2 ¹ Era a tubu cake ena kedra maliwa na tamata ena gauna ko ya na parofita vakailasu eso, era na tubu cake voki lia vakinia ena ikonu maliwa na i vavuvuli vakailasu eso. O ira koya era na yadia vavuni mai na veivavuvuli cala ka veivarusai, era na cakitakia na Turaga ka sa voli ira vadua, ka ra na vavuna lia kinia na nodra varusai vasauri. ² Ena lewe vuqa era na muria na nodra i valavala vasisila; ena vosa vacacataki vakinia na sala ki na dina ena vuku ni veika era sa caka. ³ Ia ena nodra loma kocokoco, era na vayagataki ikonu me ra rawatia kinia mai na nodra i talanoa buli eso. Ia sa tu varau lia mai na dua na gauna balavu na nodra Dauveilewai, ka sa yali ni moce na nodra Dauveivarusai! ⁴ A sa yali ni lomani ira na agilosi i valavala ca na Kalou, ia sa daini ira lia ki eli, ena vanua butobuto me ra tiko kinia ka yacovia na Siga ni Lewa. ⁵ A sa yali voki lia ni lomania na vuravura makawa na Kalou, ia sa vavuna lia na waluvu me luvuci kinia na nodra vuravura na tamata i valavala ca. A sa vabulai lia kinia o Noa, o koya ka a vunautakia na i valavala dodonu, ka vakinia e lewe vitu voki na tamata. ⁶ A sa varusai rau na koro o Sotoma kei Komora na Kalou ena bukawaqa, ka sa yaco koya me i varaitaki ni veika ena yaco vei ira na tamata ca ena gauna e muri. ⁷ A sa vabulai Loti, e dua na tamata yalododonu, o koya ka sa rarawa valevu na lomana ena vuku ni nodra i varau vasisila na tamata ca. ⁸ A sa bula maliwai ira koya na tamata yalododonu ko ya, ka sa rarawa voli na lomana ena veisiga ni sa raicia ka rogocia na nodra i valavala vasisila. ⁹ O koya koya sa kila kinia na Turaga na sala me ra vabulai kinia o ira na tamata lotu mai na veivatovolei e levu; sa kila voki la na sala me ra totogitakia tiko kina na tamata i valavala ca me yacovia na Siga ni Lewa, ¹⁰ ka vabibi vei ira era muria tiko na veigagadre ca ni yagodra, ka catia na veiliutaki ni Kalou. Era sa tamata yalokaukauwa ka yali ni kila na rere o ira na i vavuvuli vakailasu koya, ka ra sa yali ni dokai ira na veika bula vakaiserau mai cake; ia era sa vosavacacataki ira lia. ¹¹ Ni o ira mada lia na agilosi, ka dina lia ni ra sa uasivi mai vei ira na i vavuvuli vakailasu koya ena kaukauwa kei na qaqa, era sa yali ni bau beitaki ira ka vacacani ira ena mata ni Turaga. ¹² Ia o ira na tamata koya era sa dau caka lia na ka sa takoso e matadra, ka yali ni bau vasamatakia mada vavinaka. Era sa vataki ira lia na manumanu kila sa sucu mai me ra na qai vesuki ka vamatei. Era sa dau vosavacacatakia na veika era sa yali ni kila. Era na varusai lia me vataki ira na manumanu kila, ¹³ ka ra na vararawatakia ena vuku ni veivararawataki lia era sa vavuna. Era sa dau okatia me ka ni lasa na marau vaalialia ena siga levu tutu. Era sa dukadukali ka velavela, ka sa vacacani kinia na kakana era sa kania vata kei ikonu ena vuku ni nodra i tovo vamadua kei na i varau veivakaisini. ¹⁴ Era sa vasamatakia tu lia me ra ia na veibutakoci; era sa syali ni mamau rawa ena caka ca. Era sa dau vacalai ira na tamata era sa dau bale varawarawa. Sa vatavulici na lomadra me ra daukocokoco. Ena tau vei ira na cudru ni Kalou! ¹⁵ Era sa dainia na sala dodonu ka ra sa lako sese; era sa tauria lia na sala sa muria o Pelami na luve i Piori tagane, o koya ka sa dau domonia na i yau sa dau rawatia mai na caka ca, ¹⁶ ia sa qai cudruvi ena vuku ni nona i valavala ca. A sa vosa vatamata na nona asa ka sa tarovia kinia na nona cakacaka valialia na parofita. ¹⁷ O ira na tamata koya era sa vaka na i keliwai mamaca kei na o sa veicaginayaki ena cava. Sa varautakia tu na Kalou me nodra na tikinia butobuto loaloa kei eli. ¹⁸ Era sa dau ia na vosa valialia kei na vosa vaviavialevu, ka vayagatakia na nodra garogaro ca me ra coriti ira kinia na tamata era se qai vatekivu dro tani mai vei ira na tamata i tovo ca. ¹⁹ Era sa yalatakia vei ira na bula galala, ia o ira mada lia era se bobula tiko lia ki na ca; ni sa yaco na tamata me bobula ki na veika cava lia ka sa rawai kinia ²⁰ Kevaka era sa dro bula taumada mai na veika dukadukali ni vuravura koya ena vuku ni nodra sa kila na noda Turaga ka noda i Vabula ko Jisu Karisito, ka ra sa qai tacori voki ka rawai ena veika ca koya, era sa na qai ca valevu cake sara o ira koya emuri ka ca valailai ena i tekitekivu. ²¹ Ni sa vinaka cake vei ira mera a kakua mada ni ra kila na sala ni valavala dodonu, ka ca lia me ra sa kila taumada ka qai vanadakuya na i varo tabu sa soli vei ira. ²² Na veika sa yaco vei ira sa dusimakia na dina ni vosa vakaibalebale o ya: “Sa lesu voki na koli ki na nona lua,” ka “Sa lesu voki na vuaka sa vasilimi oti ki na soso me vaqiqiqi kinia.”