13 ¹ Kevaka kau sa vosatakia na nodra dui vosavosa na tamata kei na vosa ni agilose, ka yali vei au na loloma, au sa vaka loa lia na kaukamea sa rorogo, se na lali sa tataqiriqiri. ² Ia kevaka kau sa parofisai rawa, ka kila voki lia na ka kece lia sa vuni, kei na vuku kece lia; ia kevaka sa tu vei au na vakabauta kece lia, meu yadia tani kina na veiulu-ni-vanua, ka yali vei au na loloma, au sa ka loa lia. ³ Ia kevaka kau sa vota na noqu ka kece lia, meu vakani ira kinia na dravudravua, ia kevaka kau sa solia na yagoqu meu va yavui, ka sa yali vei au na loloma, sa yali ni yaga vei au. ⁴ Sa dau vosotia vadede na loloma, sa yalovinaka; sa yali ni vuvu na loloma; sa yali ni vosa doudou na loloma, sa yali ni viavialevu, ⁵ sa yali ni caka na ka sa yali ni kilikili kaya, sa yali ni qara na ka me nona lia, sa yali ni cudrucudru, sa yali ni daulomaca; ⁶ sa yali ni rekitakia na ca, ia sa rekitakia na dina; ⁷ sa ubia na ka kece lia, sa vabautia na ka kece lia, sa vanuinuitakia na ka kece lia, sa vosotia na ka kece lia. ⁸ Sa yali ni mudu na loloma: ia na parofisai, ena takali lia; na vosa tani e levu, ena mudu lia; na vuku, ena takali lia. ⁹ Ni da sa kila vatikinia lia, ia eda sa parofisai vatikinia lia. ¹⁰ Ia ni sa yaco na ka taucoko, ena qai takali na ka sa vatikinia lia. ¹¹ Niu a gone, au a dau vosa me vaka na gone, au a kila ka me vaka na gone; au a dau vanananu me vaka na gone; ia niu sa yaco me tamata bula, au sa dainia tani na ka vagonegonea. ¹² Io, edaidai eda sa raicia me vaka na titiro e nai iloilo buawa; ia maimuri ena vaka na veirai e na matanavotu: edaidai kau sa kila vatikina lia; ia maimuri, kau na kila me vaka kau sa kilai.

¹³ Ia koya, sa tu na vabautia, nai nuinui, na loloma, a ka tolutolu koya; a sa uasivi cake vei iratou na loloma.