Wase 1

1 Koi au ko Paula, nai talatala ni Kalou, kei nai apositolo i Jisu Karisito, ena vuku ni nodra vabautia sa digitaki ira na Kalou, ki na vatusa nai vavuvuli dina sa va Kalou; 2 me vanuinuitakia na bula yali ni mudu, o koya sa yalatakia eliu na Kalou, o koya sa yali ni lasu rawa, a sa qai vatekivu emuri ko vuravura; 3 a sa qai varaitakia na nona vosa ena kena gauna ni sa vunautakia, ka'u sa lesi kinia me'u caka me vaka na nona vosa na Kalou na nodai Vabula; 4 Taito na luvequ dina me vaka na vabautia sa tu vi ita kece lia: Me sa nomu na loloma, na yalololoma, na vacegu, mai vua na Kalou ko Tamada kei na Turaga ko Jisu Karisito na nodai Vabula. 5 Au a daini iko mai Kiriti, mo vadodonutakia na veika sa vo, ka mo lesia nai talatala qase ki na vikoro yadua, me vaka ka'u a varotia vi iko: 6 kevaka e dua sa yali ni cala, sa vawati vadua, a ra sa vabautia ko ira na luvena, a sa yali ni beitakia vi ira nai valavala vatani, se na talaidredre. 7 Ni sa dodonu me yali ni cala nai talatala qase, me vaka sai talatala ni Kalou; me kakua ni domoqa, me kakua ni daucudrucudru, me kakua ni dausomi waini, me kakua ni dauviba, me kakua ni dau domonia nai yau vasisila: 8 me dau vacegui ira na vulagi, me dau lomani ira na tamata vinaka, me yalomatua, me yalododonu, me yalosavasava, me bula vaivarau; 9 me tauria matua nai vavuvuli dina sa vatavulici kinia, me rawatia ko koya me varotia nai vavuvuli sa vinaka, ka vunauci ira voki lia era sa vosa vatani. 10 Ni ra sa lewe levu era sai valavala vatani, era sa dau talanoa lowa lia ka dau vivakaisini, ka vaka voki lia kinia ko ira na cili; 11 ia ka sa dodonu me ra vagalui, ni ra sa vacalai ira kece na lewe-ni-vale eso, ni ra sa vatavulicia na ka sa yali ni kilikili, ena vuku ni yau vasisila. 12 E dua vi ira, a nodra parofita, sa tukunia, A nodra i tovo lia na kai Kiriti mera dau lasu, era manumanu ca, era sa dau kana ka vucesa. 13 Sa dina nai tukutuku koya. O koya gona mo qai vunauci ira vadodonu, me vinaka kinia na nodra vabauta; 14 me ra kakua ni nanumia nai tukuni loa lia va-Jiu, se na nodra vi varo na tamata era sa lesu tani mai nai vavuvuli dina. 15 Sa savasava na ka kece lia vi ira era sa yalosavasava: ia vi ira era sa dukadukali ka yali ni vabautia sa yali na ka sa savasava; ia sa dukadukali na nodra lewa-eloma ki na yalodra voki lia. 16 Era tukunia era sa kila na Kalou: ia ena nodra i valavala era sa cakitakia, ni ra sa tamata vasisila, ka talaidredre, ka yali ni yaga ki na dua na cakacaka vinaka.