1 ¹ Koi au ko Jemesa, nai talatala ni Kalou ki Jisu Karisito, sa loloma yani vi ira na yavusa tinikarua era sa dui viseyaki. ² Vi ikodou na taciqu, dou wilikia me kani reki ni dou sa sotavia na ka ni vivatovolei kece lia. ³ Ni dou kila, na vatovolei ni vabautia sa bulia na dauvosotia. ⁴ Dou dainia me tini vinaka na dauvosotia me rawa ni vinaka ko ikonu taucoko, ka me kakua ni dua na ka e yali. ⁵ Kevaka e dua vi ikonu e lailai vua na vuku, me kerea vua na Kalou, ni sa yali dau vivadirideini ka na solia lia vi ira era kerea. ⁶ Io, me kerekere ena vabautia ka kakua ena vatitiqa, ia ko koya sa dau vatitiqa sa vaka na ua ni waitui, ni sa cagina ena cagi. ⁷ Me kakua ni nanumia ni na ciqomia e dua na ka mai vua na Kalou na tamata koya. ⁸ Ni sa lolomarua ko koya, ka yamekemeke na nona ivalavala. ⁹ Io na tamata dravudravua me reki ni sa laveti cake. ¹⁰ Ko koya na vutuniyau, ena nona malumalumu, baletia ni sa vaka na se ni co ena takali yani. ¹¹ Ni sa cadra na mata ni siga vata ki na katakata, ka varaqosatakia na co; ena mira na sena ka yali na kena rairai. E na vaka voki lia na tamata vutuniyau ena taqusi yani e maliwa na nona rawa ka. ¹² Sa kalougata na tamata ni sa tudei ena gauna ni nona vatovolei, ni na taukenia nai sala ni bula ena gauna sa voratia na vivatovolei, o koya sa yalatakia tu na Kalou. ¹³ Me kakua ni tukunia e dua ni sa vatovolei, "sa vatovolei au na Kalou," ni sa yali rawa ni vatovolei kei na ca na Kalou, ka sa yali ni dau vivatovolei ko koya. ¹⁴ Ia sa dau veretakia na tamata yadua ena nona gagadre ca. ¹⁵ Na gagadre e kunekune ka vasucumia nai valavala ca ni sa tubu levu sa yadia mai na mate. ¹⁶ Dou kakua ni cala, koi ikodou na wekaqu lomani. ¹⁷ Na loloma talei ki na loloma vinaka sa qai mai lomalagi, sa qai sobu mai vi na tama ni rarama, o koya sa yali vua na yaloyalo ni vivukiyaki. ¹⁸ Mai na gagadre ni yalona, sa tuberi ita mai na vosa ni dina, ka me da yaco me dai sevu ni nona vibuli ¹⁹ Mo dou kila ka koya, na taciqu lomani. mo dou tamata ni totolo ni varorogo, ka berabera ni vosa, ka berabera ni cudru; ²⁰ na cudru ni tamata ena yali vatuburia na yalododonu ni Kalou. ²¹ Mo dou dainia tani kece nai tovo ca kei na varau vasisila kece lia. Ena yalo varokoroko mo ciqomia ka teivakia na vosa, ka sa rawa ni vabula rawa na yalomudou . ²² Mo tamata dau cakacakatakia na vosa, ka kua ni rogocia wale lia ka vaIsini iko. ²³ Na tamata sa rogocia lia na vosa ka yali cakacakatakia, sa tautauvata ki na tamata sa ilovi koya ena iloilo ka yali raicia rawa e dua na visau. ²⁴ Ni sa ilovi koya ka qai guilecavia na kena rairai. ²⁵ Ni na vakalougatatakia na nona cakacaka na tamata sa raicia na lawa, a sa muria ka maroroya, ia ka sa cakacakatakia. ²⁶ Kevaka e nanumia e dua ni sa lotu, ka qai yali ni vatulewatakia na yamena, ia sa ka vaisinitakia na yalona, na nona lotu sa yali yaga, ²⁷ Na lotu e dodonu ka savasava e mata ni Kalou, na Tamada, sa i koya me ra sikovi na yada ki na luveniyali ka maroroi koya mai nai tovo vavuravura,