¹ Sai ira na parofita ka vosa kinia eliu na Kalou vi ira na matua, ena gauna e levu, kei nai valavala e levu: ² ia sai koya na Luvena sa vosa kinia vi ita ko koya, ena gauna mai ki muri koya; o koya sa lesia ko koya mei taukei ni ka kece lia, o koya sa bulia voki lia kinia na vuravura kece lia; ³ ko koya sa cila kinia na nona serau kei na yaloyalo ni nonai tovo, a sa tokonia na ka kece lia ena nona vosa mana, a sa tiko sobu ena liga i matau i Koya sa levu mai colo sara, ni sa vuya laivi oti vataki koya na nodai valavala ca; ⁴ ni sa yaco me uasivi cake vi ira na agilose, ni sa taukenia na yaca sa uasivia na yacadra. ⁵ Io, ko cei vi ira na agilose sa tukunia vua ko koya ena dua na siga, A Luvequ ko iko, au sa vatuburi iko ena siga koya? sa tukunia voki, Au na Tamana koi au, ena Luvequ ko koya? ⁶ Ia ni sa yadia mai ko koya na Ulumatua ki vuravura, sa tukunia, Me cuva vi koya ko ira kece lia na agilose ni Kalou. ⁷ Ia ena vukudra na agilose sa tukunia ko koya, Ko koya sa qisi ira na nona agilose me cagi, kei ira na nonai talatala me yameyame ni buka. ⁸ Ia ena vuku ni Luvena, ena yali ni mudu na nomuni tikotiko vaturaga, oi ikonu na Kalou: Sai titoko ni caka dodonu nai titoko ni nomuni matanitu: ⁹ Ni ikonu sa vinakatia nai valavala dodonu, ka catia nai valavala ca, Sa lumuti ikonu kinia na Kalou, a nomuni Kalou, Ena waiwai ni reki mo ni uasivi cake sara kinia vi ira na nomuni tokani. ¹⁰ Ia, Koi ikonu Turaga, ko ni a tauyavutaki vuravura enai vatekivu; Ia na cakacaka ni ligamuni ko lomalagi: ¹¹ Ena rusa koya; ia koi ikonu ena tiko lia: Ia ena madra mai koya kece lia me vaka nai sulu: ¹² O ni na lobia voki lia me vaka nai tutuvi, ka na vaisosomitakia: Ia koi ikonu sai ikonu tiko lia, Ia ena yali ni bau mudu na nomuni viyabaki. ¹³ Ia ko cei vi ira na agilose sa tukunia vua ko koya ena dua na siga, Mo tiko ena ligaqu i matau, Ka me'u qisi ira oti mada na nomu meca mei tutu ni yavamu? ¹⁴ Era sa yali li ni yalo dauviqaravi ko ira kece lia, sa talai yani me qaravi ira era na yaco emuri mei taukei ni bula?