1
Ia ni sa cecegia oti ko koya nai kavitu ni drega, sa vanomodi ko lomalagi ka oti e dua na veimama ni aua.
2
Au sa raicia na agilose e lewe vitu eratou sa tu e na mata ni Kalou; a sa soli vi iratou e vitu na davui.
3
A sa dua tani voki na agilose sa qai mai ka qai tu e na mata ni cabocabo-ni-soro, a sa tauria na miqa koula; a sa soli valevu vua na ka boivinaka, me caboria vata kei na masumasu ni tamata yalosavasava kece lia e nai cabocabo-ni-soro koula sa tu e na mata ni tikotiko-vaturaga.
4
Ia sa kuvu cake vata na kubou ni ka boivinaka, ki na masumasu ni tamata yalosavasava, mai na ligana na agilose ki na mata ni Kalou.
5
A sa yadia na miqa na agilose, ka vasinaitia e na bukawaqa ni cabocabo-ni-soro, ka dainia ki vuravura: ka sa tubu na kudru ni vosa, ki na kurukuru, ki na livaliva, ki na tavuki ni vanua.
6
Ia ko iratou na agilose e lewe vitu, eratou sa tauria na davui e vitu, eratou sa varautaki iratou me ratou uvucia.
7
O koya na kenai matai sa uvucia, ka sa qai muri mai na uca-cevata sa viwaki vata ki na bukawaqa ki na dra, a sa dai ki vuravura: a sa vakamai kinia nai katolu ni wase ki vuravura, ki nai katolu ni wase ni kau, a sa vakamai kece lia na co drokadroka.
8
Sa qai uvucia nai karua ni agilose, a sa vaka e dua na ulu-ni-vanua levu sa caudre tu e na bukawaqa; sa dai ki na wasawasa a sa vuki kinia me dra nai katolu ni wase ni wasawasa;
9
a sa mate kinia nai katolu ni wase ni ka kece lia sa bula e na wasawasa; a sa varusai voki lia nai katolu ni wase ni viwaqa.
10
Sa qai uvucia nai katolu ni agilose, a sa dua na kalokalo levu sa lutu mai lomalagi, a sa caudre me vaka na cina, a sa lutu ki nai katolu ni wase ni viuciwai, ki na vivurevure-ni-wai;
11
ia na yaca ni kalokalo ko Gagaduvaduva; a sa gaga kinia nai ka tolu ni wase ni wai; a sa lewe levu kinia na tamata sa mate e na wai ni ra sa vagagai.
12
A sa uvucia nai kava ni agilose, a sa yavitia kinia nai katolu ni tiki ni mata-ni-siga, ki nai katolu ni tiki ni vula, ki nai katolu ni wase ni vikalokalo: ia nai katolu ni kena wase vi ira sa vabutobutotaki a sa yali voki lia ni rarama nai katolu ni wase ni siga, ka sa vaka voki lia kinia na bogi.
13
Ia ka'u a raicia, ka rogocia e dua na ikeli sa vuka e na maliwa ki lomalagi, a sa tukunia e na domo levu, E ca, e ca, e ca, vi ira sa tiko e vuravura, e na vuku ni domo ni nodratou davui na agilose e lewe tolu, o koya sa bera ni uvu!