¹ Ai vatekivu ni tukutuku vinaka kei Jisu Karisito, na Luve ni Kalou; ² me vaka sa vola na parofita: Raicia, au sa tala na noqu talai me liu e matamu, Ena caramakia ko koya na nona sala e matamu: ³ A domo ni dua sa kacikaci e loma ni vikau, Dou caramakia na sala i Jiova, Caka me dodonu na nona gaunisala. ⁴ Sa qai mai ko Joni na dauvipapitaisotaki ena loma ni vikau, ka vunautakia me ra papitaiso ka vivutuni me bokocia kinia nai valavala ca. ⁵ A sa qai yani vua na lewe ni vanua taucoko ko Jutia, ki ira na kai Jerusalemi. sa papitaisotaki ira kece lia ko koya ena uciwai ko Joritani, ni ra sa vatusa na nodrai valavala ca. ⁶ A sa vaisulu ko Joni enai sulu vuti ni kameli, ka sai vau ni tolona na wa kuli ni manumanu; ia sa kena tiko na vodre kei na oni ni vikau. ⁷ A sa dauvunau, ka tukunia, E dua sa muri au mai sa levu cake vi kirau, ia na wa ni nonai vava kau sa yali ni yaga meu cuva sobu meu serekia. ⁸ E dina kau sa papitaisotaki ikodou ena wai: ia ena papitaisotaki ikodou ko koya, ena Yalo Tabu. ⁹ A sa yaco ena gauna koya, sa qai mai Nasareci e Kalili ko Jisu, a sa papitaisotakia ko Joni ena Joritani. ¹⁰ Ia ni sa cabe sara ko koya mai na wai, sa qai raicia na lomalagi ni sa wase rua, ki na Yalo Tabu ni sa qai sobu vua me vaka na ruve; ¹¹ a sa rogo mai lomalagi e dua na vosa: Ko iko na noqu Gone ni toko, au sa dauvinakati iko valevu ¹² A sa vayadi koya vasauri na Yalo Tabu ki vikau. ¹³ A sa tiko e loma ni vikau ka bogi vasagavulu, a sa dauveretaki koya ko Setani; a sa tiko vata kei na manumanu kila; a sa qaravi koya ko ira na agilose. ¹⁴ Ia ni sa dai ki na vale ni vivesu ko Joni, sa qai mai Kalili ko Jisu, a sa dauvunautakia nai tukutuku vinaka ni matanitu ni Kalou, ¹⁵ ka tukunia, Sa qai yaco na gauna, a sa voleka na matanitu ni Kalou; dou vivutuni, ka vabautia nai tukutuku vinaka. ¹⁶ A sa qai voli ko koya ena baravi mai Kalili, a sa raici Saimoni kei Adriu na tacina, erau sa viritakia na lawa ki wai: ni rau sa gonedau. ¹⁷ A sa tukunia vi rau ko Jisu, Drau muri au mai, kau na qisi ikodrau mo drau yaco me gonedau ni tamata. ¹⁸ A rau sa dainia sara na nodrau lawa, ka muri koya. ¹⁹ Ia ni sa qai valailai ki liu ko koya, sa raici Jemesa na luve i Sepete, kei Joni na tacina, erau sa tiko mai waqa ka onevia na lawa. ²⁰ A sa kacivi rau sara ko koya: a rau sa dainia na tamadrau ko Sepete ena waqa, kei iratou na tamata, ka muri koya. ²¹ A ratou sa qai ki Kapenaumi; ia ena siga ni vacecegu sa curu sara ko koya ki na valenilotu, ka vatavuvuli. ²² A ra sa kurabui ena nonai vavuvuli; ni sa vatavulici ira me vaka e dua sa tu vua na lewa, ka yali ni vataki ira na vunivola. ²³ A sa tiko ena nodra valenilotu e dua na tamata ka curumi koya e dua na yalo velavela; a sa qoqolou, ²⁴ ka tukunia, Ule! a cava vi itatou, i Jisu na kai Nasareci? ko sa qai beka mai me rawai itatou? au sa kilai iko, na nona Le Dua Yalosavasava na Kalou. ²⁵ A sa vunauci koya ko Jisu, ka tukunia, Mo galu lia, ka qai tani mai vua. ²⁶ Ia ni sa bitalaki koya na yalo velavela, ka qoqolou ena domo levu, sa qai qai tani mai vua. ²⁷ A ra sa kurabui kece lia, ka vitarogi kinia vakai ira, ka tukunia, A ka cava beka koya? a cava beka nai vavuvuli vou koya? ka ni sa varotia vaturaga ko koya vi ira na yalo velavela, a ra sa talai rawarawa vua. ²⁸ A sa rogovakia sara na kenai rogorogo ki na viyasana kece lia sa vavolivoliti Kalili. ²⁹ Ia ni ratou sa qai tani ena valenilotu, eratou sa curu sara ki na vale i Saimoni ki Adriu, ko iratou kei Jemesa kei Joni. ³⁰ A sa davo na tina ni wati i Saimoni ni sa tauvi-katakata, a ra sa tukunia koya sara vua. ³¹ A sa qai vua ko koya ka tauria na ligana, ka vaduria cake: a sa takali vasauri na nona katakata, a sa qaravi iratou ko koya. ³² Ia ni sa raiyavi mai, ni sa dromu na siga, sa yadi mai vi koya ko ira kece lia sa tauvi-mate, ki ira ka curumi ira na tevoro eso. ³³ A ra sa soqoni vata kece lia na lewe ni koro e mata ni katuba. ³⁴ A sa vabula ko koya na lewe levu sa duidui na mate sa tauvi ira, ka vasevi ira na tevoro e lewe levu, a sa yali ni daini ira na tevoro me ra vosa, ni ra sa kilai koya. ³⁵ Ia ni sa savulaci caca sa cavu tu ko koya, a sa qai ki tuba, ka qai ki na dua na yasana lala, ka masu kinia. ³⁶ A ratou sa muri koya ko Saimoni, ki iratou eratou sa tiko vata kaya. ³⁷ Ni ratou sa qai raicia, eratou sa tukunia vua, Sa vaqarai ikonu na tamata kece lia. ³⁸ A sa tukunia vi iratou, Tou qai ki na vikoro sa voleka, meu vunau voki lia kinia: sa ka lia koya kau sa qai mai kinia. ³⁹ A sa dauvunau ko koya ena nodra vivale ni lotu mai Kalili taucoko, ka tovoci ira tani na tevoro. ⁴⁰ A sa qai mai vi koya e dua na vukavuka, ka vamasutia, ka tekiduru vua, ka tukunia vua, Kevaka ko ni sa vinakatia, ko ni sa vasavasavataki au rawa. ⁴¹ A sa yalololoma ko Jisu, ka dodokia na ligana, ka tarai koya, ka tukunia vua, Au sa vinakatia; mo savasava mai. ⁴² Ia ni sa vosa oti, sa takali vasauri vua na vukavuka, a sa savasava mai ⁴³ A sa varotia matua vua ko koya, ka vatala sara yani; ⁴⁴ a sa tukunia vua, Raicia, mo kakua ni tukunia vua e dua: ia mo qai varaitaki iko vua na bete, ka vacaboya na ka sa varotia ko Mosese me nomui vasavasavataki, mei vadinadina vi ira. ⁴⁵ A sa qai yani ko koya, ka vatekivu me tukunia valevu, ka vateteya, a sa dredre kinia vi Jisu me curu votu ki na koro, sa tiko lia enai bili ena viyasana lala: a ra sa qai mai na viyasana kece lia vi koya.