¹ Oi kitou ko Paula ki Silivenuse, ki Timoci, ki nai soqosoqo lewe ni lotu mai Cesalonaika era sa tu vua na Kalou ko Tamada ki na Turaga ko Jisu Karisito. ² Me nomunu na loloma, ki na vacegu, mai vua na Kalou ko Tamada ki na Turaga ko Jisu Karisito. ³ Sa kilikili ki itatou me ia tiko lia na vavinavinaka vua na Kalou ena vukumunu, na viwekani, ni sa dodonu lia koya, ni sa tubu valevu sara na nomunu vabautia, a sa uasivi cake na nomunu vilomani vataki ikodou yadua; ⁴ ia kitou sa vacaucautaki ikodou vi ira na visoqosoqo lewe ni lotu ni Kalou, ena vuku ni nomunu loma dei ki na nomunu vabautia ena nomunu vacacani kece lia, ki na vararawatakia, dou sa vosotia. ⁵ Koya nai vatakilakila ni lewa dodonu ni Kalou, monu vabau kinia monu yaga me rawatia na matanitu ni Kalou, o koya dou sa vararawatakia voki lia kinia. ⁶ Ni sa dodonu vua na Kalou me saumi ira varawarawa era sa vararawataki ikodou; ⁷ ia vi iko dou voki lia sa vararawatakia, me vacegui vata ki kitou, ni na varaitakia mai lomalagi na Turaga ko Jisu ki ira vata kaya na nona agilosi kaukauwa, ⁸ e na yameyame ni bukawaqa, me cudruvi ira era sa yali ni kila na Kalou, a sa yali ni vabautia nai tukutuku vinaka ni noda Turaga ko Jisu Karisito: ⁹ Sa nodra cudruvi na vivarusai yali mudu mai na mata ni Turaga; mai na nona kaukauwa vaidina voki lia. ¹⁰ ni na qai mai ena siga koya me varokorokotakia ko ira na nona tamata yalo savasava, ka me dokai koya ko ira kece lia era sa vadinatia, ena siga koya, (ni sa vadinatia na neitou tukutuku vi ikodou.) baletia na nitou tukuni yalo vi ikonu sa vabautia. ¹¹ o koya koya keitou sa masulaki ikodou voki lia; me vabauti ikodou na neitou Kalou mo dou yaga me rawatia na ka dou a kacivi kinia; ka me vayacori sara ena kaukauwa na gagadre vinaka kece lia, ki na cakacaka ni vabautia: ¹² me vacaucautakia kinia na yaca ni noda Turaga ko Jisu Karisito e na vukumudou, koi ikodou voki lia e na vukuna, me vaka na loloma ni noda Kalou ki na Turaga ko Jisu Karisito.