¹ O koya sa malumalumu na nona vabautia dou yadia vei ikodou, ia me kakua lia me sa lewai tiko na veika e dauveiletitaki. ² E dua sa doudou me kania lowa na ka kece lia: ia ko koya sa malumalumu, sa daukania lia na rourou. ³ Me kakua ni beci koya sa yali ni kana ko koya sa kana: ia me kakua ni lewai koya sa kana ko koya sa yali ni kana: ni sa vinakati koya na Kalou. ⁴ O cei ko iko mo lewa na tamata ni turaga tani? ena tu ko koya, se bale, vua na nona turaga. Io, ena tu dei lia: ni sa rawarawa vua na Kalou me vataudeitakia koya. ⁵ E dua sa doka e dua na siga ka yali nai kadua: ka dua tani sa doka na siga kece lia. Me dui lewa deivakia na tamata yadua e na lomana. ⁶ O koya sa nanumia na siga, sa ka lia vua na Turaga na nona nanumia; ia ko koya sa kana, sa ka lia vua na Turaga na nona kana, ni sa vavinavinaka ko koya vua na Kalou; ia ko koya sa yali ni kana, sa ka voki lia vua na Turaga na nona yali ni kana, a sa vavinavinaka ko koya vua na Kalou. ⁷ Ni sa yali e dua vi ita sa bula e na vukuna lia, se dua sa mate e na vukuna lia. ⁸ Io, kevaka eda sa bula, eda sa bula e na vuku ni Turaga; se da mate, eda sa mate e na vuku ni Turaga: o koya koya eda sa nona kinia na Turaga, se da bula se da mate. ⁹ O koya koya sa mate kinia na Karisito, ka sa bula voki, me nodra Turaga era sa mate kei ira era sa bula. ¹⁰ Ia ko iko, ko sa lewai koya na wekamu e na vuku ni cava? se ko iko voki, ko sa beci koya na wekamu e na vuku ni cava? ni da na tu kece lia e na mata ni tikotiko ni veilewai ni Kalou. ¹¹ Ni sa volai, Sa tukunia na Turaga, me vaka ka'u sa bula, ena tekiduru vei au ko ira na tamata kece lia, Ia ena vatusa vua na Kalou na yame kece lia. ¹² O koya koya eda na dui vatusai ita kece lia vua na Kalou. ¹³ O koya me da qai kakua voki ni dauveivalewai tiko; koya lia, mo dou lewa, me kakua e dua me caka e dua na ka me tarabe kinia se bale kinia na wekana. ¹⁴ Au sa kila, ka sa vadinadinatakia vei au na Turaga ko Jisu, ni sa yali na ka e dukadukali vakai koya lia; ia vua sa nanumia sa dukadukali na ka, sa qai dukadukali vei koya. ¹⁵ Ia kevaka sa rarawa na lomana na wekamu e na vuku ni kakana, o sa qai yali ni valavala me vaka na loloma. Kakua ni varusai koya e na kemu kakana, o koya sa mate e na vukuna na Karisito. ¹⁶ O koya me kakua kinia ni vosavacacatakia na nomudou ka vinaka: ¹⁷ ni sa yali ni kakana se ka-ni-gunu na matanitu ni Kalou; na yalododonu lia, kei na vacegu, kei na reki e na Yalo Tabu. ¹⁸ Ni sai koya sa qaravi Karisito e na veika koya, sa vinaka vua na Kalou, a sa vinakati koya voki lia ko ira na tamata. ¹⁹ O koya koya me da muria kinia na veika ni veivinakati, kei na veika eda na dui veivatavulici kinia. ²⁰ Kakua ni varusa na cakacaka ni Kalou e na vuku ni kakana. E dina lia sa savasava na ka kece lia; ia sa ca vua na tamata sa kana ka sa tarabe kinia eso. ²¹ E vinaka mo kakua ni kania na lewe ni manumanu, se somi waini, se caka e dua na ka sa bale kinia na wekamu. ²² Na vabautia sa tu vi iko, me tu vi iko lia ena mata ni Kalou. Sa kalougata na tamata sa yali ni beitaki koya ena ka sa vatara ko koya. ²³ Ia ko koya sa yali ni dinatia ni sa tara vua, sa lewai me cudruvi kevaka sa kana, ena vuku ni sa kana ka yali ni dinatia: ia na ka kece lia eda sa yali ni dinatia ni tara vi ita, sai valavala ca koya.