¹ A sa curu yani ko Jisu ka qai tani ena valenisoro: a ra sa qai mai na nona tisaipeli me ra vatakila vua na vivale ena valenisoro. ² A sa tukunia vi ira ko Jisu, Dou sa raicia na ka kece lia koya, ne? au sa tukunia vaidina vi ikodou, Ena yali ni vo tu koya na vivatu sa vitaqataqai, ena talaraki sobu kece lia. ³ Ia ni sa tiko ko koya mai na ulu-ni-vanua ni violive, sa qai vuni vua ko ira na tisaipeli, ka tukunia, Ni tukunia mai vi kitou, se na yaco ninaica na veika koya? ia ka cava nai vatakilakila ni nomuni qai mai, ki nai vataotioti ki vuravura? ⁴ A sa vosa ko Jisu, ka tukunia vi ira, Qarauni ikodou vinaka de vacalai ikodou e dua. ⁵ Ni ra na lewe levu era na qai mai ka vacavutaki au, ka tukunia, Oi au na Karisito; ia ka lewe levu era na vacala. ⁶ Ia dou na rogocia nai valu, kei nai rogorogo ni valu: mo dou kakua ni kidroa: ni sa kilikili me yaco na ka koya, ia ka sa bera lia nai vataotioti. ⁷ Ni na vibolebolei na vivanua eso, kei na vimatanitu eso: ena yaco voki lia na dausiga, kei na tavuki ni vanua, ena yasana e levu. ⁸ Ia na ka kece lia koya sa kenai vatekivu ni ka rarawa. ⁹ Dou na qai soli yani me vararawatakia, ka dou na vamatei; ia dou na cati vi ira na lewe ni vivanua kece lia ena vuku ni yacaqu. ¹⁰ Ia ena lewe levu era na qai tarabe, a ra na visoliyaki, ka vicati. ¹¹ Ena lewe levu voki lia na parofita vailasu ena tubu cake mai, ia ka lewe levu era na vacala. ¹² Ia ni sa tubu valevu nai valavala ca, ena batabata mai na nodra loloma na lewe levu. ¹³ Ia ko koya ena vosotia me yacovia nai vataotioti, ena vabulai ko koya. ¹⁴ Ia ena vunautakia mada e vuravura taucoko nai tukutuku-vinaka koya ki na matanitu, mei vadinadina ki na vivanua kece lia; sa na qai yaco sara lia emuri nai vataotioti. ¹⁵ Ia ni dou sa raicia sa tu ena vale tabu na ka vasisila sa dauvivarusai, o koya sa vosa kinia ko Taniela na parofita, (me kila mada ko koya sa wilikia:) ¹⁶ me qai se ki na viulu-ni-vanua ko ira era sa tiko e Jutia: ¹⁷ me kakua ni qai sobu mai ko koya sa tiko e dela ni vale, me yadia tani na ka mai nona vale; ¹⁸ ia me kakua ni lesu voki ko koya sa tiko ena were, me yadia na nonai sulu. ¹⁹ Ka na ca vi ira era sa bukete, ki ira era sa vasucumia na gone, ena gauna koya! ²⁰ Ia dou masu me kakua ni yaco na nomudou se ena vula i liliwa, se ena siga ni vacecegu: ²¹ ni na qai levu sara na rarawa, ka yali ni vakinia eliu mai nai vatekivu ki vuravura ka yacovia na gauna koya, ka na yali sara voki lia emuri. ²² Ia kevaka ena yali ni valekalekatakia na gauna ko ya, ena yali na tamata me bula rawa: ia ena vukudra sa digitakia ena valekalekatakia na gauna ko ya. ²³ Kevaka ena qai tukunia vi ikodou e dua, Raicia, sa tiko koya na Karisito; se, sa tiko mai na vanua koya; kakua ni vadinatia. ²⁴ Ni na tubu mai na Karisito vailasu eso, na parofita vailasu eso, a ra na vatakila na vivatakilakila lelevu kei na veika e vivakurabuitaki; ia ke rawa, ke ra na vacalai ira voki lia sa digitakia. ²⁵ Raicia, au sa qai tukunia oti vi ikodou ni sa bera ni yaco. ²⁶ Kevaka era na tukunia vi ikodou, Raicia, sa tiko ko koya mai vikau! kakua ni qai kinia: Raicia, sa tiko mai loqi! kakua ni vadinatia. ²⁷ Me vaka sa tibi na livaliva mai natuicake, ka sa rairai yani ki ra; ena va voki lia kinia na nona qai mai na Luve ni tamata. ²⁸ Ni ra na soqoni vata na ikeli ki na yasana kece sa koto kinia na yago. ²⁹ Ia ni sa oti mada na gauna rarawa koya, ena qai vabutobutotakia vasauri na matanisiga, ena yali voki lia ni cila na rarama ni vula, ka na lutu mai lomalagi na vikalokalo, ka na vitosoyaki na veika kaukauwa ni lomalagi: ³⁰ ena qai rairai mai nai vatakilakila ni Luve ni tamata mai lomalagi; ena qai tagi na mataqali vayadua lia e vuravura, era na qai raicia na Luve ni tamata ni sa qai mai ena vi o mai lomalagi ena kaukauwa ki nai ukuuku levu. ³¹ Ia ena talai ira na nona agilose ko koya ki na davui sa rogolevu, ka ra na vasoqoni ira vata na nona digitaki mai na mata ni cagi e va, mai na vu ni lomalagi e dua ka yacovia voki lia na vu ni lomalagi kadua. ³² Mo dou kila mada na vosa vatautauvata ena lolo: Ni sa qai lavovou na tabana, a sa tubu na drauna, dou sa kila kinia sa voleka na vula i katakata: ³³ Sa va voki lia kinia koi ikodou, ni dou sa raicia na ka kece lia koya, dou kila sa voleka ko koya, io mai na mata ni darava. ³⁴ Au sa tukunia vaidina vi ikodou, Ena yali ni takali mada nai tabatamata koya, ena yaco eliu na ka kece lia koya. ³⁵ na takali ko lomalagi vata ki vuravura; ia na noqu vosa ena yali ni takali. ³⁶ Ia na siga koya kei na tiki ni siga koya sa yali e dua e kila, ko ira na agilose mai lomalagi era yali ni kila, se ko koya na Luvena, ko koya dua loa lia na Tamaqu. ³⁷ Ia me vaka ena siga i Noa, ena vaka voki lia kinia ena nona qai mai na Luve ni tamata: ³⁸ ni sa bera na waluvu era sa kana na tamata, ka somi, ka vawati ka vimusumusukitakia me ra vawati, ka yacovia na siga sa vodo kinia ki waqa ko Noa; ³⁹ a ra sa yali mada ni kila eliu, a sa qai yaco dina na waluvu, ka yadi ira kece yani; ena vaka voki lia kinia na nona qai mai na Luve ni tamata. ⁴⁰ Ena qai lewe rua na tagane erau na tiko e na were; ena yadi tani e dua, ka dai lia e dua. ⁴¹ Ena lewe rua na yalewa erau na qaqi sila, ena yadi tani e dua, ka dai lia e dua. ⁴² Ko koya mo dou qai vatawa; ni dou sa yali ni kila na tiki ni siga sa qai mai kinia na nomudou Turaga. ⁴³ Ia dou kila lia koya, kevaka e kila nai taukei ni vale na tiki ni bogi e qai mai kinia na daubutako, sa vatawa lia, ka yali ni dainia na nona vale me vabasukia. ⁴⁴ koya mo dou qai varau tu, koi ikodou voki lia: ni sa qai mai na Luve ni tamata ena tiki ni siga dou sa yali ni nanumia kinia. ⁴⁵ Ia ko cei na tamata yalododonu ka vuku, sa lesia na nona turaga me lewai ira na nona lewe ni vale, me solia vi ira na kedra ena gauna dodonu? ⁴⁶ Sa kalougata na tamata ko ya, ni na qai mai na nona turaga ka raici koya ni sa caka vakinia. ⁴⁷ Au sa tukunia vaidina vi ikodou, Ena lesi koya me lewa na nona ka kece lia. ⁴⁸ Ia kevaka ena tukunia e lomania na tamata ca koya, Sa vaberaberatakia na nona qai mai na noqu turaga: ⁴⁹ a sa vatekivu kinia me yaviti ira na nonai tokani, me daukana voki lia ka dausomi vata kei ira na daumateni; ⁵⁰ ena qai mai na turaga ni tamata ko ya ena siga e yali ni nanumia kinia, kei na tiki ni siga e yali ni kila kinia; ⁵¹ ena qai varomusukia rua, ka vota vua mei votavota vata kei ira na dauvivakaisini: ena dautagi kinia, ka vasequruquru bati.