¹ O koya koya, e dodonu me da vananumia valevu sara kinia na ka eda a rogocia, de dua na siga e yali kinia vi ita. ² Ia kevaka ka vadinadinatakia na vosa era a tukunia ko ira na agilose, ka sa saumia vadodonu nai valavala ca kei na talaidredre kece lia; ³ eda na bula vaevei koi ita, kevaka eda sa vaweleweletakia na bula levu koya; o koya sa vatekivunia na Turaga me tukunia, ka vadinadinatakia mai kivei ita ko ira era a rogocia; ⁴ ni sa vadinadinatakia tiko lia vi ira na Kalou, enai vatakilakila eso kei na ka e vivakurabuitaki eso kei na cakacaka mana e levu, kei nai votavota ni Yalo Tabu, me vaka na lomana? ⁵ Ni sa yali ni solia ko koya vi ira na agilose me ra lewa na vuravura ena muri mai, o koya kitou sa vosatakia. ⁶ A sa vatakila e dua ena dua na tikinia, ka tukunia, A cava na tamata, mo nanumi koya kinia? Se na luve ni tamata, mo dautalevi koya kinia? ⁷ Ko sa buli koya me uasivi sobu valailai lia vi ira na agilose: Ko sa vaisalatakia e nai ukuuku kei na varokoroko, ka lesia me lewa na cakacaka ni ligamu: ⁸ Ko sa vamalumalumutakia na ka kece lia me tu e ruku ni yavana. Ia ni sa vamalumalumutakia vua na ka kece me lewa kinia, sa yali ni vo e dua na ka me yali ni vamalumalumutakia vua. Ia eda sa yali ni raicia ni kua ni sa vamalumalumutakia vua na ka kece lia me lewa kinia. ⁹ Ia eda sa raici Jisu lia, sa caka me uasivi sobu valailai lia vi ira na agilose, sa qai vaisalataki enai ukuuku kei na varokoroko, ena vuku ni sa vosotia oti na mate; me sa mate ko koya ena vuku ni tamata kece lia, me vaka na loloma ni Kalou. ¹⁰ Ni sa kilikili ki koya, sai taukei ni ka kece lia, ka sa vavunia na ka kece lia, ni sa vayadia na luvena e lewe levu ki na vanua vaiukuuku, me varautaki koya ena dauvosotia me sa nodra vu ni bula. ¹¹ Ni sa dua bau lia na Tamadra, ko koya sa vasavasavatakia kei ira era sa vasavasavataki: ia e na vuku ni ka koya sa yali kinia ni madua ko koya me vatokai ira me ra tacina; ¹² ni sa tukunia, Au na tukunia na yacamuni vi ira na taciqu; Ena kedra maliwa nai soqosoqo lewe ni lotu ka'u na varokorokotaki ikonu ena sere. ¹³ Sa tukunia voki, Au na vararavi vi koya. Sa tukunia voki lia, Raicia o au kei ira na gone sa solia mai vi au na Kalou. ¹⁴ Ia ni sa lewe vata ka dra vata ko ira na gone, sa yaco voki lia ko koya me vakinia; me vamalumalumutaki koya kinia sa lewa na mate, o koya na tevoro, ena vuku ni mate; ¹⁵ me sereki ira voki lia era vaka na bobula ena nodra bula voli taucoko ni ra sa rerevakia na mate. ¹⁶ Ni sa yali sara ni mai vukei ira na agilose ko koya; sa mai vukei ira lia na kawa i Eparaama. ¹⁷ O koya koya sa kilikili kinia ki koya, me yaco me vataki ira na wekana ena ka kece lia, me bete levu yalovinaka ka lomadina ena veika ni Kalou, me sorovakia na nodra i valavala ca na tamata. ¹⁸ Ni sa vosotia na ka ca ko koya, ni sa dauveretakia, sa mai rawatia kinia me vukei ira era sa dauveretaki.