baata to'ora, bira nanare Juda bi batukara bariaka, eka bika tabebe bira oora Kiriki baintibe. 4 Bika nora tauni abutana biha, mono'irauka uba tibanimi tiha eka hikuru uba abatate ti, kai'a bainti bata iata bainti bata Jerusaremini hai ararua tora. 5 Mintibo mono'i bariaka mara'ura ututaba kempukai'a bimanta boha enta boha enta bainti nahenti aniaba airu'i baura. 6 Polura batake taukae bira abataka, bika Firikia batuka bata Galatia batuka bibaubo, Aiho Bainti bano bika noo tintakomata bika Esia batuka kia Kotira uba tura. 7 Bika Misia batuka ani aumai'abi, bika Bitinia batuka ori'etare ti, minti bo Kotira Aiho bano bika raba'ura. 8 Mintimanta bika Misia batuka ai atare, Noara tauni Toroasini otubura. 9 Poluba taitra bo'ara enta'ira tabaira. Tabaibo Mesidonia bainti bobano bira'a himpiro baura, bira arero tiharo, "Mesidoniai anira tinabu kaha'iate ti. 10 Poluba bihaikara taira bo'ara tabaimanta, totara tenabu himpi Mesidoniani otubuna, bira nanare tenabu iri tabebe Kotiba tinabu bitero bika bata ko'e uba tibanimite tikabe. 11 Tenabu botu'ira barire nora tauni Toroasi a'irake Samotaraisini buna, bi entara nantiara tenabu Neapolisini otu obarai'a buna. 12 Bira nantiara Pilipaini tenabu otubuna, bira Masidonia nora taunibe, bira nora tauni Romu batana bainti nahenti bariara'ibe, nora tauni bira'ira bo entanabu baunabe. 13 Sabati'a tenabu tauni enta'ahi otitare namai aubahihata otubunabe, tenabu iri tiha mini bo batuka nunabu tiaira baibo ti tunabe. Tenabu o'ubi baiha nahentihaika taukae nunabu tireka aniaka hampata uba tunabe. 14 Bo nahenti bira autu Lidiaba, biba ko'e utaba'a Tiatira tauni'ira maketi auti baiba, biba Kotira'a mono tibaibabe. Nora bano bi nahentira auha antua kaibo nana uba Poluba tura irurabe. 15 Nantira Poluka Sailasika bira batake taukae eka bira nabu'i bariaka namai a'u nimitorabe, biba tinabu tibatimiro tiharo, "Ne tabai'e te abu abu'abi Norai bariarera, ti nabu'ira tubu bariate tiro." Bi nahentiba tinabu auha atara korabe. 16 Nantira tenabu nunabu tia batukara bunabe, mini bo baraata nahenti ora aiho bano bira'a baura oru tabunabe. Biba nanahika bano nantiara aniaina hikarara bainti nahenti tabanimi baimanta, bika bira ra'ikira bainti nora ko'a ami bariababe. 17 Bi nahentiba Polura batakero tinabu abatabare biharo naberai tibakero tiharo, "Ma baintikabe Kotiba bini baira kai'a baintibe tiro. Bikama Kotiba bainti dtitaina arara tiba o'ai'ibabe tiro. 18 Biba bi ubara airu enta tiba'iro anibaubo. Poluba kia boha auha batora, mintibo biba bi nahentira tabero bi aihoba bira'i bairara tiharo, "Te bate ai tibamuro Ihu Karaitira autu'a bira a'irakane tiro." Minti tubo totara bi aihoba bira a'irakero bura. 19 Bira ra'ikira bainti tababo ko'a bare araba bikaini tintomanta, bika arara'itake Poluka Banabasika raraubare iata bainti lo ra'ikirauka abu'a maketi batuka'i ori'etora. 20 Bika bikahanta bitabare iata bainti'a buruke, bika tiha, "Ma taara Juda bainti tinabu tauni'ira bainti nahentima hampi'i bariabo ti. 21 Bika tiba o'ai'ake Romu batanaka mintiha abate baria okarara. 22 Eka bainti nahenti himpi Poluka Sailasika hampata uba i'oka ra'ibaumanta, iata bainti bikahanta utaba'a bi'uke huru bainti tibakomanta kabunohai bikahanta ntaihora. 23 Huru bainti airu aihabirahika bikahanta nimi, karabuhi nabu'ira bikahanta bitaberake. Bika kalabuhi'a ra'ikikara tiha ko'eke tarainti'a ra'ikirama kia aitare buate ti. 24 Bi ubara iriro, bi huru baintiba bikahanta beranto barabera kero bikahanta ai'u bohara'a batero rumpa tora. 25 Enta tabara Poluka Salaries Kotirai nunabu tiha ihi tibariamanta, hinikia kalabuhi baintika bata bikahanta tura iribaubo. 26 Totara nora batura utibo kalabuhi nabu aka'aka ibo, totara eka enta antuareharo eka na'unta ai'u kau'u'ira rumpetaba eka raperi bura. 27 Kalabuhi'a ra'iki baintiba baitero bihai himpiro tabaibo eka enata bano kalabuhi nabu'ira antuare bubaro, biba nai ehai barakero aumantoka nai arukare tiro, bira nanare biba iriro tiharo eka kalabuhi binuabo tiro. 28 Mintibo Poluba nora aunta batero naberai tibakero tiharo, "Kia ne nenta orai'iate tiro, tenabu eka ma'i a'ima bauro tiro." 29 Kalabuhi'a ra'ikiba naberai tibakero tiharo obba barani'e umpike tabare tiro taukae a'i bariabo tiro. Nora etarahika batakero, biba PolukaSailaska ai'u'ira hi'iribiro, 30 biba bikahanta bita bebakero irero, "Ra'ikiraukabe, Te nantiairoe Kotiba ti bitanaro tiro?" 31 Bikahanta tiha, "Ai batake taukae ai nabu'i bariaka ne Nora Ihura'a mara'ura utiboma Kotiba ni bitanarobe ti." 32 Bikahanta Nora ko'e uba bira tibamiha eka taukae bira nabu'i bariaka bata tibanimi baura. 33 Nantiara kalabuhi nabu'ira ra'iki baintiba bikahanta bitakero bikahanta numuara hi'a nimitora, totara bira batake taukae bira nabu'i bariaka namai barora. 34 Nantiara biba Poluka Sailasika bitero nai nabu'i burukero bikahanta kara nimura, biba nai nabu'ira bairiaka hampata nora uaharahika barora, bira nanare biba Kotira'a mara'ura ututero. 35 Kuari ururomanta, iata bainti kalabuhi'a ra'ikia baintika'a uba barake tiha, "A'ira bikahanta kaimanta buate ti 36 Kalabuhi'a ra'iki baintiba Polura tibamiro tiharo, Iata bainti ti'a uba barake tiha niara nititaimanta buate tiabo. Mintiboma ne bebare iha'ara auha batake buate." 37 Poluba bira tibamiro tiharo, "Tenabu Romuni hainauka urama eka bainti nahenti abu'a tinabu ru'utukema kalabuhi'i berakabo. Nantie bika kuke'ake tinabu atitareka iabo? Kiabe! kaimanta nai bi siasika tinabu kalabuhi'ihai bitabebakate." 38 Kalabuhi'a ra'ikia baintika bi ubara bare siasika burutiba nimumanta, bika iriamanta Poluka Sailasika Romuni hainaukabe tiamanta, nora etarahika bano bika uata barora. 39 Siasika ani bikahanta umpo'ira hika nimi bika kalabuhi'ihai bikahanta bitabebake tibanimi tiha tauni a'irake buate ti. 40 Minti Poluka Sailasika kalabuhi'ihai bebare Lidiara nabu'i bura. Poluka Sailasika hinikia bainti nahentika mara'ura utuaka tabe, bika kekauma nimita nora tauni tute bura.