¹ Ia ko Melikiseteki koya, sa tui Selemi, a bete ni Kalou Cecere sara, sa tavaki Eparaama ni sa lesu voki mai na nona mokuti ira na tui, a sa vosavakalougatatakia koya; ² sa solia voki lia vi koya ko Eparaama nai katini ni ka kece lia: (nai balebale ni yacana na Tui ni caka dodonu, a yacana voki lia emuri na Tui Selemi, a kenai balebale na Tui ni vivacegui; ³ e yali ni tukunia na tamana, se na tinana, se na nona mataqali, sa yali ni vatekivu na nona gauna, se oti na nona bula; a sa caka me vaka na Luve ni Kalou), a sa tiko lia me bete ka yali ni mudu. ⁴ Dou vakasama na kena uasivi na tamata koya, ni sa solia vi koya ko Eparaama na turaga qase nai katini ni kamunaga sa tokitakia. ⁵ A sa dina vi ira na luve i Livai, era sa bete, ni sa varotii vi ira ena vunau, me ra vaisigana mai vi ira na tamata, io, mai vi ira na wekadra, ia sa dina lia ni ra sa qai mai na kawa i Eparaama: ⁶ ia ko koya koya sa vaisigana mai vi Eparaama, a sa yali ni wili vata ki na nona mataqali, a sa vosavakalougatataki koya ka vosatakia kinia na yalayala. ⁷ Ia sa yali ni vatitiqatakia rawa koya, ni sa vosavakalougatataki koya sa uasivi sobu ko koya sa uasivi cake vi rau. ⁸ Ia gona era sa tauria nai sigana ko ira na tamata era sa dui mate; ia mai na vanua gona sa tukunia e dua ni sa bula tiko. ⁹ Io, kevaka e tara me'u vosa vakinia, ko Livai voki lia, o koya sa dau tauria nai sigana, erau sa solia ki Eparaama nai sigana; ¹⁰ ni sa bera ni sucu ko koya ni sa tavaki Melikiseteki ko tamana. ¹¹ Ia kevaka sa rawa mera vinaka sara e na vuku ni cakacaka ni bete va-Livai, (ni sa tukunia vata kaya na vunau vi ira na tamata,) ena yaga vacava me tubu e dua voki na bete me vaka nai valavala i Melikiseteki, ka me yali ni vatokai me vaka nai valavala i Eroni? ¹² Ia ni sa qai vaisosomitakia na bete, sa dodonu sara me vaisosomitaki voki lia na vunau. ¹³ Ia ko koya sa tukunia vakoya, sa dua tani na nona yavusa, sa yali mai kinia e dua na tamata sa qaravia nai cabocabo-ni-soro. ¹⁴ Ni sa macala sara sa tubu mai vi ira na Juta na noda Turaga; ia na yavusa ko ya e yali ni vosa kinia ko Mosese me ra bete. ¹⁵ Ia sa macala valevu sara; ni sa tubu e dua tani voki na bete me vataki Melikiseteki, ¹⁶ o koya ka lesi, ka yali ni vaka na vunau vavuravura, koya lia me vaka na kena mana ni bula yali ni mudu. ¹⁷ Ni sa tukunia ko koya, O iko na bete yali ni mudu Me vaka nai valavala i Melikiseteki. ¹⁸ A sa dina sa mudu na vunau sa liu ni sa malumalumu ka yali ni yaga: ¹⁹ ni sa yali ni vinaka sara e dua na ka ena vuku ni vunau, ia sa kenai liuliu ni nuinui sa vinaka cake, o koya eda sa toro voleka kinia vua na Kalou. ²⁰ Ka ni sa ia na bubului e na nona lesi me bete: ²¹ (ni sa buli lowa lia mera bete ko ira koya, ia ka yali ena bubului; ia ko koya koya ena bubului; ena vuku i koya sa tukunia vua, Sa bubului ko Jiova, ka na yali ni vivutuni, O iko na bete yali ni mudu:) ²² sa uasivi cake vakinia na viyalayalati, o koya sa kenai vadinadina ko Jisu. ²³ Ia ko ira koya era lesi mera bete, era sa lewe levu, ni sa tarovia na nodra tiko na mate: ²⁴ ia ko koya koya, sa yali ni vaisosomitakia na nona cakacaka vabete, ni sa tiko lia ka yali ni mudu. ²⁵ O koya koya sa rawarawa kinia vua me vabulai ira sara era sa qai mai vua na Kalou ena vukuna, ni sa bula tiko lia ko koya me masulaki ira. ²⁶ Ni sa dodonu me noda e dua na bete sa vakoya, sa yalosavasava, sa yalovinaka, sa yali ni ca, sa tawase tani mai vi ira na tamatai valavala ca, a sa caka me uasivi cake ki lomalagi ena nona cecere: ²⁷ o koya e yali kinia ni yaga ena visiga, me vacaboria taumada nai soro ni nonai valavala ca, ia emuri nai soro ni nodra i valavala ca na tamata, me vataki ira na bete levu: ni sa caka koya vadua lia ko koya, ni sa vacabori koya. ²⁸ Ia sa buli ena vunau na tamata era sa malumalumu me bete levu; ia na Luve ni Kalou sa caka me vinaka sara ka yali ni mudu ena bubului sa taravia na vunau.