¹ Koi au ko Jemesa, nai talatala ni Kalou ki na Turaga ko Jisu Karisito sa loloma yani vi ira na yavusa e tinikarua era sa Duiveiseyaki. ² Oi ikodou na wekaqu, dou nanumia me ka ni reki sara, ni dou sa lutu ki na ka e levu sa dauvivatovolei; ³ ni dou sa kila sa vatuburia na dauvosotia na vatovolei ni nomudou vabautia. ⁴ Ia me tini vinaka na cakacaka ni dauvosotia, mo dou vinaka taucoko sara kinia, me kakua na ka e yali. ⁵ Ia kevaka sa lailai na vuku vua e dua vi ikodou, me kerea vua na Kalou, o koya sa solia valevu kivei ira kece lia na tamata, a sa yali ni dauvivadirideini; ka na soli lia vua. ⁶ Ia me kerekere e na vabauta, me kakua ni vatitiqa: ko koya sa vatitiqa, sa vaka na ua ni waitui, sa cagina e na cagi ka vitubuyaki. ⁷ Ia me kakua ni nanumia na tamata gona ni na rawatia e dua na ka mai vua na Turaga: ⁸ a tamata lomalomarua, sa yamekemeke na nonai valavala kece lia. ⁹ Ia me marau na tamata dravudravua e na nona laveti cake: ¹⁰ vata ki koya e vutuniyau, e na nona malumalumu mai: ni na takali lia ko koya me vaka na se ni co. ¹¹ Ni sa cabe cake na siga ki na cagi katakata, ka sa varaqosatakia sara na co, a sa mira na sena, a sa seavu na kena rairai vinaka: ena malai yani vakinia na tamata vutuniyau e na nonai valavala. ¹² Sa kalougata na tamata sa vosotia ni sa vatovolei, io, ni sa vatovolei oti, ena rawatia nai sala ni bula o koya sa yalatakia na Turaga kivei ira sa lomani koya. ¹³ Ni sa dauveretaki e dua, me kakua ni tukunia, Sa dauveretaki au na Kalou: ni sa yali ni dauveretaki rawa na Kalou ki na ka ca, a sa yali ni dauveretakia e dua na tamata ko koya: ¹⁴ ni sa dauveretakia na tamata yadua mai na ka e vinakatia, ni sa vecei koya na nona garogaro ca ka bacani koya. ¹⁵ Ni sa kunekune na gagadre ca, sa vasucumia nai valavala ca; ia nai valavala ca gona ni sa taucoko na kena tubu sa qai vasucumia na mate. ¹⁶ Dou kakua ni vacalai, oi ikodou na wekaqu lomani. ¹⁷ Sa qai mai colo nai solisoli vinaka kece lia vata kei nai solisoli kece lia e yaga sara, a sa qai sobu mai vua na Tama ni rarama, a sa yali vua na veivukiyaki, se yaloyalo ni veigoleyaki. ¹⁸ Sa vatuburi ita ko koya e na nona lewa lia e na vosa ni dina, me da vaka nai sevu ni veika sa bulia ko koya. ¹⁹ O koya koya, oi ikodou na wekaqu lomani, mo dou kusarawa yadua ena varorogo, mo dou berabera lia ni vosa, mo dou berabera ni cudru: ²⁰ ni sa yali ni vatuburia na ka e dodonu vua na Kalou na cudru ni tamata. ²¹ O koya koya mo dou qai dainia tani na dukadukali kei na ka ca e uasivi tu, ka vabautia e na yalomalua na vosa sa tei e na lomamudou, ko ya sa vabula rawa na yalomudou. ²² Ia dou muria na vosa ka kakua ni rogocia lowa lia, ka vaisini ikodou kinia vakai ikodou. ²³ Ia kevaka e dua sa rogocia lowa lia na vosa, ka yali ni muria, sa tautauvata ki na tamata sa qai ilovia na mata ni yagona e nai iloilo: ²⁴ ni sa ilovi koya oti, a sa qai qai tani yani, a sa guilecavia vasauri se sa vaevei nai rairai ni yagona. ²⁵ Ia ko koya sa varaicia matua na vunau sa vinaka sara, na vunau ni veisereki, ka tu dei kinia, sa yali ni daurogocia ka guilecavia, ia sa caka voki lia na cakacaka, ena kalougata kinia ko koya koya e na nona cakacaka. ²⁶ Kevaka e dua vi ikodou sa nanumia ni sa lotu, ia ka yali ni tarovia na yamena, ia ka sa dauvakaisinia lia na yalona, sa ka loa lia na nona lotu na tamata koya. ²⁷ Na lotu savasava ka yali ni cala e mata ni Kalou ko Tamada sa vakoya, Me sa dauraici ira na luveniyali kei ira na yada, ni ra sa rarawa, me sa qarauni koya voki lia me kakua ni tauvi koya na duka ni ka vavuravura.