¹ Sa qai vosa ko Jisu vi ira na lewe levu, vi ira voki lia na nona tisaipeli, ² ka tukunia, Sa tiko e nai tikotiko i Mosese ko ira na vunivola vata kei ira na Farisi; ³ ia na ka kece lia era sa tukunia vi ikodou mo dou vabautia, dou vabautia lia ka caka; ia dou kakua lia ni muria na nodrai valavala, ni ra sa vosa lia ka yali ni caka. ⁴ Ni ra sa vaucia nai colacola bibi e mama sara ni da colatia, ka vataqa ena usouso-ni-domodra na tamata; a ra sa yali ni via vayavalatia ena dua na nodrai qaqalo. ⁵ Ia na nodra cakacaka kece lia era sa caka me raici ira kinia na tamata: era sa varabailevutakia na nodra vivananumi tabu, ka ra sa valevutakia na tutu ni nodrai sulu, ⁶ a ra sa vinakatia nai tikotiko vaturaga ni ra kana vata, kei nai tikotiko ni matua ena vivalenilotu, ⁷ ki na vikidavaki ena virara ni vivoli, me vatokai voki lia vi ira na tamata, Vavuvuli. ⁸ Ia koi ikodou, dou kakua ni vatokai mei Vavuvuli: ni sa dua loa lia na nomudoui Vavuvuli; ia dou sa viwekani kece lia. ⁹ Dou kakua voki lia ni vatoka e dua me tamamudou e vuravura; ni sa dua loa lia na Tamamudou, ko koya mai lomalagi. ¹⁰ Dou kakua voki lia ni vatokai me Turaga: ni sa dua loa lia na nomudou Turaga, ko koya na Karisito. ¹¹ Ia ko koya sa uasivi cake vi ikodou, me nomudou tamata ko koya. ¹² Ia ko koya ena valevulevui koya, ena vamalumalumutaki; ia ko koya ena vamalumalumutaki koya, ena valevulevui. ¹³ Ia e ca vi ikodou, na vunivola ki na Farisi, na dauvivaisini! ni dou sa sogotia na matanitu valomalagi vi ira na tamata: ni dou sa yali ni curu rawa kinia koi ikodou, se daini ira era sa curu tiko me ra curu kinia. ¹⁴ E ca vi ikodou, na vunivola ki na Farisi, na dauvivakaisini! ni dou sa kovea na nodrai yau na yada, ni dou sa masu vabalavu tiko me vivakaisini: ko koya koya dou na cudruvi valevu cake kinia. ¹⁵ E ca vi ikodou, na vunivola vata kei na Farisi, na dauvivakaisini; ni dou sa qaiva na wasawasa kei na vanua mo dou vukicia e dua me lotu vataki ikodou; ia ni sa rawa, dou sa caka me luve ni eli me uasivi varua vi ikodou. ¹⁶ E ca vi ikodou, nai vavuvuli mataboko! dou sa tukunia, Ko koya ena bubului ki na valenisoro, a ka loa koya; ia ko koya ena bubului ki na koula ni valenisoro, sa vauci kinia ko koya. ¹⁷ Na lialia ka mataboko! a cava vi rau e levu cake, na koula, se na vale ni soro sa vatabui kinia na koula? ¹⁸ Ia, Ko koya ena bubului ki nai cabocabo-ni-madrali, a ka loa ko ya; ia ko koya ena bubului ki nai madrali sa koto kinia, sa vauci kinia ko koya. ¹⁹ Na lialia ka mataboko! a cava vi rau e levu cake, ai madrali, se nai cabocabo-ni-madrali sa vatabuya nai madrali? ²⁰ Ko koya sa bubului ki nai cabocabo-ni-madrali, sa bubului ki na ka ko ya, ki na ka kece lia sa koto kinia: ²¹ ia ko koya sa bubului ki na vale ni soro, sa bubului kinia, vi koya voki lia sa tiko kinia: ²² ia ko koya sa bubului ki lomalagi, sa bubului ki nai tikotiko vaturaga ni Kalou vi koya voki lia sa tiko kinia. ²³ E ca vi ikodou, na vunivola vata kei na Farisi, na dauvivakaisini! ni dou sa solia nai katini ni botebotekoro, ki na co va koya, ia dou sa dainia tani na veika mama ena vunau, nai valavala dodonu, ki na loloma, kei na vadinatia: o koya sa kilikili mo dou caka, me kakua voki lia ni dai tani ko ya. ²⁴ Ai vavuvuli mataboko! dou sa tauvulonia me dai na nana, ia na kameli dou sa tiloma lia. ²⁵ E ca vi ikodou, na vunivola vata kei na Farisi, na dauvivakaisini! ni dou sa vasavasavatakia na bilo kei na dari e taudaku, ia e loma sa sinai ena daubutako kei na garogaro. ²⁶ A Farisi mataboko! mo vasavasavatakia mada na loma ni bilo kei na dari, me qai savasava voki lia kinia e taudaku. ²⁷ E ca vi ikodou na vunivola vata kei na Farisi, na dauvivakaisini! ni dou sa vaka na vivale ni bulubulu sa boro vulavula, ka sa rairai vinaka e taudaku, ia eloma sa sinai ena sui mate, kei na ka kece lia sa velavela. ²⁸ Sa va voki lia kinia koi ikodou, dou sa rairai etaudaku vi ira na tamata me tamata dodonu, ia e loma dou sa sinai ena dauvivakaisini ki na ka e yali ni dodonu. ²⁹ E ca vi ikodou na vunivola vata kei na Farisi, na dauvivakaisini! ni dou sa tara na nodra vivale ni bulubulu na parofita, ka vaiukuukutakia na nodra vivale ni bulubulu na tamata yalododonu, ³⁰ ka tukunia, Kevaka eda sa bula ena gauna ni noda qase, eda a bese ni lomavata kei ira ena nodra vamatei ira na parofita. ³¹ Ko koya koya dou sa tukunia ikodou kinia, ni dou sa luvedra era vamatei ira na parofita. ³² Ia mo dou vasinaitia nai varau ni nomudou matua. ³³ Na gata, a luve ni gata loaloa! dou na tuba rawa vaevei mai na cudruvi mai eli? ³⁴ Ia ka raicia, au na tala yani vi ikodou eso na parofita, kei na tamata vuku, kei na vunivola; ia eso vi ira dou na vamatea ka vakotia ki na kauveilatai; ka so dou na vakanakuitatakia ena nomudou vivalenilotu, ka tovoci ira mai nakoro e dua ki nakoro e dua: ³⁵ me yaco kinia vi ikodou nai sau ni kedra dra na tamata yalododonu kece lia ka vadavei e vuravura: mai na dra ni Epeli na yalododonu ka yaco ki na dra ni Sakaraia na luvei Parakaia, ko koya dou a vamatea ena tadrua ni vale ni soro ki nai cabocabo-ni-madrali. ³⁶ Au sa tukunia vaidina vi ikodou, A ka kece lia koya ena yaco ki nai tabatamata koya. ³⁷ Isa! Jerusalemi, Isa! Jerusalemi, ko iko sa vamatei ira na parofita, ka vaviriki ira sa talai yani vi iko, au a nanumia vavica meu vasoqoni ira vata na nomu gone, me vaka na toa yalewa sa vasoqoni ira na luvena e ruku ni tabana, ia dou a yali ni vinakatia! ³⁸ Raicia, sa qai dai vi ikodou na nomudou vale me lala didi: ³⁹ niu sa tukunia vi ikodou, Dou na yali ni raici au voki, ka malua dou na tukunia mada, Sa kalougata ko koya sa qai mai ena yaca ni Turaga.