¹ A sa uvucia nai kalima ni agilose, ia ka'u a raicia e dua na kalokalo sa lutu mai lomalagi ki vuravura: a sa soli voki lia vua nai dola ki bulubulu e yali ni vabotona. ² A sa dolavia ko koya nai bulubulu e yali ni vabotona; a sa kuvu cake na kubou mai bulu, me vaka na kubou ni lovo levu; a sa butobuto na mata-ni-siga, ki na macawa, e na vuku ni kubou sa kuvu cake mai bulu. ³ A sa qai tani mai na kubou na vodre me tiko e vuravura: a sa soli vi ira na kaukauwa, me vaka na nodra kaukauwa na batibasaga ki vuravura. ⁴ A sa varotia vi ira me ra kakua ni vacacania na co e vuravura, se dua na ka karakarawa, se dua na kau; ko ira lia na tamata sa yali ni volai e na yadredra nai vatakilakila ni Kalou. ⁵ A sa soli vi ira me ra kakua ni vamatei ira, ka me ra vararawataki ira lia ka vula lima: ia na nodra rarawa e vaka na rarawa ni sa katia na tamata na batibasaga. ⁶ E na siga koya era na domomate ko ira na tamata, ia ena yali ni yacovi ira: era na gadrevia me ra mate, ia ena dro tani maivi ira na mate. ⁷ Ia na kedrai rairai na vodre sa vaka na ose sa varau me qai ki valu: ia sa toka e uludra na ka sa vaka nai sala koula, ia na matadra sa vaka na mata ni tamata. ⁸ Ia na drau ni uludra sa vaka na drau ni ulu ni yalewa, ia na batidra sa vaka na batidra na laioni. ⁹ Ia nai sasabai ni lomaseredra, sa vaka nai sasabai kaukamea ni seredra; ia na cakucaroba ni tabadra sa vaka na vadugu ni qiqi-ni-valu, ki na ose e vuqa ni ra sa cici ki nai valu. ¹⁰ Ia na buidra sa vaka na bui ni batibasaga, a sa tiko e buidra na batidra: a ra sa rawatia kinia me vararawataki ira na tamata ka vula lima. ¹¹ Ia sa dua na nodra tui, na agilose ni bulubulu e yali ni vabotona, a yacana e na vosa va-Iperiu ko Apatoni, ia na yacana e na vosa va-Kirisi ko Apolioni. ¹² Sa dua na ka ca sa oti; ia ka raicia, sa rua voki na ka ca sa bera ni qai mai. ¹³ Ia sa uvucia nai kaono ni agilose, ia ka'u sa rogocia e dua na vosa mai na tutuna momoto vava ni cabocabo-ni-soro koula sa tu e na mata ni Kalou, ¹⁴ sa tukunia vua nai kaono ni agilose sa tauria na davui, Sereki iratou na agilose e lewe va, eratou sa vesu tu mai na uciwai levu ko Uferetisi. ¹⁵ A sa sereki ko iratou na agilose e lewe va, a ratou sa varau me dua na nodratou aua, ka dua na nodratou siga, ka dua na vula, ka dua na yabaki, me ratou vamatea nai katolu ni wase ni tamata. ¹⁶ Ia na kedrai wiliwili nai valu sa rua na drau na milioni era sa vodo ose: ia ka'u a rogocia na kedrai wiliwili. ¹⁷ Ia ka'u a raici ira na ose va koya e na raivotu, ki ira sa vodo tiko kinia, ai sasabai ni lomaseredra na bukawaqa, ki na vatu damudamu, ki na sulifure: ia na ulu ni ose e vaka na ulu ni laioni; a sa qai tani mai na gusudra na bukawaqa ki na kubou ki na sulifure. ¹⁸ A ra sa vamatei ko ira nai katolu ni wase ni tamata, e na ka ca tolutolu koya, e na bukawaqa, kei na kubou, ki na sulifure, sa qai mai na gusudra. ¹⁹ Ni sa tu na nodra kaukauwa e na gusudra, ki na buidra: ni sa vaka na gata na buidra, a ra sa vaulu, a ra sa caka kinia na ka ca. ²⁰ Ia ko ira na tamata sa vo era sa yali ni vamatei e na mate ca koya, era sa yali ni vivutunitakia na cakacaka ni ligadra, me ra kua ni varokoroko ki na tevoro eso, ki na matakau koula, ki na siliva, ki na parasa, ki na vatu, ki na kau: koya sa yali ni rai rawa, se rogo rawa, se qai voli: ²¹ era sa yali voki lia ni vivutunitakia na nodra daulaba, se na nodra cakacaka vatevoro, se na nodra dauyalewa, se na nodra daubutako.