¹ Ko koya koya, ni da sa vadonui ena vabauta, me da sa qai veivinakati ki na Kalou ena vuku ni noda Turaga ko Jisu Karisito: ² ena vukuna voki lia eda sa torovia rawa kinia, ena vabautia na loloma koya eda sa qai tu kinia; me da sa reki voki lia ni da nuitakia na vivakalougataki ni Kalou. ³ A sa yali ni koya loa lia gona, me da sa daureki voki lia ena vuku ni veika rarawa: ni da kila ni sa dau tubu na dauvosotia mai na veika rarawa; ⁴ ia na dauvivatovolei mai na dauvosotia; ia nai nuinui mai na dauvivatovolei. ⁵ Ia sa yali na madua ena vuku ni nuinui; ni sa sovarakia kinia na yaloda na loloma ni Kalou ni sa solia vi ita na Yalo Tabu. ⁶ Ni sa mate na Karisito me kedrai sosomi ni tamata i valavala ca ena gauna sa lokuci eliu, ni da sa malumalumu tiko. ⁷ Ni sa yali beka e dua me mate mei sosomi ni tamata yalododonu; ia ka sa dua beka sa doudou me mate mei sosomi ni tamata dauloloma. ⁸ Ia na Kalou sa vatakila na loloma vi ita ni sa mate na Karisito me noda i sosomi ni da sa tamata ca. ⁹ Ia ni da sa qai vadonui ena vuku ni nona dra, ena qai rawarawa cake meda vabulai mai na cudru ena vukuna. ¹⁰ Io, kevaka eda sa vivinakati kei na Kalou e na vuku ni nona mate na Luvena, ni da sa vimecaki, ena qai rawarawa cake, ni da sa vivinakati tu, me da vabulai tiko ena vuku ni nona bula. ¹¹ A sa yali ni koya loa lia, ia eda sa daureki voki lia ena Kalou e na vuku ni noda Turaga ko Jisu Karisito, ko koya eda sa yaco kinia me da vivinakati tu. ¹² Ia me vaka sa curu i vuravura nai valavala ca ena vuku ni tamata e lewe dua, vata na mate ena vuku ni valavala ca, a sa yaco vakinia na mate ki na tamata kece lia, ni sa cala na tamata kece lia. ¹³ Sa tu iliu i vuravura nai valavala ca, sa yaco i muri na vunau: a sa yali okati nai valavala ca, ni sa yali na vunau. ¹⁴ Ia mai na gauna i Atama ka yacovia na gauna i Mosese sa dau vitalia ko mate vi ira voki lia era sa yali valavala ca me vaka na talaidredre i Atama, ko koya sa nona i vatakarakara sa qai mai emuri. ¹⁵ Ia erau sa yali ni tautauvata sara na talaidredre, vata nai solisoli loa lia. Ia kevaka sa mate na lewe levu ena vuku ni nona talaidredre na lewe dua, sa qai rawarawa cake sara me yaco valevu vi ira na lewe levu na loloma ni Kalou, vata nai solisoli ni loloma, ena vukuna lia na tamata e lewe dua ko Jisu Karisito. ¹⁶ E rau sa yali ni tautauvata na ka sa yaco ena vuku ni nona cala e dua bau lia, kei nai solisoli: ni sa dua loa lia sa yaco kinia na lewa me da cala, ia nai solisoli loa lia sa yaco vei ira na lewe levu na nodrai valavala ca me ra vadonui kinia. ¹⁷ Ia kevaka sa gumatua na mate ena vukuna na lewe dua; ena talaidredre ni le dua; ena qai rawarawa valevu cake vei ira sa yacovi ira na loloma levu kei nai solisoli ni veivadonui, me ra gumatua e na bula ena vukuna na le dua ko Jisu Karisito. ¹⁸ O koya koya, me vaka sa lewai me cudruvi kece lia na tamata ena vuku ni dua loa lia na cala; sa vaka voki lia kinia ena vuku ni dua loa lia nai valavala dodonu sa rawa me ra vadonui kece kinia na tamata me ra bula: ¹⁹ ka me vaka sa vacalai na lewe levu ena vuku ni nona talaidredre e dua loa lia na tamata, sa vadonui vaka voki lia kinia na tamata ena vuku ni nona talairawarawa na le dua. ²⁰ Sa qai yadi mai na vunau, me uasivi kinia nai valavala ca. Ia ni sa uasivi cake mai na valavala ca sa uasivi cake valevu sa ra na loloma: ²¹ me vaka ni sa gumatua nai valavala ca ki na mate, me gumatua voki lia kinia na loloma, e na vadonui, ki na bula tawa mudu, e na vuku i Jisu Karisito na noda Turaga.