Sa varotia vi ira ko koya me ra vilomani, ka yalomalumalumu, me vataki Jisu, 1-11. Me ra gumatua sara me ra bula: me ra yaga voki lia, 12-18. Sa tukuni Timoci ki Epafirotaito vi ira, 19-30.
1
Ia kevaka sa tu na vivacegui e na vuku i Karisito, se tu na vivalecataki ni loloma, se tu na vilomani ni Yalo Tabu, se tu na yalololoma ki na yalovinaka,
2
mo dou vayacoria sara na noqu marau, mo dou lomavata kinia, mo dou tautauvata e na loloma, mo dou lomavata, mo dou yalovata.
3
Me kakua ni caka e dua na ka e na vileti se na vidokadokai loa lia; mo dou yalomalumalumu ka dui vasama ni sa uasivi cake vua ko koya kadua.
4
Mo dou kakua ni nanumia na nomudou ka lia koi ikodou yadua, ia mo dou dui nanumia voki lia na nodra ka na tamata tani.
5
Me tiko e na lomamudou na yalo koya ka tiko voki lia vi Karisito Jisu:
6
o koya, ni sai tovo vata ki na Kalou, sa yali ni vakasama ni sa butako ni sa vatauvatani ki na Kalou:
7
a sa vadravudravuataki koya, ka yadia vua nai tovo ni tamata dauviqaravi, a sa caka me tautauvata ki na tamata:
8
ia ni sa kune ni sai tovo vata ki na tamata, sa vamalumalumutaki koya, a sa talairawarawa me mate, io me mate e na kauveilatai.
9
O koya koya sa valevulevui koya cake kinia na Kalou, a sa solia vua e dua na yaca sa uasivi cake e na yaca kece lia:
10
me tekiduru kinia e na yaca i Jisu na duru vayadua lia, mai lomalagi, ki vuravura, ki na ruku i vuravura;
11
me vatusa voki lia na yame kece lia ni sa Turaga ko Jisu Karisito, me varokorokotakia kinia na Kalou na Tamada.
12
Ia koi ikodou, kau sa daulomania, me vaka na nomudou talairawarawa e na vigauna sa oti, dou sa yali ni caka loa lia niu sa tiko vi ikodou, dou sa uasivi cake kinia niu sa takali, dou caka vakinia na cakacaka dou sa bula sara kinia e na rere ki na sautaninini.
13
Ni sai koya na Kalou sa cakacaka e na lomamudou me vaka na nona lewa vinaka, mo dou nakitia ka caka voki lia.
14
Me kakua sara na dau didi ki na vileti e na nomudou cakacaka kece lia:
15
mo dou kakua ni vunaucia rawa, ka tawa cala mo dou luve ni Kalou ka yali ni bitaki me ca, e na kedra maliwa nai tabatamata takelo ka lomavatani, mo dou sa cila e na kedra maliwa me vaka na vicina e vuravura;
16
ni dou sa tauria tiko na vosa ni bula; meu reki kinia e na siga i Karisito, niu sa yali ni cici loa lia, seu daucakacaka loa lia.
17
Ia kevaka kau sa sovarakia yani e na nomudou vabautia niu sa cabori mei madrali, au sa reki kinia, ka marau vata ki ikodou kece lia.
18
E na vuku ni ka koya mo dou reki voki lia koi ikodou, ka marau vata ki au
19
Ia kau sa vanuinui vua na Turaga ko Jisu ni sa voleka na noqu talai Timoci vi ikodou, meu vacegui voki lia, niu sa kila na nomudou tiko.
20
Ni sa yali e dua sa tiko vi au sa yalovata kaya, me daunanumia na nomudou ka e na lomana dina.
21
Ni ra sa vasaqara na nodra ka ko ira kece lia, ka yali na ka ni Jisu Karisito.
22
Ia dou sa kilai koya ni sa vatovolei, ni sa vaka na gone vi tamana, sa daucakacaka vata ki au e nai tukutuku-vinaka.
23
O koya kau sa nakitia kinia me malua valailai kau na qai talai koya yani, meu kila mada se sa na vaevei koi au.
24
Ia kau sa vararavi vua na Turaga niu sa voleka voki lia koi au meu qai yani.
25
Ia kau sa vakasama ni sa dodonu meu talai Epafirotaito mada vi ikodou, na taciqu, ki na qau i caba e na cakacaka, ki na noqu i tokani e nai valu koya, ki na nomudou i talatala, ki koya sa vukei au e na noqu dravudravua.
26
Ni sa sasaga yani vi ikodou kece lia, a sa rarawa na yalona, ni dou a rogocia sa tauvi-mate ko koya.
27
E dina lia sa tauvi-mate ka sa voleka ni ciba: ia ka sa yalovinaka vi koya na Kalou; a sa yali loa lia vi koya, vi au voki lia, de vaikuritakia na noqu rarawa e na dua voki na ka rarawa.
28
O koya koya kau sa gumatua cake kinia meu talai koya, mo dou reki kinia, ni dou sa raicia voki, ka me lailai sobu kinia na noqu rarawa.
29
O koya mo dou qai vacegui koya e na Turaga, e na reki levu sara; ka mo dou dokai ira era sa vakinia:
30
ni sa voleka ni mate ko koya e na vuku ni cakacaka i Karisito, a sa yali ni taleitakia na nona bula, me vaikuritakia na nomudou cakacaka vi au sa vo tu.