¹ Ia keitou sa qai vamasuti ikodou, na viwekani, ena vuku ni nona qai voki mai na noda Turaga ko Jisu Karisito, ki na noda soqoni vata vi koya, ² mo dou kakua vitosoyaki vasauri mai na loma dei, se vataqayataki, me kakua ena vuku ni vosa ni yalo, se nai tukutuku, se nai vola, me vaka sa vu vei itatou, me vaka sa voleka dina mai na siga i Karisito. ³ Me kakua sara e dua na ka me vakaisini ikodou kinia e dua; ni na yaco mada e liu na vuki tani, ka na varaitaki mada na tamata ni valavalaca, a luve ni veivarusai;. ⁴ O koya sa dau voratia, a sa valevulevui koya me uasivi ena ka kece lia sa vatokai me Kalou, se dauqaravia, sa tiko kinia ko koya ena vale ni Kalou; a sa varaitaki koya me Kalou. ⁵ Dou sa yali beka ni nanumia; ni'u ma tukunia vi ikodou na veika koya, ni'u na tiko vata ki ikodou. ⁶ Ia dou sa qai kila na ka sa tarovia, me varaitakia mai kinia ko koya ena kena gauna. ⁷ Ni sa cakacaka vavuni ni kua na ca,:ia sa dua e tarovia tiko lia, ka warakia me yadi tani ko koya. ⁸ Ena qai varaitakia na vuni ca ko koya, o koya ena va rusa na Turaga enai cegu ni gusuna, ka vaotia ena nona rairai mai. ⁹ Sa vaka na cakacaka i Setani na nona qai mai, ia ena kaukauwalevu vata na vivatakilakila ki na vi ka vailasu e vivakurabuitaki, ¹⁰ ki na ka e yali ni dodonu sa vivacalai vi ira era sa rusa; ni ra sa bese ni lomania na dina, me ra bula kinia. ¹¹ Ena vuku ni ka koya, sa tala tiko na vivacalai mana vi ira na Kalou, me ra vadinatia kinia na ka e yali ni dodonu. ¹² Me cudruvi kinia ko ira kece lia era sa yali ni vabautia na ka dina, a ra sa vinakatia lia na ka e yali ni dodonu. ¹³ Ia sa kilikili ki kitou me kitou ia tiko lia na vavinavinaka vua na Kalou ena vukumunu, na viwekani, oi ikodou sa lomania na Turaga, ni sa digitaki ikodou na Kalou mai nai vatekivu mo dou bula ni dou sa vasavasavataki ena Yalo Tabu, ka dou na vabautia na ka dina: ¹⁴ ka sa kacivi ikodou kinia ko koya enai tukutuku vinaka, mo dou rawatia kinia na kena kalougata ni noda Turaga ko Jisu Karisito. ¹⁵ O koya monu tudei na viwekani, ka tauria tiko nai tukutuku dou sa vavulici kinia mai vi kitou, ena vosa se nai vola. ¹⁶ Ia noda Turaga ko JIsu Karisito, kei na Kalou ko Tamada, o koya sa lomani ita, ka solia vei ita ena loloma na vakacegu sa yali ni mudu kei nai nuinui vinaka, ¹⁷ Me vakaceguya mada na yalomunu ka vataudeitaki ikodou ena vosa ki na cakacaka vinaka kece lia.