1 ¹ Koi au ko Paula, nai apositolo i Jisu Karisito e na lewa ni Kalou, kei Timoci na wekaqu, kivei ira nai soqosoqo lewe ni lotu ni Kalou mai Korinica, kei ira kece lia era sa lotu mai Akaia taucoko: ² Me nomudou na loloma kei na vacegu mai vua na Kalou ko Tamada, kei na Turaga ko Jisu Karisito. ³ Me va vinavinakataki na Kalou, o koya na Tama ni noda Turaga ko Jisu Karisito, a Tama ni loloma, kei na Kalou ni veivacegui kece lia, ⁴ o koya sa vacegui itatou e na neitou rarawa kecelia, me itatou vacegui ira rawa era sa rarawa e na dua na ka, e na veivacegui itatou sa vacegui kinia mai vua na Kalou. ⁵ Ia me vaka sa yaco valevu sara vei itatou na rarawa e na vuku i Karisito, sa vacegui itatou valevu sara vakinia na Karisito. ⁶ Ia kevaka itatou sa vararawataki, sa ka mo dou vacegui kinia ka vabulai, ka sa yaco koya ni dou sa vosotia voki lia na veika rarawa itatou sa vararawataki kinia; se itatou vacegui, sa ka mo dou vacegui kinia ka vabulai. ⁷ Ia sa tu dei na neitou nuitaki ikodou, ni itatou sa kila, dou sa votai e na veivararawataki, dou na votai voki lia e na veivacegui. ⁸ Ni itatou sa yali ni vinakatia, na veiwekani, mo dou lecavia na neitou rarawa sa yaco vei itatou mai Esia, ni itatou sa vitaki valevu sara, sa dredre kinia na vosotia, ka itatou sa yali ni dinatia ni itatou na bula: ⁹ ia itatou sa vaka ni itatou sa lewai me itatou mate, me itatou kakua ni vararavi kinia vei itatou, vua lia na Kalou o koya sa vatu ira cake voki na mate: ¹⁰ o koya ka vabulai itatou mai na mate levu ko ya, ka na vabula tiko lia: o koya voki lia itatou sa vararavi kinia ni na vabula tikolia; ¹¹ ni dou veivuke voki lia e na masulaki itatou, me lewe vuqa kinia era vavinavinaka e na vuku i itatou, e na vuku ni ka sa soli vei itatou e na vukudra na lewe vuqa. ¹² Ia koya na ka itatou sa reki kinia, nai tukutuku ni neitou lewa e loma, ni sa ia na neitou i valavala e vuravura koya e na loma e dua loa lia, kei na loma dina vua na Kalou, ka valevu sara vei ikodou, sa yali e na vuku vavuravura, e na loma lia ni Kalou. ¹³ Ni sa yali na ka tani itatou sa vola vei ikodou, oqori lia dou sa wilikia se kila; ia kau sa vadinatia dou na kila ka yacovia nai vataotioti, ¹⁴ me vaka na nomudou kilai itatou lia e na ka eso; ni itatou sa nomudou mo dou reki kinia, me vaka dou sa neitou ka ni reki vokilia, e na siga ni Turaga ko Jisu. ¹⁵ Ia ka'u a vadinatia koya ka'u a nanumia me'u qai eliu vei kodou, me yaco kinia varua vei ikodou nai solisoli loloma; ¹⁶ ka me'u qai daini ikodou ka qai ki Masitonia ka lesu voki mai Masitonia vei ikodou, mo dou yadi au ena noqu qai vaka ki Jutia. ¹⁷ Ia ni ka'u a nanumia me va koya, au sa qai lomalomarua kinia, se yali? se na ka ka'u sa nakitia, au sa nakitia vavuravura beka, me tu kinia vei au na io io, kei na yali yali? ¹⁸ Ia me vaka na nona dina na Kalou, sa vakinia sa yali ni io ka yali ni yali na neitou vosa vei ikodou. ¹⁹ Ni sa yali ni io ka yali ni yali na neitou vosa vei ikodou. Ni sa yali ni io ka yali ni yali na neitou vunautakia vei ikodou na Luve ni Kalou, ko Jisu Karisito, oi itatou kei Silivenuse kei Timoci, a sa caka lia ko koya me io: ²⁰ ni sa io na vosa ni yalayala kecelia ni Kalou e na vukuna, era sa vaemeni voki lia e na vukuna, me va caucautaki na Kalou e na vuku i itatou. ²¹ Ia sai koya na Kalou sa va taudeitaki itatou kei ikodou me da tu vata kei Karisito, a sa lumuti ita; ²² o koya voki lia sa dregati ita, a sa solia ki na lomada na Yalo Tabu me kenai sevu. ²³ Ia ka'u sa kacivia na Kalou me lewa na yaloqu kevaka ka'u yali ni dina, ni sa noqu lomani ikodou lia kau sa vaberaberatakia kinia na noqu qai ki Korinica. ²⁴ Sa yali ni itatou sa veitaliatakia na nomudou vabautia, keitou sa veivuke lia e na nomudou reki ni dou sa tu dei lia e na vabautia.