¹ Me'u tinia, ikodou na viwekani, dou masulaki kitou, me cici yani na Vosa ni Turaga, ka me dokai tiko, me vaka vi ikodou: ² ka me kitou vabulai voki lia mai vi ira na tamata ena yalo vatani ka ca; ni sa yali vi ira kece lia na vabautia. ³ Ia sa lomadina na Turaga, o koya ena vataudeitakia vi ikodou ka maroroi ikodou mai na ca. ⁴ Ia kitou sa vadinatia na Turaga ena vukumunu, ni dou sa qai caka ka dou na caka voki lia i muri na vi ka kitou sa varotia vei ikodou. ⁵ Ia me tuberia mada na yalomudou na Turaga ki na loloma ni Kalou, ki na dauvosotia me vataki Karisito. ⁶ Ia kitou sa varotia vi ikodou, na viwekani, ena yaca ni noda Turaga ko Jisu Karisito, mo dou kakua ni tiko vata kaya e dua vei ira na viwekani sa dau ia nai valavala vatani; ka yali ni vaka nai vavuvuli era sa rogocia vi kitou. ⁷ Ni dou sa kila sa kilikili vi ikodou mo dou vadamurimuri kitou; ni kitou a yali ni valavala vatani ena ikodou maliwa; ⁸ ka kitou a yali ni kana loa lia vua e dua na tamata, ia kitou a oga ka oca ena bogi ki na siga, me kitou kakua kinia ni vabibitakia e dua vi ikodou. ⁹ E yali ni dodonu vi kitou, ia me kitou sa nomudou i varau lia mo dou vadamurimuri kitou. ¹⁰ Ia, ni kitou a tiko ki ikodou, sa nitou i varo koya vi ikodou, me kakua ni kana ko koya sa yali ni cakacaka. ¹¹ Ni kitou a rogocia ni sa so vi ikodou, era caka tiko nai valavala vatani, era sa yali sara ni cakacaka, a ra sa makutu vatani. ¹² Ia ko ira era sa vakoya kitou sa varotia ka vamasutia ena vuku ni noda Turaga ko Jisu Karisito, me ra tiko vamalua ka daucakacaka, ka kania lia na kedra. ¹³ Ia ko ikodou, na viwekani, dou kakua ni cegu oca ena cakacaka vinaka. ¹⁴ Ia kevaka e dua sa yali ni talairawarawa kina nitou vosa enai vola koya, dou vatakilakilatakia na tamata ko ya, ka kakua ni tiko vata kaya, me madua kinia ko koya. ¹⁵ Ia dou kakua lia ni nanumia koya me meca, ia mo dou vatavulicia lia me vaka sa wekamudou. ¹⁶ Ia na Turaga ni vivacegui me solia tiko lia vi ikodou na vacegu ena ka kece lia. Me tiko vata ki ikodou kece lia na Turaga. ¹⁷ Au sa loloma yani koi au ko Paula, kau sa vola ena ligaqu dina, o ko ya na kenai vadinadina enai vola kece lia au sa vola vakinia. ¹⁸ Me nomudou kece lia na loloma ni noda Turaga ko Jisu Karisito. Emeni.