¹ Ai vola ni tubutubu i Jisu Karisito , na luve i Tevita, na luve i Eparama. ² A tama i Aisake ko Eparama; ka tama i Jekope ko Aisake; ka tama i Juta ki iratou na tuakana ki iratou na tacina ko Jekope; ³ ka tama i Feresi ki Sera ko Juta, a tinadrau ko Tema; ka tama i Esiromi ko Feresi; ka tama i Erami ko Esiromi; ⁴ ka tama i Amininatapi ko Erami; ka tama i Nasoni ko Amininatapi; ka tama i Salimoni ko Nasoni; ⁵ ka tama i Poasi ko Salimoni, a tinana ko Reapi; ka tama i Opeti ko Poasi, a tinana o Ruci; ka tama i Jese ko Opeti; ⁶ ka tama i Tevita na tui ko Jese. Ka tama i Solomoni ko Tevita na tui, a tinana ko koya ka wati i Uraia eliu; ⁷ ka tama i Riopoami ko Solomoni; ka tama i Epaia ko Riopoami; ka tama i Asa ko Epaia; ⁸ ka tama i Josafati ko Asa; ka tama i Jorami ko Josafati; ka tama i Usaia ko Jorami ⁹ ka tama i Jocani ko Usaia; ka tama i Aasi ko Jocami; ka tama i Esekaia ko Aasi; ¹⁰ ka tama i Manasa ko Esekaia; ka tama i Emoni ko Mansa; ka tama i Josaia ko Emoni; ¹¹ ka tama i Jekonaia ki iratou na wekana ko Josaia, ni sa yaco na gauna era yadi kinia ki Papiloni. ¹² Ia ni sa yadi voki lia ki Papiloni, sa qai sucu ko Salacieli, a tamana ko Jekonaia; ka tama i Serupapeli ko Salacieli; ¹³ ka tama i Epiuta ko Serupapeli; ka tama i Elaiakimi ko Epiuta; ka tama i Asori ko Elaiakimi; ¹⁴ ka tama i Setoki ko Asori; ka tama i Akeimi ko Setoki, ka tama i IIiuta ko Akeimi; ¹⁵ ka tama i Eliesa ko IIiuta; ka tama i Macani ko Eliesa; ka tama i Jekope ko Macani; ¹⁶ ia ko Jekope na tama i Josefa na wati Meri, ko koya sa sucu mai kinia o Jisu, ko koya sa vatokai ko Karisito. ¹⁷ Sa qai mani tinikava nai tabatamata kece lia sa vatekivu vata ki Eparama ka yacovi Tevita; ia sai tabatamata e tinikava ko ira sa vatekivu vata ki Tevita ka yacovia na kena yadi ki Papiloni ka yacovia na Karisito. ¹⁸ Ia sa vakoya voki lia na sucu i Jisu Karisito: Sa musu eliu ko Meri na tinana vi Josefa, ia ni rau sa yali mada lia ni viyacovi, sa votu na nona bukete mai vua na Yalo Tabu. ¹⁹ Ia sa yalododonu ko Josefa na watina, a sa yali ni via vavotuya, sa lomania me dai tu kinia ka vuni. ²⁰ Ia ni sa vananumia tiko ko koya na ka koya, sa qai dua lia na agilosi ni Turaga sa rairai mai vua ena tadra, ka tukunia, I Josefa, na luve i Tevita , kakua ni rere ni yadi Meri na watimu: ka ni sa tubu mai vua na Yalo Tabu na ka sa kunekunetakia: ²¹ ia ena vasucumia ko koya e dua na gonetagane; ia mo vayacani koya o Jisu; ka ni sai koya lia ena vabulai ira na nona tamata mai na nodrai valavala ca. ²² Ia sa yaco lia na ka koya, me vayacori sara lia kinia na vosa ni Turaga ko ya sa vosatakia kinia na parofita, ka tukunia, ²³ Raicia ena bukete e dua na goneyalewa, ka na vasucumia e dua na gonetagane, Ka na vayacani voki lia ko Immanueli: a kenai balebale, Na Kalou sa tiko vata ki ita. ²⁴ Ia sa yadra mai ko Josefa ka sa qai qai ki caka na ka ka tukunia vua na agilosi ni Turaga, a sa yadia na watina: ²⁵ a rau sa yali ni viyacovi, sa sucu mada na nona ulumatua na gonetagane; a sa vayacani koya sara lia ko Jisu.