¹ Sa bogi vica, sa qai curu voki ki Kapenaumi ko koya; a sa qai rogovaki ni sa tiko e vale. ² A ra sa lewe levu sa soqoni vata sara mai, a sa yali kinia na tikina me rauti ira, e yali ena mata ni darava: a sa vunautakia na vosa vi ira ko koya. ³ A sa qai mai vi koya eso, eratou yadia mai e dua sa tauvi-paralasi, sa colati koya e lewe va. ⁴ Ia ni ratou sa yali ni torovi koya rawa ena vukudra na lewe levu, eratou sa basukia na dela ni vale sa tiko kinia o koya: ia ni ratou sa basukia sara, eratou sa tukucia sobu nai mocemoce sa davo kinia o koya sa tauvi paralasi. ⁵ Ia ni sa raicia o Jisu na nodratou vabautia, sa tukunia vua sa tauvi paralasi, Na luvequ, sa bokoci na nomui valavala ca. ⁶ Ia ka so na vunivola era sa tiko kinia, a ra sa vinanuyakia e lomadra, ka vakoya, ⁷ Sa vosavacacatakia na Kalou o koya koya ena vuku ni cava? ko cei voki sa bokocia rawa nai valavala ca, a Kalou loa lia? ⁸ Sa kila sara e yalona ko Jisu ni ra sa vinanuyakia va koya e lomadra, ka sa tukunia vi ira, A cava dou sa vinanuyakia kinia na ka koya ena lomamudou? ⁹ a cava vi rau e rawarawa cake, me tukunia vua sa tauvi paralasi, Sa bokoci na nomui valavala ca; se me tukunia, Mo tu cake, ka yadia na nomui mocemoce, ka qai? ¹⁰ Ia mo dou kila kinia ni sa rawa na Luve ni tamata e vuravura me bokocia nai valavala ca, (sa qai tukunia ko koya vua sa tauvi paralasi,) ¹¹ Au sa tukunia vi iko, Mo tu cake, ka yadia na nomui mocemoce, ka qai i na nomudou. ¹² A sa tu cake sara o koya, ka yadia nai mocemoce, ka qai yani e na matadra kece lia; a ra sa kurabui kece lia kinia, ka varokorokotakia na Kalou, ka tukunia, Eda sa yali ni raicia eliu na ka e vakoya na kenai valavala. ¹³ A sa qai voki yani ko koya ki matasawa, a ra sa qai vi koya ko ira kece lia na lewe levu, a sa vavulici ira ko koya. ¹⁴ Ia ni sa qai voli yani, sa raici Livai na luve i Alifio sa tiko ena vale ni soli vacavacava, a sa tukunia vua, Muri au. A sa cavu tu ko koya, ka muri koya. ¹⁵ Ia ni sa tiko ko koya ena nona vale me kana, era sa lewe levu na kumunia nai vacavacava kei na tamatai valavala ca era sa tiko me kana vata kei Jisu kei ira na nona tisaipeli: era sa lewe levu, a ra sa muri koya. ¹⁶ Ia ni ra sa raicia ko ira na vunivola kei ira na Farisi ni sa kana vata ko koya kei ira sa kumunia nai va cavacava ki ira na tamatai valavala ca, era sa tukunia vi ira na nona tisaipeli. A cava sa kana vata ka somi vata kinia ko koya kei ira sa kumunia nai vacavacava kei ira na tamatai valavala ca? ¹⁷ Ia ni sa rogocia ko Jisu, sa tukunia vi ira, Sa yali ni yaga na vuniwai vi ira sa bula vinaka, vi ira lia sa tauvi mate: au sa yali ni qai mai meu kacivi ira sa yalododonu, ko ira lia nai valavala ca, me ra vivutuni. ¹⁸ A ra sa daulolo ko ira na tisaipeli i Joni ki na nodra tisaipeli na Farisi: a ra sa qai mai ka tukunia vua, A cava sa lolo kinia ko ira na tisaipeli i Joni ki na nodra tisaipeli na Farisi, ia na nomu tisaipeli era sa yali ni lolo? ¹⁹ A sa tukunia vi ira ko Jisu, Era sa lolo rawa li na weka ni tagane sa qai vawati, ni sa tiko vata ki ira na tagane sa qai vawati? ni sa tiko lia ki ira na tagane sa qai vawati, era sa yali ni lolo rawa. ²⁰ Ia ena yaco mai na siga, ena yadi tani kinia vi ira na tagane sa qai vawati; ka ra na qai lolo ena gauna koya. ²¹ Ia sa yali na tamata sa cula vata na tiki ni sulu vou ki nai sulu madra: ke sa vakinia, ena dresukia na kena madra na tikinia vou sa botani kinia, a sa kadresu valevu kinia. ²² Sa yali voki lia na tamata sa vatalocia na waini vou ki na tavaya kuli-ni-manumanu madra; ke sa vakinia, ena vakacabotetakia na tavaya na waini vou, ka na dave yani na waini, ka rusa na tavaya; e vinaka lia me vatalocia na waini vou ki na tavaya vou. ²³ A sa qai ko koya e loma ni viwere ni sila ena siga ni vacecegu; ia ni ra sa qai voli na nona tisaipeli, era dolokia na visola ni sila. ²⁴ A sa tukunia vua ko ira na Farisi, Raicia, a cava era sa caka kinia ko ira ena siga ni vacecegu na ka e yali ni tara? ²⁵ Sa qai tukunia vi ira ko koya, Dou sa yali beka ni wilikia na ka sa caka ko Tevita, ni sa yali na kena, ka sa viakana, ko koya kei ira sa tiko vata kaya: ²⁶ Ni sa curu ko koya ki na vale ni Kalou, ena gauna i Epaiaca na bete levu, a sa kania na madrai dauraici, koya sa yali ni tara me laukana, sa tara loa lia vi ira na bete, a sa solia voki lia vi ira era sa tiko vata kaya? ²⁷ Sa tukunia voki lia vi ira, Sa caka na siga ni vacecegu ena vukudra na tamata, e yali ni caka na tamata ena vuku ni siga ni vacecegu: ²⁸ ia sa Turaga voki lia ni siga ni vacecegu na Luve ni tamata.