Sa tukunia vi ira ko Paula ni sa vavinavinaka e na vukudra, ka daumasulaki ira, 1-11. Sa tukunia ni sa vacegui ni sa dauvacacani, 12-26. Sa varotia vi ira, ka vacegui ira, 27-30.

1 Oi kirau ko Paula ki Timoci, nai talatala i Jisu Karisito, vi ira kece lia era sa lotu mai Filipai, era sa tu vata ki Karisito Jisu. Ki ira nai talatala qase, ki ira na tuirara: 2 Me nomudou na loloma, ki na vacegu, mai vua na Kalou ko Tamada, ki na Turaga ko Jisu Karisito. 3 Au sa vavinavinaka vua na noqu Kalou e na gauna kece lia kau sa nanumi ikodou kinia, 4 e na visiga kece lia, e na noqu masu kece lia, au sa masulaki ikodou e na marau, 5 ni dou sa lomavata tu e nai tukutuku-vinaka mai nai vatekivu ka yacovia na siga ni kua; 6 ia na ka koya kau sa vadinatia sara, o koya sa vatekivunia na cakacaka vinaka e na lomamudou, ena caka tiko me yaco mada na siga i Jisu Karisito: 7 ia sa dodonu meu nanumi ikodou kece lia va koya, ni dou sa tiko e na lomaqu; ni dou sa rawatia vata ki au na loloma koi ikodou kece lia, niu sa vesu tu, ka totaka ka vadinadinatakia nai tukutuku-vinaka. 8 Ni sa kila na Kalou, niu sa lomani ikodou kece lia valevu sara e na yalololoma i Jisu Karisito. 9 Ia na ka koya kau sa kerea, me tubu cake valevu sara na nomudou loloma e na vuku ki na lewa vinaka kece lia; 10 mo dou vinakatia kinia na veika sa vinaka sara, mo dou yalodina ka yali ni cala me yaco mada na siga i Karisito; 11 ni dou sa sinai e na vua ni yalododonu, sa tubu e na vuku i Jisu Karisito, me varokorokotaki ka vavinavinakataki na Kalou. 12 Ia kau sa vinakatia, mo dou kila, na viwekani, ni sa tubu cake nai tukutuku-vinaka e na vuku ni ka sa yaco vi au; 13 a sa varaitakia kinia na noqu vesuki e na vuku i Karisito vi ira kece lia na sotia e na vale ni tui, vi ira kece voki lia na kena vo; 14 a ra sa lewe levu na viwekani era sa tu vata ki na Turaga, era sa gumatua mai niu sa vesuki tu, a ra sa doudou cake kinia me ra tukunia na Vosa ni Kalou ka yali ni rere. 15 E dina lia sa so era sa vunautaki Karisito ni ra sa dauvuvu ka dauvileti, eso voki lia ni ra sa lomavinaka; 16 sa vunautaki Karisito ko ira eso ni ra sa dauvileti, ka yali e na lomadina, era nakitia lia me vaikuritakia na noqu vesu e na ka rarawa eso; 17 eso voki e na loloma, ni ra sa kila kau sa lesi meu totakia nai tukutuku-vinaka. 18 Ia ka vaevei? sa takivivinaka, se ra vailasu, se ra dina, sa vunautakia na Karisito: ia na ka koya kau sa rekitakia, io, kau na rekitakia tiko lia. 19 Niu sa kila ni na yaco na ka koya me ka meu bula kinia, e na vuku ni nomudou masu, ki nai solisoli ni Yalo i Jisu Karisito, 20 me vaka na ka kau sa dauwarakia ka vanuinuitakia meu kakua ni madua e na dua na ka, meu doudou sara lia, me vaka eliu, me vakinia ni kua me valevulevui na Karisito e na vuku ni yagoqu, se sa bula, se sa mate. 21 Ni sai koya na Karisito kau sa bula kinia; ia sa ka vinaka kevaka kau sa mate. 22 Ia kevaka sa vavuana tiko na noqu cakacaka niu sa bula vayago koya, au sa qai yali ni kila na ka meu digitakia. 23 Niu sa lomalomarua e na ka e rua, niu sa gadrevia meu qai yani, ka tiko vata ki Karisito; o koya sa vinaka cake sara: 24 ia sa yaga cake vi ikodou meu tiko lia vayago. 25 Ia niu sa vadinatia koya, au sa kila niu na tiko lia, io, ka tiko vata ki ikodou kece lia, mo dou tubu cake kinia e na marau ni vabautia; 26 me levu cake e na vukuqu na nomudou rekitaki Jisu Karisito, e na noqu tiko vata voki ki ikodou. 27 Mo dou caka lia nai valavala sa kilikili ki nai tukutuku-vinaka ki Karisito: meu rogoci ikodou kinia, seu qai yani ka raici ikodou, seu tiko tani, ni dou sa tu dei e na yalovata, ka gumatua sara e na lomavata me tubu na vabautia ni tukutuku-vinaka 28 me kakua ni varerei ikodou ko ira na nomudou meca e na dua na ka; koya nai vatakilakila vi ira ni ra na rusa, ia vi ikodou ni dou na bula, ia koya mai vua na Kalou. 29 Ni sa soli vi ikodou e na vuku i Karisito, e yali loa lia mo dou vabauti koya, mo dou vosotia voki lia na ca e na vukuna; 30 ni sa nomudou na vivala dou sa raicia eliu vi au, ka dou sa rogocia sa yaco vi au ni kua.