3 ¹ Oi ikonu na wekaqu lomani, koya na i karua ni vola ka'u sa vola yani vei ikonu. Sa volai lia na i vola ruarua koya mo ni vananumia kinia ka vayaloqaqataki me taucoko sara ka savasava na nomuni i tovo ni vasama. ² Au vinakatia mo ni daunanumia lesu na nodra vosa na parofita yalosavasava ena gauna eliu. Ni kakua voki lia ni guilecavia na veivaro ni noda Turaga ka noda i Vabula sa vadewatakia yani vei ikonu mai vei iratou na nomuni i apositolo. ³ E bibi taumada kinia mo ni kila na ka koya, ni na qai mai ena gauna emuri sara eso na tamata sa liutaki na nodra bula mai na nodra gagadre ca. Era na valialiai ikonu ⁴ ka ra na tarogia, “A yali li ni yalatakia o koya ni na lesu voki mai? Sa evei lia o koya? Era sa mate oti taucoko na nimamu qase, ia era se tautauvata vinaka tiko lia na veika sa yaco me tekivu mai na i vatekivu kei vuravura!” ⁵ Era na tukunia na ka koya baletia ni ra sa nakitia me ra valecalecavia na ka dina me baletia na nona a vosa taumada na Kalou ena gauna makawa sara, ka sa buli kinia na lomalagi kei na vuravura. A sa wasei tani na vuravura mai na wai ka sa buli ena wai, ⁶ ka sai koya voki lia na wai, na wai ni waluvu, sa luvuci ka varusai kina na vuravura makawa. ⁷ Ia sa maroroi lia na lomalagi kei na vuravura ni kua mai na nona vosa voki lia na Kalou me yacovia na siga ni veilewai. Ena qai vacacani emuri ena bukawaqa, ka ra na varusai vakinia na tamata yali ni lotu. ⁸ Ikonu na wekaqu lomani, ni kakua ni guilecavia na ka koya! Ni sa yali sara na kedrau duidui ena mata ni Turaga na dua na siga kei na 1,000 na yabaki, ni sa tautauvata lia na 1,000 na yabaki kei na dua na siga. ⁹ Sa yali ni berabera na Turaga ni vayacoria na nona vosa ni yalayala, me vaka era sa nanumia eso. Ia sa vosoti ikonu lia vadede, baletia ni sa yali ni vinakatia o koya me rusa e dua, ia me ra veivutunitakia lia na nodra i valavala ca na tamata yadua. ¹⁰ Ia ena yaco mai na Siga ni Turaga me vaka na daubutako. Ena Siga ko ya, ena takali tani kinia o lomalagi ena rorogo domoilevu, era na vawaicalataki ena bukawaqa na veika era ciri tu e maliwa lala, ka na varusai vadua o vuravura kei na veika kece lia sa tu kinia. ¹¹ Me vaka ni ra na varusai vakoya na veika kece sara koya, na mataqali i varau ni bula cava sa dodonu sara mo ni bulatakia? Sa dodonu me savasava sara ka vacabori me nona dua loa lia na Kalou na nomuni bula. ¹² Ena nomuni namakia tiko na Siga ni Kalou, ni gumatua me rawa ni yaco mai kinia vatotolo, na siga ena vakamai ka vacacani kinia o lomalagi, ka na vawaicalatakia kinia ena bukawaqa na veika era ciri voli tu ena maliwa lala. ¹³ Ia oi ita, me vaka na nona vosa ni yalayala na Kalou, eda sa warakia lia na lomalagi vou kei na vuravura vou, sa vakaitikotiko kinia o ira na valavala dodonu. ¹⁴ Ko koya koya, ikonu na wekaqu, ni ko ni sa warakia tiko na Siga koya, mo ni gumatua sara kinia mo ni savasava ka vinaka sara ena mata ni Kalou, ka mo ni tiko veiyaloni kaya tiko lia. ¹⁵ Ni okatia na gauna balavu e veivosoti tiko mai kinia na Turaga me ia kinia na veivabulai vei ikonu, me vaka na nona volavola yani vei ikonu na noda i tokani lomani o Paula, ni sa vayagatakia na yalomatua sa solia vua na Kalou. ¹⁶ Ni sai koya lia koya na veika sa vola o koya ena nona i vola kece sara me baletia na ulutaga koya. Era tiko ena nona i vola eso na veika dredre me kilai, ka ra sa vatanitaka o ira na tamata lecaika ka yali ni tudei ena vuku ni nodra vamacala lasulasu, me vaka era sa dau caka ki na veitiki ni Vola Tabu voki eso. Ena ka koya era sa varusai ira vakai ira lia kinia. ¹⁷ Ia vei ikonu na wekaqu, o ni sa kila rawa oti tiko na veika koya. Mo ni qaqarauni vinaka kinia, de o ni na qai vacalai mai na nodra cala na tamata daubasulawa vakoya ka bale kinia mai na nomuni yavu dei. ¹⁸ Ia ni tubu cake lia ena lolomasavu kei na nomuni veikilai kei na noda Turaga ka noda i Vabula ko Jisu Karisito. Me ia lia vua na varokoroko ena gauna koya ka yali ni mudu! Emeni.