¹ Ia ko iko, mo tukunia na veika sa kilikili ki nai vavuvuli dina: ² me ra yalo mamakutu ko ira na matua, me ra yalo qaseqase, me ra yalomatua, me vinaka kinia na nodra vabauta, me ra daulomasoli, me ra dauvosotia. ³ O ira voki lia na yalewa matua, me ra dauia nai valavala sa kilikili kei ira era sa yalosavasava, me ra kakua voki lia ni dauvibeitaki vakailasu, me kakua ni dau somi waini, me ra dau vavulicia na ka vinaka; ⁴ me ra vayalomatuataki ira na yalewa era tamata bula, me ra lomani ira na watidra, me ra lomani ira voki lia na luvedra, ⁵ me ra lomavuku, me ra lomasavasava, me ra dautiko mai nodratou, me ra yalovinaka, me ra dau talairawarawa vi ira na watidra, me kakua kinia ni vosavacacatakia na vosa ni Kalou. ⁶ Varotia vi ira voki lia na cauravou me ra yalomatua. ⁷ Ia ena ka kece lia mo sai varau ena cakacaka vinaka: me kakua ni cala na nomu i vavuvuli, mo yalo qaseqase, mo yalo savasava; ⁸ mo vosa vadodonu tiko ko ya ena yali ni lewai me ca; me madua kinia ko koya sa to tani, ni sa yali na ka ca me da beitaki kinia. ⁹ Me ra talairawarawa vi ira na nodra turaga ko ira na tamata, me ra caka na ka kece lia sa vinaka vi ira; ka me ra kakua ni dauvosa voki: ¹⁰ ka me ra kakua sara ni butako, me ra vatakilai ira ni ra sa lomadina, ka vinaka; me ra varogo vinakatakia nai vavuvuli ni Kalou na nodai Vabula ena ka kece lia. ¹¹ Ni sa rairai na loloma ni Kalou, o koya sa vu ni bula vi ira kece lia na tamata; ¹² a sa vavulici ita, me da dainia nai valavala sa yali ni valotu, ki na gagadre ca vavuravura, meda caka nai valavala yalomatua, ka yalododonu, ka valotu, e vuravura ko ya; ¹³ ni da warakia na ka ni vivakalougatataki eda sa nuitakia, ki na nona rairai vaiukuuku na Kalou levu na nodai Vabula ko Jisu Karisito; ¹⁴ o koya ka soli koya ena vukuda, me voli ita mai nai valavala ca kece lia, me vasavasavataki ita vua me da nona tamata talei, ka lomakatakata ena cakacaka vinaka. ¹⁵ A veika ko ya mo vosatakia, ka varotia, ka vivunauci vabibi sara. Me kakua e dua me beci iko kinia.