7 ¹ O koya koya kodou sa daulomani, ni sa qai tu vei ita na vosa ni yalayala koya, me da vasavasavataki ita mai na dukadukali kecelia ni yago kei na yalo, me da ia sara na ka sa vasava e na rerevakia na Kalou. ² Mo dou dolavia na yalomudou vei keitou; keitou sa yali ni vacala e dua, keitou sa yali ni vacacania e dua keitou sa yali ni kovea na nonai yau e dua. ³ Sa yali ni vosa ni vibetaki na noqu vosa koya: niu sa tukunia oti e liu, dou sa tiko e na yalo i keitou me da bula vata ka mate vata. ⁴ Sa levu na noqu doudou niu sa vosa vei kodou, au sa rekitaki kodou valevu; au sa sinai sara e na vacegu, au sa marau valevu sara e na neitou rarawa kecelia. ⁵ Ia ni keitou sa yaco ki Masitonia, sa yali ni cegu na yago i keitou, ia keitou sa vararawataki lia e na ka kecelia; esau sa ia na veivala, e loma sa tiko na rerevakia. ⁶ Ia na Kalou, o koya sa vacegui ira era sa vabalei sobu, sa vacegui keitou ni sa qai mai ko Taito; ⁷ a sa yali loa lia e na nona qai mai, e na veivacegui kinia ko koya e na vukumudou, ni sa tukunia vei keitou na nomudou gagadre, na nomudou tagi, na nomudou loloma katakata vei au; ka'u sa reki valevu cake kinia. ⁸ E dina lia ka'u a vararawataki kodou e nai vola, ia kau sa yali ni veivutuni kinia, ia kau a veivutuni lia eliu; niu sa qai raicia sa vararawataki kodou nai vola ko ya, ia ka sa dede valailai lia. ⁹ Au sa qai reki, ka yali lia ni dou a vararawataki, ni dou sa rarawa lia ki na veivutuni: ni dou sa vararawataki me vaka na loma ni Kalou, me kakua ni yali vei kodou e dua na ka e na vuku i keitou. ¹⁰ Ia na rarawa sa vaka na loma ni Kalou sa vayacoria na veivutuni ki na bula o koya sa yali ni veivutunitakia voki: ia na rarawa vavuravura sa vayacoria na mate. ¹¹ Ia ka raicia, na ka lia koya, io, na nomudou vararawataki vaka na loma ni Kalou, ni sa vatuburi vei kodou na gugumatua! io, na vasavasavataki kodou, io, na cudrucudru, io, ka rerevakia, io, na gagadre valevu, io, na lomakatakata, io, na via saumia na ca! E na ka kecelia dou sa vadinadinatakia ni dou sa yali ni cala e na ka ko ya. ¹² O koya koya, niu sa volavola vei kodou, au sa yali ni volavola e na vkuna sa caka na ka ca koya, se na vukua loa lia sa vacacani, me varaitaki lia vei kodou na neitou daunanumi kodou e na mata ni Kalou. ¹³ O koya koya keitou sa vacegui kinia; ia e na neitou veivacegui voki lia keitou sa reki valevu cake e na vuku ni reki i Taito, ni sa vacegui na yalona e na vukumudou kecelia. ¹⁴ Ia kevaka ka'u a vacaucautaki kodou vua e na ka eso, au sa qai yali ni madua kinia; ia me vaka sa dina na ka kecelia keitou a tukunia vei kodou, sa lairai vaka vokilia kinia me dina na neitou veivacaucautaki e na mata i Taito. ¹⁵ Ia sa ka levu sara na nona loloma vei kodou, ni sa nanumia ko koya na nomudou talairawarawa kece lia, ni dou sa vacegui koya e na rere kei na sautaninini. ¹⁶ Au sa reki niu sa qai vararavi vei kodou e na ka kecelia.