¹ Oi au ko Pita, nai apositolo i Jisu Karisito, kivei ira era tiko vavulagi ni ra sa dui se kei Ponito, kei Kalatia, kei Kapatosia, kei Esia, kei Picinia, ² era sa digitakia tu me vaka na nona lewa eliu na Kalou ko Tamada, me ra vasavasavataki ena Yalo Tabu, me ra talairawarawa kinia me kureitakia voki lia kivei ira na dra i Jisu Karisito: Me valevutakia vi ikodou na loloma, kei na vacegu. ³ Me caka na vavinavinaka vua na Kalou, na Tama ni noda Turaga ko Jisu Karisito, o koya sa vatuburi ita voki lia me noda nai nuinui bulabula me vaka na nona loloma levu ni sa tu cake voki lia mai na mate ko Jisu Karisito, ⁴ me da taukenia kinia nai votavota sa yali ni ca rawa, a sa yali ni dukadukali, a sa yali ni malai mai, sa maroroi mai lomalagi me nomudou, ⁵ oi ikodou sa maroroi e na kaukauwa ni Kalou e na vuku ni vabautia ki na bula sa varau tu me varairaitaki e na gauna maimuri. ⁶ Ia sa ka koya dou sa reki valevu kinia, ia e na gauna lekaleka koya, ke sa yaga, dou sa vararawataki e na dauvere e levu: ⁷ me sa raicia kinia na nomudou vabautia ni sa vatovolei, me talei valevu sara lia ka talei valailai na koula sa caca rawa ni sa vatovolei e na bukawaqa, me ka ni vavinavinaka, ka me dokai ka me vacaucautaki, ni na rairai mai ko Jisu Karisito: ⁸ o koya dou a yali ni raicia, ia dou sa lomana lia; o koya dou sa yali ni raicia ni kua, ia dou sa vabauta lia, ka reki e na reki e yali ni cavutia rawa ka vinaka sara lia: ⁹ ni dou sa rawatia na kenai tinitini ni nomudou vabautia, io, na bula ni yalomudou. ¹⁰ A bula koya era sa tarogia ko ira na parofita ka vaqara matua, o ira era sa parofisaitakia na loloma ena nomudou: ¹¹ ni ra sa vaqara se gauna cava, se vaevei na gauna sa vatakila vi ira na Yalo i Karisito sa tiko e na lomadra, ni sa tukunia mada eliu na rarawa i Karisito kei na ka vinaka sara lia ena qai muri mai. ¹² A sa vatakilai vi ira, ni sa yali loa lia e na vukudra, ia ena vukuda era sa yaco me rai talatala e na veika sa qai tukunia mai vi ikodou ko ira era sa vunautakia vi ikodou nai tukutuku-vinaka, kei na Yalo Tabu sa talai mai lomalagi; a veika koya era sa gadrevia ko ira na agilose me ra dikevia. ¹³ O koya koya mo dou qai vaucia na tolo ni lomamudou, dou yalomatua, ka vanuinui tiko me yaco mada nai vataotioti, mo dou rawatia kinia na loloma ena yadi mai vi ikodou ni na rairai mai ko Jisu Karisito; ¹⁴ me vaka na gone e dautalairawarawa, dou kakua ni vatauvatani ikodou kei na gagadre ca eliu ni dou a lialia: ¹⁵ ia ni sa yalosavasava ko koya sa kacivi ikodou, dou yalosavasava voki lia koi ikodou e nai valavala kece lia; ¹⁶ ni sa volai, Dou yalosavasava; niu sa yalosavasava koi au. ¹⁷ Ia kevaka dou sa masu vua, me vaka sa Tamamudou, o koya sa lewai ira yadua me vaka na ka era a caka, ka yali ni digitakia vailoa e dua, me sa ia e na rere na nomudou i valavala, e na gauna dou sa vulagi tu kinia; ¹⁸ ni dou sa kila dou a yali ni voli e na veika e caca loa lia, e na siliva se na koula, mai na nomudou i valavala sesewa dou sa rawatia mai vi ira na nomudou matua; ¹⁹ e na dra talei lia i Karisito, me vaka na lami sa yali ni ca e dua na tikina; ²⁰ o koya sa lesi eliu sa qai tauyavutakia emuri ko vuravura, a sa qai varaitakia e na gauna emuri koya e na vukumudou, ²¹ ia sai koya dou sa vabautia kinia na Kalou, o koya ka vaturi koya cake voki mai na mate, ka solia vua nai ukuuku; me sai koya lia na Kalou dou sa vabautia ka vanuinui kinia. ²² Dou vasavasavatakia na yalomudou ni dou sa talairawarawa ki nai vavuvuli dina e na vuku ni Yalo Tabu, mo dou lomani ira kinia na viwekani e na loloma yali ni lasu ia dou vilomani vakai ikodou e na yalosavasava kei na lomakatakata: ²³ ni dou sa sucu voki lia, sa yali e na sila e vuca rawa, koya lia sa yali ni vuca rawa, e na vosa ni Kalou, sa bula ka tu dei ka yali ni mudu. ²⁴ Ni sa vaka na co na tamata kece lia, A sa vaka na se ni co nai ukuuku kece lia ni tamata. Sa daumalai na co, a sa mira na sena: ²⁵ Ia na vosa ni Kalou sa tu dei ka yali ni mudu. Ia koya na vosa ni tukutuku-vinaka sa vunautaki vi ikodou.