¹ Koya nai katolu ni noqu qai yani vi ikodou. Ena vadinadinataki na vosa kece lia ena gusu ni vadinadina e lewe rua, se lewe tolu. ² Au a vasalatakia eliu, kau sa qai vasalatakia, ia koya, niu me vaka enai karua ni noqu tiko vi ikodou; ia koya, niu sa tiko tani, au tukunia vi ira sai valavala ca eliu, kei ira kece lia na tani, kevaka kau na qai voki yani, kau na yali ni vosotia: ³ ni dou sa qara e dua nai vadinadina ni sai Karisito kau sa vosa kinia, ko koya sa yali ni malumalumu vi ikodou, ia sa kaukauwa lia vi ikodou: ⁴ ni sa vakoti ki na kauveilatai ko koya ni sa malumalumu, ia sa qai bula ena kaukauwa ni Kalou. Kitou voki lia, kitou sa malumalumu vata kaya, ia kitou na bula vata kaya ena kaukauwa ni Kalou vi ikodou. ⁵ Dou dikevi ikodou, se dou tu e na vabautia, se yali; vatovolei ikodou. Dou sa yali beka ni kila ikodou, ni sa tiko vi ikodou ko Jisu Karisito? de dou sa yali dina ni vabau. ⁶ Ia kau sa dinatia ni dou na kila ni kitou sa yali voki lia ni wili. ⁷ Ia kitou sa masu vua na Kalou, mo dou kakua sara lia ni valavala ca; e yali me kitou rairai kinia ni kitou sa vinakati kinia, mo dou caka lia na ka e dodonu, io, kevaka kitou sa yali ni wili. ⁸ Ni kitou sa yali ni rawatia e dua na ka me tarovi kinia na dina, me totakia lia na dina. ⁹ Ni itatou sa reki, ni itatou sa malumalumu voki lia, ka kaukauwa koi ikodou; ia na ka voki lia koya itatou sa masulakia mo dou vinaka sara. ¹⁰ O koya koya, kau sa vola kinia na vi ka koya niu sa tiko tani, deu ia na lewa rarawa ni da sa tiko vata, me vaka na kaukauwa sa solia mai vi au na Turaga me ia kinia na vivatataki, me kakua lia na vivarusai. ¹¹ Meu tinia, koi ikodou na viwekani, mo dou vinaka! Mo dou vinaka taucoko, mo dou vacegui sara, mo dou lomavata, mo dou vivinakati tiko lia; ia ena tiko vata kei ikodou na Kalou ni loloma kei na vacegu. ¹² Dou vilomani ka vireguci ena yalosavasava. ¹³ Sa loloma yani vi ikodou ko ira kece lia era sa lotu. Me tiko vi ikodou kece lia na yaloloma ni Turaga ko Jisu Karisito, kei na loloma ni Kalou, kei na vilomani ni Yalo Tabu. Emeni.