¹ Ia ni sa sucu ko Jisu mai Pecileema e Jutia e na gauna sa tui voki lia kinia ko Eroti, raicia, eso lia na tamata vuku mai natuicake era sa qai mai ki Jerusalemi, ² a ra sa tukunia, Evei ko koya sa sucu me nodra tui na kai Jutia? ni kitou a raicia na nona kalokalo mai na tu i cake, ka kitou sa qai mai me cuva sara lia vua. ³ Ia ni sa rogocia ko Eroti na tui, sa kidroa vata ki Jerusalemi taucoko vata kaya: ⁴ ia ni sa vasoqoni ira vata kece sara lia na bete levu kei ira voki lia na vunivola ni tamata, sa tarogia ko koya se na sucu beka lia evei na Karisito. ⁵ Era sa tukunia vua, Mai Peciliema e Jutia: ni sa vola vakoya na parofita, ⁶ Ia ko iko Pecileema, e na vanua ko Juta, Ko sa yali ni lailai sara vi ira na viyasana e Juta: Ni na tubu mai vi iko e dua na Turaga, Ko koya ena lewai ira kece sara lia na noqu tamata na Isireli. ⁷ Ia ko Eroti, ni sa kacivi ira vailo na tamata vuku, sa qai tarogia matua vi ira na gauna sa rairai kinia na kalokalo. ⁸ A sa talai ira ki Pecileema, ka tukunia, Dou qai vaqara matua sara na gone lailai; ia ni dou sa raicia, tukunia mai vi au, meu qai cuva voki lia vua. ⁹ Ia ni ra sa rogocia na vosa ni tui, era sa qai, ka raicia, na kalokalo era a raicia mai natuicake, sa liutaki ira, a sa qai tu vadua, ni sa donumakia na tikinia sa koto kinia na gone lailai. ¹⁰ Ia ni sa raicia na kalokalo, era sa reki valevu sara lia. ¹¹ Ia ni ra sa curu ki vale, era sa raicia na gone lailai kei Meri na tinana, a ra sa cuva sobu, ka varokoroko sara vua; ia ni ra sa serekia na nodrai solesole kamunaga, era sa vacaboya vua eso nai solisoli; na koula, ki na drega me vakamai, ki na mura. ¹² Ia ni sa vasala vi ira ena tadra na Kalou me ra kakua ni qai voki vi Eroti, era sa lesu voki lia ki na nodra vanua ena sala tani. ¹³ Ia ni sa qai tani, raicia sa qai rairai vi Josefa ena tadra e dua na agilosi ni Turaga, ka tukunia, Mo cavu tu, mo yadia na gone lailai ki na tinana, ka tuba ki Ijipita, ka warakia mai kinia na noqu vosa vi iko; ni na vaqara na gone lailai ko Eroti me vamatea. ¹⁴ Sa qai cavu tu ko koya, ka yadia na gone lailai kei tinana ena bogi, ka qai ki Ijipita. ¹⁵ a sa tiko mai kinia ka yacovia na mate i Eroti: me vayacori kinia na vosa ni Turaga ko ya sa tukunia na parofita, ka tukunia, Au a kacivia na luvequ mai Ijipita: ¹⁶ Ia ko Eroti, ni sa qai kila era a vakaisini koya ko ira na tamata vuku, sa cudru valevu sara, ka sa talatala yani, me vamatei o ira kece lia na gonetagane lailai era sa tiko mai Pecileema, ki na kena viyasana kece lia, ko ira era yabaki yarua ki ira voki lia era lailai sobu, me rautia na gauna ka tarogia matua kinia ko koya vi ira na tamata vuku. ¹⁷ Sa qai vayacoria na ka sa vosatakia ko Jeremaia na parofita, ka tukunia, ¹⁸ E dua na domo sa rorogo mai Rama, A qoqolou, ki na tagi, ki na somate levu, Sa tagicaki ira na luvena ko Rejeli, A sa bese ni vacegui, ni ra sa yali. ¹⁹ Sa mate ko Eroti, sa qai rairai vi Josefa mai Ijipita ena tadra, e dua na agilosi ni Turaga, ²⁰ ka tukunia, Mo cavu tu, ka yadia na gone lailai ki tinana, ka qai ki na nodra vanua na Isireli: ni ra sa mate ko ira sa vaqara na gone me ra vamatea. ²¹ Sa qai cavu tu ko koya, ka yadia na gone lailai vata ki tinana, a sa qai mai ki na nodra vanua na Isireli. ²² Ia ni sa rogocia na tui mai Jutia ko Arikeleo nai sosomi kei Eroti na tamana, sa rere ni qai kinia; ia ni sa vasala vua na Kalou ena tadra, sa lesu voki lia ko koya ki na yasayasa va Kalili: ²³ a sa qai tiko vadua ki na koro na yacana ko Nasereci, a sa vayacoria kinia na ka era sa vosatakia ko ira na parofita, Ena vatokai ko koya, a kai Nasareci.